أنا اتعرفت على حد في جروب وأنا لسه داخلة أولى جامعة، كنت بسأل على حاجة تبع الجامعة، وهو كان في قسم وأنا في قسم تاني، ودخل يساعدني. من ساعتها بقينا بنتكلم، وكان صديق كويس جدًا بجد، دايمًا سند وداعم، وشخص ملتزم وبيصلي وقريب من ربنا. ما كناش بنتكلم كل يوم، بس ما كانش بيعدي يومين غير لما نسأل على بعض ونطمن على أخبارنا في الجامعة في أول سنة كنت شايفاه عادي جدًا، لكن لما دخلت تانية بدأت أحس بمشاعر مش عارفة أحددها: هل إعجاب؟ حب؟ ولا تعوّد وعدّت تانية زي أولى بالظبط تقريبًا. لما دخلت تالتة، بدأنا نتغير شوية. أنا كان بيجيلي عرسان، وكنت ساعات بنشغل في الجامعه، فكنت أحيانًا ما بسألش عليه، وهو كمان بقى أقل في السؤال وكذا مرة كان بيلمح إننا اتغيرنا، وكنت بوافقه إن فعلاً الكلام والسؤال مبقوش زي الأول مع العلم إني ولا مرة اتخطبت بس مجرد عرسان بتيجي فجأة لقيته بيحكي لي عن بنت معاه في القسم، وإنه معجب بيها وبدأوا يتكلموا أول ما عرفت، قلت له إني لازم أبعد، عشان إحنا كنا أصدقاء ودلوقتي في طرف تالت، وأنا ما بحبش أكون في الوضع ده. هو حاول يقنعني إن ده مجرد إعجاب وإنه متلخبط، لكن الوضع فضل زي ما هو، وكلامنا قل عن الأول. جوايا كان في إحساس غريب، مش عارفة هو انكسار ولا مجرد زعل. امبارح بليل كنت منزلة ستوري، دخل كلمني وسأل عليا، وقال إنه عايز ياخد رأيي في موضوع. وفجأة لقيته بيسألني في مشكلة تخصه هو والبنت دي، لأنه راح اتقدم لها وأهلها وافقوا، وكانوا متفقين على قراءة الفاتحة بعد العيد، لكن في مشاكل بينهم دلوقتي. أنا نصحته باللي يرضي ربنا، وقلت له يصبر ويكون داعم ليها لو هو فعلًا بيحبها. بس في نفس الوقت، اتضايقت وزعلت. وقلت له إننا ما ينفعش نتكلم تاني، عشان ما يفهمش إني بعاتبه أو غيرانة. هو حاول كتير إننا نفضل زي ما إحنا من غير ما نقطع تمام، بس أنا رفضت، وقلت له إن ده أناني ومينفعش. رغم كده، وأنا بتكلم حاولت أكون هادية وكلامي لين، حتى لو هو ما كانش لين معايا. دلوقتي أنا مخنوقة ومش عارفة: اللي عملته ده صح ولا لا؟ وأفترض أتصرف إزاي بعد كده؟
