انا عندى جرح رؤيه.. انا متشافتش.. انا مريضه من زمان.. انا واحده بتمشى تصرخ فالخلق شوووفونى انا هناااا.. عايزه اتحب مش عشان الاستقرار نفسه قد ما عشان احس انى متشافه عادى! انسانه يعنى بنت طبيعيه ممكن اتحب.. انا عندى حته جوايا مقتنعه تمام الاقتناع ان الحب مش ليا.. انى عمرى ما هتحب زى ما البنات بتتحب.. عمر ما فى راجل هيعشقنى او هيكتفى بيا.. حتى لو مش باين عليا من بره او مش بتصرف على الاساس ده بس ده اعمق صوت جوايا.. مهما احاول اعلى قيمتى و استحقاقى مبعرفش اتخلص من الصوت ده.. بقالى سنين عارفه مرضى و فشلت اعالج نفسى منه زى ما عالجت نفسيتى من حاجات كتير.. الا ده.. مش عارفه اتعالج.. انا كنت مجرد طفله يوم ما اتكسرت.. عشت سنين طفولتى و انا مقتنعه انى مش حلوه نهائى.. كانت ثقتى فنفسى تحت الصفر مكانش عندى صحاب كنت خجوله لدرجه مرضيه.. كل ده بسبب انى مهزوزه.. من اول الفتره الى كنت محتاجه فيها انى اتشاف و متشفتش بدا عندى الثقه تنزل حبه فحبه.. انا كنت بصرخ انى اتقدر و اتحب و اتشاف.. بدل ما اخد ده اخدت عكسه تماما.. اتكسرت حتت مسابوش فيا حته سليمه.. مسابوش فيا حاجه احبها فنفسى حتى.. كنت مجرد طفله.. طفله بتصدق الى بيتقلها من اقرب الاقربين ليها.. ولما كبرت معرفتش اغير قناعاتى الداخليه عن نفسى.. اه نجحت و بقيت قويه بس لسه جوايا صوت الطفله المهزوز و صورتها المشروخه فالمرايه.. مش قادره انسانى وانا مكروهه.. مش قادره انسى الطفله الى صرخت مهما صرخت و محدش سمعها بل كسروها اكتر عشان تبطل صراخ.. هى دى انا.. دى انا الى جريت ورا واحد فعرض نظرره منه! مش حب ولا قرب ولا علاقه ولا مستقبل لا.. نظره.. احساسس.. مجرد احساس يقوللى انى متشافه.. مجرد انه يبصلى من بعيد و اشوف قد اى عايزنى أو حاببنى او شايفنى.. حتى لو مش هيقرب ابداا.. انا كنت عايزه اتشاف بس.. حتى دى ماخدتهاش ..

2

11