ذكرياتي الغريبة مع أكل الصابون وأنا صغيرة

Hazelnut_84060 🇪🇬

منذ 3 أسابيع

شعور خجول

جماااااعة انا افتكرت موقف عررة اوي بجد كنت بعمله و انا صغيرة كنت بحب اكل البرسيل و الايريل واي حاجة ريحتها صابون و اكتر حاجة كنت بحبها الورقة اللي بتكون في غلاف الصابونة بتكون ريحتها حلوة اوي كنت بحب اكلها و كل مرة ماما تشوفني بعمل كدا تضربني و تهزقني و برده مافيش فايدة مصممة ادمان بجد ايه ده 😂😂😂

ضحية تحرش مش فاكره التفاصيل وبحس بالعار

لو حد بيشوف مسلسل لام شمسيه .. هو ياسين كدا ضحيه تحرش برضو و ممكن يعاني نفسيا زي يوسف ؟ من اول ما شوفت المسلسل و الفيديوز اللي بتتكلم عن الموضوع و انا حاسه اني حصلي حاجة زي كدا بس مش فاكراها عصرت مخي و للاسف بعد حلقة النهاردة افتكرت.. بس مش اوي انا فاكره اني كنت بلعب لعبة سر مع ولد قريبي اكبر مني بسنه بس مش فاكره انا كنت متضايقة ولا لا مش عارفه الموضوع بدأ ازاي و انتهى ازاي معتقدش اني حكيت لحد لانها كانت * لعبه * بس حاجة حاسه بالعار نحيتها و بعدين بدأت اتجنب قريبي دا كتير لما كبرنا شويه و كنت كل ما بشوفه بحس بالعار و اتمنى لو انه نسى .... انا مش فاكرة حاجة تانيه خالص مهما حاولت افتكر و مش قادرة افتكر ايه سبب اني اعرف حاجة زي دي و اعتقد وقتها كان عندي 7 سنين تقريبًا ( حسبت سني بأحداث كبيرة حصلت في العيله وقتها ) ...عرض المزيد

10 الدعم

2 نصيحة

لقاء مؤثر مع طفولتي في الكافيه 🥺

*انهارده قابلتني وانا صغيره ف كافيه* هي وصلت بدري شويه عشان متحمسه وانا وصلت فالمعاد بالظبط عشان مبحبش التأخير ولا الإنتظار هي كانت لابسه فستان قصير جديد وفرحانه بيه وماما عملالها تسريحه جميله ف شعرها الناعم وانا كنت لابسه بلوزه واسعه وبنطلون واسع وطرحه هي طلبت عصير مانجا وانا طلبت شاي بلبن وأخدت مني شويه كانت مستغربه إني بضحك من غير ما أخبي سناني بس قولتلها ان الأسنان الوحشه وقعت وجيه غيرها حلوين عشان سمعت كلام ماما وإني بقيت بحب ضحكتي كانت مستغربه برضو إني لسه لابسه النضاره قولتلها أنها بقيت جزء أساسي مني وإني م عايزه اعمل العمليه عشان مبحبش شكلي من غيرها ف أتضايقت شويه سألتني لسه إجتماعيه وبتحبي الناس وكلهم صحابك قولتلها بقيت إنطوائيه شويه ومبقيتش بتعرف علي ناس جديده بسهوله بس لسه فرفوشه وقعدتي حلوه وتتحب وسألتني بقي عندي صحاب بيحبوني زي ما بحبهم ولا لسه في منهم بيضايقني بس قولتلها إننا اتصاحبنا علي كتير أوي وإني اتعلمت كتير برضو وفالأخر ربنا كرمني ب أختين م مجرد صحاب مدرسه او دروس وإني محبوبه من معظم الناس فحياتي وبحبهم كلهم واني بعرف أخد حقي لما حد بيضايقني قالتلي لسه بتحبي المدرسه والمذاكره وشاطره فيها قولتلها أن معندناش مدرسه السنادي وإني ف أصعب سنه دراسيه وإن مستوايا بيقل وخايفه محققش هدفي.. سألتني أخواتي كبرو وبقينا بنلعب مع بعض كتير قولتلها أنهم كبرو ومبقيناش بنبطل خناق طول اليوم والوضع بيننا بيسوء سألتني عن بابا لسه بيحب يصورني طول الوقت ويغني معايا قولتلها أنه بقي شايف إسلوبي وحش وإني اتغيرت للأوحش بس عادي يعني سألتني جيبنا قطه ولا لسه ماما م موافقه قولتلها أن ساندي معايا بقالها أربع سنين وإنها خلفت وجابت قطاقيت صغننين وفي واحد منهم مات والباقي معرفش حاجه عنهم غير توتا اللي معايا فرحت أوي وإتضايقت فنفس الوقت قالتلي أنها فخوره بيا وبكل حاجه حصلتلي وعديت بيها وقالتلي سلميلي علي ماما وبابا واخواتي وبنات خالتي وأهم حاجه أنها حضنتني قبل ما تمشي مع أني كنت عايزه القعده تطول اكتر من كدا. م حابه فكره التريند سِنه بس وير إز ذا بروبليم لو جربت يعني🤨 ...عرض المزيد

16 الدعم

4 نصيحة

ذكريات طفولتي مع قصة حب مسيحي ومسلمة في المدرسة 😂

ورايا كوم حاجات بس جات علي بالي ذكرى قولت ولله لاعمل استوري تايم (انا بحب الفقرة دي اوي 😭) المهم الاستوري تايم عن عشوائيات طفولتي كلاكيت تالت مره كلنا ايام ابتدائي كان في قصص حب ولفلفه سوى بينكم وبين حد في الفصل او بين اتنين تانيين انا بقا كان في قصتين حب في فصلي واحده يعني قصة حب منطقية بين مسلم ومسلمة والتانيه بين مسلمه ومسيحي آيوه زي ما قريتو 🤣 انا بقا هاكلم عن المسيحي والمسلمة مش عارفه ابدأ منين لأن ليها زوايا كتير اوي بس نبدأ من أول ما عرفنا بحبهم 😂😂 المسيحي ده بصراحة كان الجان بتاع الفصل والمدرسة وبيطلع الأول وبيعزف في طبور المدرسة يعني اي بنت تتمناه وكمان كان بيعمل ورق علي شكل مراكب وركزو في دي 😂😂 كنا اوقات النشاط بتغير الاماكن و واحده مننا قاعدت مكان البنت دي ولقيت مركب في درجها وإحنا بنات الموضوع مش هيعدي بالساهل علينا فضلنا مركزين معاهم انا عن نفسي الاخبار كانت بتجيني وانا في مكاني اختكم ليها عصافير كتير 🤭 واكتشفنا انهم بيتقابلوا وراء الحمامات بتاعت المدرسة علاقة نجسه 😂 واحدى البنات لقيتو بيلبسها خاتم وإحنا شوفنا في ايدها متسرحوش خاتم من ورق النتن المهم مع الوقت هما عرفوا اننا عارفين فبقى بيديلها المراكب في الحصص قدمنا لحد بقا ما قفشتهم مس الرياضة ومس الرياضة أصلا مرات عمها 😂😂 ولقيتو كاتب في الورقة اشعار وغزل مقولكوش كأنو حديث المدرسة كلها و اتاخدوا علي المديره والبنت فضلت مده مش بتاجي وعرفنا ان مرات عمها قلبت الدنيا عليها في البيت ولله أنا شخصيا نو كومنت يعني سايبه التعليق ليكم وعلي فكرة انا مدرستي كانت حكومي مختلطه وما أدراكم عنها 😭 ...عرض المزيد

5 الدعم

2 نصيحة