أنا في حالة استنزاف كلي.. واقع مفرغ من المعنى، مأهول بوجوه بلاستيكية بتمارس (تأدية الواجب) كأنها آلات مبرمجة. العالم حواليا بقى باهت لدرجة الاختناق، وجفاء التعاملات اليومية بقى بيسحب الأكسجين من أي تواصل إنساني حقيقي. عندي حالة (قرف وجودي) من كل المنظومة اللي البشر حابسين نفسهم فيها؛ عاداتهم الموروثة، تقاليدهم الفارغة، ومفاهيمهم المعلبة اللي بيمارسوها بآلية مرعبة ومملة. بقيت بشوف كل حركاتهم مجرد طقوس عبثية مفيهاش ذرة صدق أو عمق. أنا مش بس معزول، أنا (منفي) داخل وعيي. بشتغل وبتحرك وبدخل في الزحام، بس الحقيقة إن بيني وبينهم سنين ضوئية من الاغتراب. واقف في حتة لوحدي تماماً، مش اختياراً، لكن لأن المسافة بين (جوه) اللي مفيش حد فاهمه، وبين (بره) اللي كله زيف، بقت فجوة مستحيل تتردم. كتمة نفس سببها إني مش قادر (أتفه) زيهم، ولا قادر أقبل إن وجودي يتدفن وسط قشورهم