شوف خو.. مخنا راهو تعفن من تيكتوك والريلز ومواقع التواصل والدوبامين بدون جهد.. فسدنا ڨع.. ولات قليل وين حاجة تفرح.. السيستام تع الدوبامين راهو مخرب ڨع.. حتى المجهود تع البحث في ڨوڨل ولا ماكاش مع الذكاء الاصطناعي.. فسدنا بمعنى الكلمة.. ونتا علابالك وأنا علابالي بلي ماراكش رايح ترمي الما على مواقع التواصل.. وولا درتها راك راح تديرها على أقصى تقدير سمانة برك.. وتولي حليمة لعادتها القديمة.. يجوزو يامات تلقى روحك تسكرولي برك وماداير حتى حاجة في واقعك.. وحتى المتعة وماكاش.. حياتنا راهي تهرب.. بكري كانو يتلفولنا يامات السمانة.. دوك ولاو يتلفولنا العوام عمو.. وين بيها ربي عالم.. كاين عفسة تقدر تكون حل.. تعاون تعاود ترييكيليبري السيستام تع الدوبامين.. حفظ القرآن خو.. اصبر كمل اقرا المنشور ارحم والديك.. مارانيش نقولك احفظ الستين.. خاطش كي تقول لواحد احفظ القرآن تجيه كبيرة.. ماتديرش هدف واعر يا سيدي.. دير هدف خفيف.. وماتبداش يا سيدي بالسور الصغار وتقولي راني نحس روحي نعاود سور كنت حافظهم وتعجز قبل ما تبدا.. احفظ السورة لي تعجبك بزاف.. ڨع عندنا بعض السور أقرب لقلوبنا.. يا سيدي تخلطتلك ؟ ابدا بسورة الملك.. سورة سهلة للحفظ وتقي من عذاب القبر.. ابدا بسورة برك.. سورة بسورة.. عدة منافع راك راح تستخلصها خو.. القرآن تعاود توليلو بعدما رانا هاجرينو أغلبيتنا للأسف.. زيد راك راح تعاود تدير في حياتك جانب روحاني صح.. وحتى الصلاة راك راح تصليها بسور جديدة وتولي خاشع أكثر.. ماشي مجرد حركات ترددها كل يوم.. راك راح تعاود ترجّع بريق العبادات.. وزيد بالحفظ راك راح تعاود تولف مخك يركز.. والسيستام تع الدوبامين يتريڨلا بلعقل بلعقل.. حتى تلقى روحك من عدة ساعات يروحو سكرول في اليوم.. إلى الوقت هاداك يوليلك وقت تستغلو في أمور أفضل ليك.. ويوليلك ذوق الحياة.. أنا تبانلي هكدا.. مجرد نصيحة ليا قبل ما تكون ليكم.. ربي يهدينا ويعافينا..

2

2