عندي حنين كبير لحياة عمري ما عشتها.. مجرد حياة بسيطة، وعادية جدًا بالنسبة لأي حد بس دافئة، وهادئة، وبلا تعقيدات أو دوشة. أكبر فترة ممكن تفكرني بنفس المشاعر دي أعتقد الطفولة.. ممكن عشان وقتها مكانش فيه إدراك كافي للأحداث المأساوية اللي بتحصل حوالينا.. ممكن عشان بس كنا عفويين وبسيطين.. كل آمالنا أن بس وقت المشاكل تنتهي عشان نجري نلعب أو نشاهد كرتون من غير أفكار.. من غير هموم.. من غير مشاعر مأساوية. بتمنى دائمًا عمري كان يقف عند النقطة دي "قلة الإدراك".. الإنسان عدو للي مش بيفهمه.. فعشان كده بحس دائمًا أني أكبر عدو لنفسي.. إحساس الغُربة عدم الإنتماء التيه الغضب الرغبة في أني أكون شخصية لا مرئية محدش يبقا عنده المقدرة يشوفني.. كل دول أتشكلوا عشان يكونوا كيان مُعقد بائس متردد حائر لا مبالي. قضيت وقت طويل من عمري بحاول أتمسك بالغموض قدام الناس الطبيعية.. ممكن عشان ببساطة بحس وسطهم بفجوة كبيرة بين تفكيري وتفكيرهم بحس بأختلافي، وبيزيد إحساس النبذ أضعاف.. أني هفضل دائمًا بنفس إحساس الغُربة وعدم الإنتماء.. إحساس مُثير للإشمئزاز. بكره كوني دائمًا بتعمق في مشاعر الناس، وبحاول أعيشها.. التفاصيل بالنسبة ليا مُهلكة.. فاهمين يعني أي أقصى طموحي أبقا بس شخصية طبيعية!

6

4