بحس ان الإيمان بحدوث شئ هو اكبر دليل ع حدوثه.. . كل انسان له حلم ربنا أعلم به .. كل فرد وصل لحلمه كان مؤمن انه هيتحقق من غير م يكون عنده دليل.. بس الأكيد ان محدش حلمه إتحقق بسهولة أو بسرعة.. هتدفع ع قدر حلمك من اعصابك ونفسيتك ووقتك.. الدنيا هتتعقد هتحس إنك متأخر و إن حظك وحش والوقت هيطول .. لكن ع أهون سبب كل الى نفسك فيه هيتحقق.. معنديش دليل إن احلامى هتتحقق بس مؤمنة بدا.. من جوا قلبي فأكتر وقت بحس باليأس فيه بستشعر إنى قربت.. فعز م بكون ف حالة إنهيار نفسى وأكون بكلم ربنا بتيجي نسمة هوا أحس كأنها بطبطب عليا.. الدنيا مش جنة ولا فيها شئ هيكمل للأبد حتى إحنا لكن الإنسان بيحتاج لدافع عشان يعرف يكمل.. انا مصدقة إنى هلمس أحلامى مهما وصلنى إحساس انى متأخرة انا أحلامى كتير هكتبها هنا ويمكن ف يوم ارجع اقرأ البوست ودا وانا محققاها.. بحلم انى أطلع اعمل عمرة قريب وإنى أحج برضو فسنة من السنين.. بحلم إنى يكون عندى المرسم بتاعى و أكون رسامة مشهورة والناس تيجي تتفرج ع لوحاتى من كل حتة ف الدنيا.. بحلم إنى الف العالم نفسي ممشيش من الدنيا دى الا لما أشوف كل حاجة من صنع الله ويبقى معايا الكاميرا بتاعتى لأنى بحب التصوير وأصور صور كتير لكل مكان أكون فيه.. بحلم يكون عندى مكان صغير للبنان وبس يجوا من كل مكان يجربوا الحلويات بتاعتى ونبقى أصحاب .. بحلم انى ف يوم يكون عندى أرض واسعة ابني عليها دار مسنين ومكان للأيتام ويعيشوا سوا وأسميه باسم بابا الله يرحمه بحلم أقابل رفيقي الخيالى في الواقع ويكون زى م بتمنى وأكون زى م بيتمنى ويكون عندنا بيت.. بيت كبير بتدخله الشمس من كل مكان..حواليه جنينة مليانة ورد ومكان لشرب الشاى وجوا البيت أسمع صوت ناس بحبهم ماليين الدنيا ضحك ودوشة ناس لسة مجاتش أتمنى أكون مستعدة ف يوم أستقبلهم ويكونوا فخورين بيا بحلم إنى احفظ القرآن لأنى بشوف ان حفظ القرآن دا معجزة ربنا يكتبهالنا.. بحلم ان قلبي يبقى سليم وربنا يتوب عليا قبل اخر لحظة ف عمرى من كل ذنوبي وأكون ذكري لطيفة فبال أى حد اتعاملت معاه بحلم انى ف يوم أوصل لوضع أى حد يطلب منى أى حاجة اقدر اكون سبب ف تحقيقها نفسي ربنا يمكنى من دا جدا بحلم ب لحظة أكون فيها قاعدة قدام البحر و كل سلام الدنيا وسكونها محاوطنى عقلى هادى وقلبي مرتاح بعد م أكون وصلت لكل حاجة حلمت بيها كل حاجة

0

2