بتبص ف المراية بعيون دبلانة ونظرات تايهة وبتسأل إنعكاسها .. انا مين؟ انا هنا ليه؟ فتحت عنيها لقت نفسها ف فيلم كبير ناس كتير بتتكلم ف صوت واحد بيتحركوا بسرعة وتوتر !!.. قالولها يلا دورك بدأ قولى كذا وأعملى كذا.. هى مش فاهماهم و لا عارفة تسمع من كتر الأصوات.. ايه توصيف دورها أصلا؟!!.. بتحاول تعمل الى بيقولوه من غير ما تفهم ومحدش كان مهتم يفهمها اصلا المهم تسمع الكلام ..ممنوع تسأل او ترتجل او حتى تفكر.. بس من جواها بدأت ترتجل و تألف بينها وبين نفسها فيلم صغير بتمثل فيه لوحدها بطريقتها وشخصيتها مع أشخاص من خيالها.. كانت تبان عايشة فالفيلم الكبير لكن هى كان كل كيانها ف فيلمها الصغير.. ...... بعد سنين كتير فهمت ان دى اسمها الحياة وان ف المكان دا كل انسان من حقه يكون له إختياراته وانه عادى نغلط عشان نتعلم ..فهمت انها مش عروسة ماريونت بتحركها خيوط بين صوابع بتقرر طريقها ومصيرها.. .. بس وهى لسة بتستوعب هى فين أصلا ..فجأة فجأة نفس الناس الى كانوا بيقرروا لها كل حاجة بدأو يزعقوا و يزقوا فيها ويقولولها يلا عيشي انتى مش بتعيشي ليه انتى مش فاهمة ان هنا الحياة انتى ليه مش عايزة تعيشي انتى كدا انتى عايزة تبقى كدا ..انتى الى عايزة تضيعي حياتك.. احنا حاولنا معاكى كتير بس انتى مش عايزة تفهمي مش عايزة تتحركي.. .. ولسة قدام المراية بتقول لنفسها انا فين ؟انا هنا ليه؟ انتى السبب في الى انا فيه دلوقتي.. انا حاولت.. "في حسابتهم انتى محاولتيش عشان منجحتيش بطريقتهم" مشيت ف طريق مخترتهوش وحاولت اتأقلم معرفتش.. حتى فيلمى الصغير كبرت وفهمت انه صعب يتحقق.. عندى عمر هتحاسب عليه.. عندى وقت محدد هنا وهيخلص وهمشي.. مش عارفة أعيش!!....

0

1