طول عمري خايفه من المنحدر اللى هيقابلني في حياتي و هيلزمني أقف و أوجه تراكمات كتيرة كنت بطنشها و عادي، معملتش حساب له لأن اعتبرته شيء عادى و برضو طنشته، مش عارفة هطلع منه ازاى، و مش عارفة اذا كنت هطلع منه ولا لا و هيسحبني في الآخر لنقطة مش حابة اني أوصلها في يوم من الأيام، مش عارفة هعرف أحاربه و أطلع منه ولا هيهزمني، الكلام كبير اوي و صعب يتفهم، و مستغربة أنا بقول كده ازاى ولا جبت الكلام ده منين، بس المهم اني خايفة، مش عارفة ليه و من اى بس كل التراكمات اللى اتساهلت فيها ولدت عندى الخوف ده خوف غير مُبرر خوف من كل حاجة أنا مش قدها و مش هكون قدها، تناقض غريب ف انك عاوز تكمل بس خايف تكمل ف تقول انك مش هتكمل، خوف من المستقبل و من الحاضر حتي من الماضي،كله مرتبط ببعضه و المؤكد ان الماضي هيكون له أثر مش معروف هيكون إيجابي ولا سلبي، كلام كبير عليا عقلي رافض يستوعبه، مبقتش حابة أكمل حياتي على فكرة لها احتمالين، حابة اكمل في حاجة مؤكدة، بس انا كمان خايفة من الحاجة المؤكدة، المرادى هتكون مختلفة ليها مسارين اما جنه أبدية و اما نار أبدية، بس أنا عاوزة أحاول أخليها جنه أبدية حابة أفضل أحاول مهما كانت الظروف اللى هتقابلني، حابة أخليها حاجة مميزة و مختلفة، حابة أضمن اني هعرف أخليها جنه أبدية، بس منين أجيب ضمان على حاجة أنا عاوزة أعملها، كفاية كده عليا..

0

11