صباح الخير نصيحة صغننة للناس اللى عايشة فى بيوت مليانة خناق طول الوقت ومن غير سبب ودة ماثر على نفسيتهم ..... جربوا لما تلاحظوا ان فى مشكلة هتبدا متتفرجوش من بعيد وخلاص بالذات لما تكون الخناقات دى بين الاب او الام واخواتكم مثلا او بين الاب والام بس .. وهنا مش قصدى على المشاكل الكبيرة او الأسرية لا دى متتدخلوش فيهاا خالص وياريت لو تقفلوا على نفسكم اوضة ومتسمعوهاش اصلا ، لكن فى بيوت ممكن تقوم فيها خناقة على كوباية ماية او خلاف صغير بين الاخوات ، جربوا بدل ما تتفرجوا تتدخلوا بالراحة وتشتتوا الانتباه شوية او تهدوا الموقف ، مثلا بابا او ماما طلبوا حاجة من حد من اخواتكم ورفض او اجلها شوية وحسيتوا انهم بداوا يتخانقوا ... جربوا تتدخلوا وتقنعوا طرف من الاتنين برأى التانى ، لييه بقاا ... لان طول ما انت برا الموقف عقلك بيكون واعى وطريقة كلامك هتكون اهدى عكس اللى بيتخانقوا محدش فيهم بيكون مركز غير فى غضبه وبس . باباك طلب حاجة من مامتك وهى مشغولة او العكس واتخانقوا .. لو تقدر تعملها انت اعملها وخلاص وعدى الموقف . وعلى كدة بقا مواقف كتير كل يوم ، لو بايدك تهدى خناقة بسيطة او تعقل حد من اخواتك او توصل نقطة معينة لاهلك ممكن تحل خناقة اعمل كدة . اكتر حاجة بتخلى البيت متوتر وطاقته كلها سلبية هى الخناقات اللى بتحصل من غير سبب دى ... حقيقى خناقات بتطلع من مفيش بتخلى كل واحد بعيد عن التانى ومش طايقين بعض ، بس فى نقطة مهمة لو حسيتوا ان الموضوع بقا بيقلب معاكم انتو بالسلب ويهلك طاقتكوا انتو اكتر من الاول او حسيتوا ان دخولكم بيزود المشكلة اكتر متعملوش كدة لان وقتها انت اللى هتتضغط وتتعب لكن لو تدخلك دة بسيط ومش هياثر عليك اكسب ثواب فى نفسك واهلك واعمل كدة . دى نقطة النقطة التانية بخصوص الاخوات ... لو حسيتوا ان اخواتكم بياخدوا موقف من بعض ومش طايقين بعض وديما خناق بلاش تقفوا مع واحد فيهم على طول وتسيبوا التانى حتى لو غلطان ، لان دة بيزود طاقة الغضب والنفور دى عنده ... وبلاش النصيحة وقت الغضب او الخناقة مينفعش تعلم حد يعوم وهو بيغرق خلاص ... انا فاهمة ان دى حاجات بتحصل كل يوم بس تاثيرها علينا بيكون اسوأ مما نتخيل فعلا .. وممكن تغيير بسيط تعمله يحسن كتيير من وضع البيت . شغلوا قران ، افتحوا الشبابيك ، بخروا البيت ، اعملوا سهرة حلوة ، جربوا تجددوا روح البيت بتفرق والله . واوعى تضغطوا على نفسكم او تحملوها فوق طاقتها .... بس كدة وربنا يهدينا ويهديكم اللهم امين 🤍🌿

2

2