انا اول مره في حياتي انزل ابليكيشن كده وكمان اكتب حاجه عني عليه فكنت حابه اتكلم عن تجربه يمكن تعلم غيري .. من كام شهر صاحب اخويا الأصغر مني بسنه لقيته بيكلم اختي الكبيره وعايزه يتقدملي وكان متمسك بيه جدا وبيحاول يقنع اختي أن السن مش مشكله بالنسبه ليه وأنه بيحبني والكلام الفاضي ده وكمان جه قعد مع والدتي وبرضه والدتي فضلت تتكلم معاه أنه مينفعش السن وكده برضه كان مصر جدا لعند ماانا اقتنعت وقولت اني موافقه وبدأت اعرف أهل والدي (لان والدي متوفي )أن فيه شخص متقدم وهما طبعا عارفينه شخصيا وكلهم قالوا تمام لعند ما كانت كل حاجه ماشيه تمام وخلاص قولناله تعالي وكلم اخويا الي هوه صاحبه يعني لقيت تاني يوم أخته بعتالي رساله علي الماسنجر بتقولي أنهم عايزين وحده دكتوره لاخوهم وكمان وحده اصغر منه واني ابعد عنه واشيله من دماغي فاانا رديت عليها بكل احترام وقلتلها حاضر ومبررتش ولا وضحت ولا اي حاجه ودخلت عملت لاخوها بلوكات وعرفت اخواتي بالي حصل وطبعا اخويا اتخانق معاه وقاله لو مخلاش أخته تعتذر ليه هيتصرف تصرف تاني معاه وطبعا لقيت أخته بعدها باسبوع باعته تعتذر ليه فاانا مردتش عليها والموضوع اتفقل علي كده . الموضوع يبان تافه بس بجد كسر قلبي بطريقه محدش يتخيلها وخلي ثقتي ف نفسي تقل جدا مع ان أنا اه مش دكتوره بس معايا كليه عاديه وكنت بعمل دراسات عاليا أيامها ومحترمه الحمد لله ومستوي اجتماعي اعلي منه وكمان اخواتي دكاتره والحمد لله علي قدر من الجمال يعني والله مافيه عيب بس عيبي اني مش دكتوره وكمان اكبر منه بسنه مع أن الي يشوفني يقول إن أنا الي اصغر منه .. الموضوع ده كسر نفسي اوي ومريت بفتره تعب بعدها عمري ماكنت بمر بيها وثقتي كانت صفر بجد لعند ما الحمد لله ربنا قواني وفوقت لنفسي وحاليا سجلت دكتوراه وبحاول اعلي اكتر من نفسي وثقتي ف نفسي رجعت 80% كده ودا كله كان بفضل ربنا وبفضل والدتي واخواتي .. والمشكلة دي علمتني ان لازم دايما احكم عقلي ومتاثرش ابدا باي حاجه بتحصل حواليا وكمان اني موافقش علي اي حد اصغر مني ف السن مهما قدم من محاولات فاتمني كل بنت متغلطش غلطتي واتمني تدعولي ربنا يرزقني بالزوج الصالح اللي يريح قلبي ويسعدني 🤍

2

11