أنا النهاردة أخدت أهم درس في حياتي وأنا عندي 25 سنة.. وعرفت إن الدروس الغالية لازم تمنها يكون غالي من أعصابنا ونفسيتنا. ​بكرة 20 يناير هو آخر يوم ليا في مكاني الحالي، وبقفل الصفحة دي للأبد. اتعلمت في المكان ده إن (الأشخاص من بعيد أحلى) بكتير، وإنك لما بتقرب زيادة وبتحكي وبتتعشم، بتدي للناس السلاح اللي يذبحوك بيه. ​اتعلمت إن (الشغل للشغل) بس، وإن فتح القلب في بيئة شغل مش شبهك هو أكبر غلطة ممكن ترتكبها في حق نفسك. الناس مش دايماً بيفهموا طيبتك أو تعبك النفسي، بالعكس، فيه ناس بتستنى لحظة وقوعك عشان يشمتوا فيك، وناس تانية كانت بتكتم أنفاسها ومستنية تمشي عشان (تاخد راحتها)، وكأن وجودك كان حِمل عليهم بس عشان كنت شاري ومهتم. ​أصعب حاجة لما تكتشف إنهم هيشوفوك وحش مهما عملت، وهيتكلموا عليك (من تحت الضرس) حتى وأنت بتلم حاجتك وماشي، لدرجة إن حتى سكوتي وهدوئي في أيامي الأخيرة مسبهوش في حاله وفضلوا يحللوا فيه ويألفوا قصص بـ (منتهى الشماتة). هما مش متخيلين إني ممكن أكون ساكت لأني خلاص (استغنيت) ونفسي اتسدت من المكان ومنهم. ​أنا خارج بكرة مش بس سايب شغل، أنا سايب الشخص اللي كان بيتعشم وبيحب ويغلط.. سايب حبال الود اللي هما اختاروا يقطعوها بقسوة. بكرة بداية جديدة لشخص عارف قيمته، ومصدق إنه يستاهل ناس أرحم وحياة مفيهاش نفاق. حقي عند ربنا، والواقع هو اللي هيرد على أي حد حاول يكسرني

1

0