من كام سنة القدر جمعنى ب"عريس صالونات" عن طريق والدته نموذج مكنتش أعرف انه موجود ف الحياة بس لما اتعاملت معاه للأسف اكتشفت ان فيه منه كتير وهو الشخص المعجب بنفسه🙂 الى بيحب شكله اوى وشايف ان مفيش اى حد يستاهله الا بمواصفات معينة.. وانا كنت صغيرة وشايفة ان اعجابة بنفسه دا ثقة ولما حصل قبول من الطرفين وبدأنا نتعرف ع بعض في إطار شرعي إكتشفت انه حد هش مش عارف هو عايز ايه معندهوش طموح كل ثروته ف الدنيا شكله ! بيقيم الناس كلها كدا وشريكة حياته لازم تكون حد مثالى من وجهة نظره مفهاش غلطة.. مرة سألته سؤال طب انت لو شكلك لا قدر الله حصله حاجة المفروض ان شريكة حياتك تسيبك قالى ايوا هتكمل معايا ليه!!.. النموذج دا واحد من ناس كتير بشوفها وبسمع عنها وهو الشخص الى بيدور ع المثالية فكل شئ بحجة ان الشئ المثالى عمره أطول وهيحسن من جودة الحياة لكن نفسي كل انسان يسأل نفسه سؤال هل انت مثالى ؟؟ بتعمل كل جاجة صح و هل دا تفكير طبيعي .. طيب ولو كان طبيعي ولقيته هل انت تستحق الشئ او الشريك المثالى دا وهتقدمله كل شئ هيحتاجه منك بطريقة مثالية ولاانت انانى وفاضي من جوا وعايز حد يكون مميز اوى عشان تدارى فيه وتفتخر انه موجود ف حياتك ويكون وجهتك قدام الناس .. اكبر مقلب بيشربه الشخص الى بيدور ع المثالية انه بيفضل يدور ويدور ويدور بس وبيشك فأى شئ حواليه وبيقول هستنى يمكن الاقى الاحسن لحد م عمره يخلص ف التدوير ان يكون عندك معايير دا حقك بس الحق دا بيكون بناءا ع إستحقاق حقيقي انك فيك المميزات الى تخليك انت كمان كافي للطرف التانى ولا عايز تاخد وبس .. ساعات بحس ان ربنا خلق المشاعر والحب عشان الناس تتقبل نواقص بعض ويكملوها .. انك مهم تختار العيوب الى هتقدر تتقبلها مش المميزات لان دى الى هتخليك تعرف تكمل الحياة بسيطة وقصيرة محتاجة ونس وشوية رحمة حد يفهمك وتفهمه وبعد سنين كتير لو عمره طال عنك يفضل وفي لذكراك ويدعيلك لحد م يقابلك تانى

1

3