لو حاسس إن فى حاجة غلط ومش عارف تحددها فإنت مش لوحدك .. مش إحنا اللى بقينا ساذجين، العالم هو اللى بقى أذكى فى الكذب والخداع .. فى إحساس عام عند ناس كتير إن فى حاجة غلط .. إن الكلام بقى بيلخبط، أو الحقيقة بقت تقيلة، وإنك كل ما تحاول تفهم أكتر، تحس إنك تايه أكتر .. وده مش وهم .. لأن زمان كان الكذب مباشر .. تحبه أو تكرهه، تصدقه أو ترفضه .. صحيح إن مش كل اللى بيتقال كذب، لكن كتير من اللى بيتقال ناقص، والنقص المتعمد أخطر بكتير من الكذب الصريح .. إحنا مابقناش فى زمن إن حد يضحك عليك .. إحنا بقينا فى زمن إن حد يقولك نصف الحقيقة، ويخليك تكمل النص التانى على مزاجك، وده اللى مرهق ومتعب جدا .. علشان كده ناس كتير بقت تقول “مش فاهم حاجة” “كلهم شبه بعض” “مش عارف أصدق مين” وده رد فعل طبيعى لأن الخداع بقى إحترافى حتى لو كان بلا وعى .. بيستخدم لغة هادية، ناعمة، عاطفية بعناوين ذكية .. ومتغلف بكلام يخليك تشك فى نفسك قبل ما تشك فيه ومع التكرار، العقل بيتعب، ويستسلم .. واللى يخوف فعلا إننا بقينا نحس إن ده بقى طبيعى .. لكن لأااا ده مش الطبيعى .. الطبيعى إن الحقيقة تكون واضحة، مش محتاجة مجهود جبار علشان توصلها .. ولو حاسس إن فى حاجة مش راكبة، لو بتتعب من كثرة الكلام وتضارب الروايات فده مش تشاؤم ده وعى وصدام أكبر بالحقيقة .. يمكن الحل مش إننا نعرف كل حاجة، لكن إننا نركز ونسأل أكتر .. لأن الحقيقة دايما لسه موجودة، بس محتاجة صبر ومساحة هدوء وشجاعة أكبر إننا نواجهها .. بس السؤال اللى بجد هنا .. هو إحنا بقينا فعلا نشك فى الحقيقة !!.. ولا بقينا نرتاح أكثر مع اللى يطمنا حتى لو مش صحيح ؟! .. مُوجْ 🌊.

2

1