السلام عليكم ورحمة الله وبركاته أسفة مقدما لو كان كلامي فيه لخبطة بس أنا نفسي متلخبطة أنا واحدة في أولى كلية كلية التجارة و بصراحة مش حاسة إنها مكاني لكن في نفس الوقت مفيش رغبة ل كلية معينة أنا لما كانت في تالتة ثانوي كان هدفي إني أجيب مجموع عالي وبس مكانش فيه كلية معينة في بالي المهم إني أنجح بمجموع حلو وخلاص و الحمد لله جبت المجموع اللي نفسي فيه و فرحت أهلي و كانت فرحتهم بالدنيا بعدين جه معاد التنسيق الكل قاللي أدخلي تجارة لأن ليها مستقبل و بتاع و انا زي ما قولت مكانش فيه كلية معينة ف بالي و بصراحة كنت عايزة كلية ليها مجال في سوق العمل ف قولت ماشي على بركة الله من أول يوم و أنا مش مرتاحة طبعا أنا كان في محاضرات فاتتني و اليوم نفسه كان مرهق حسيت إني تايهة و مش فاهمة حاجة حتي في الكورس بتاع المحاسبة مكنتش فاهمة و تهت في الشوارع بتاعت مكان الكورس و قعدت أبكي في الشارع زي العيال الصغيرة من ناحية أنا كنت مرهقة و تعبانة و من ناحية مكنتش فاهمة حاجة و حرفيا أول يوم ما كان يعلم بيه إلا ربنا عدت الأيام و أنا كل فترة و التانية يجيني هاجس إني هفشل و أن الكلية دي فيها حاجة غلط في صوت جوايا بيقول أنا مش عايزة الكلية دي أنا مش حابها أنا مش بفهم موادها لكن أنا كنت بقول يمكن افهم أشد حيلي و أركز يمكن أفهم صليت أستخارة و توكلت على الله و قلت يارب و بالفعل في مواد بدأت أفهمها واحدة واحدة لكن برضو كل فترة و التانية أحس بضيق في نفسي و كل فترة أفكر في كلية ليها علاقة بالتاريخ لأنه كان مادتي المفضلة سواء عاد آداب أو تربية لكن كل مرة يجيني تفكير ( طب و أهلك اللي تعبوا هضيعي تعبهم كده بكل بساطة و الفلوس اللي ادفعت ) و على دا الحال مع إن أمي والله و ربنا يشهد على كلامي لما كنت بقولها إني خايفة أفشل أو أسقط كانت تقولي و إيه يعني ذاكري و عملي اللي عليكي و النتيجة على ربنا كانت تقولي يعني هنعدموكي لو سقطتي و انا والله عارفة إن كاتبه ربنا هوا الخير بس خايفة و الله خايفة و متلخبطة مش متقبلة الكلية و مش حاسة إني بحبها و في نفس الوقت خايفة لو درست الحاجة اللي أنا بحبها ميكونش ليها مستقبل أسفة إني طولت لكن أنا تعبانة و مخنوقة وكنت عايزة أفضض لحد و يسمعني وبس لو وصلت لحد هنا ف شكرا جزيلا أنك قريت رسالتي و لو عندك حل لمشكلتي أو نصيحة اتمني متبخلش عليا دمتم سالمين و السلام عليكم

0

10