يا جماعة، أنا كنت قلت إني همسح التطبيق ومش هنزله تاني، بس حصل موضوع من شوية ومش عارفة أحكيه لمين، وخايفة أتكلم فيه يكبر أو يتفهم غلط. باختصار، لقيت على إنستجرام حد ضايفني في جروب، أغلب اللي فيه مش مصريين، وفيه محامين وبنت عراقية، وأنا وصاحبة ليا من أيام إعدادي. استغربت جدًا، وفضلوا يتصلوا عليا كتير. وأنا بحاول أفهم في إيه، لقيتهم منزلين صورة بطاقة أخو صاحبتي، وقالوا إنه مطلوب، وكاتبين كل تفاصيله حرفيًا: عنوان البيت، الجيران… كل حاجة حاولت افهم فيها . ولقيت البنت العراقية دخلتى برايفت وقالتلي إن كان بينهم علاقة حب. أنا اتصدمت بصراحة، لأنهم ناس ملتزمة ومحترمة جدًا، وكمان عرفت إنه سافر لها كذا مرة. هي بتدرس في دبي وبتحاول تبني نفسها هناك. المهم، اللي فهمته إنهم كانوا شغالين في موضوع تداول ونصبوا على ناس كتير. وهي دلوقتي عايزة توصل له بأي طريقة، لأنه معاه صور وفيديوهات ليها. وبعتتلي سكرينات للشات، واتأكدت إنها مش فيك. كلمت أخته اللى هى صاحبتى ، قالتلي إنها حاولت معاه كتير بس مش في إيديهم حاجة. الموضوع مأثر فيا جدًا، ومش عارفة أعمل إيه. كلمت البنت على إنستجرام وقعدنا نتكلم أكتر من ساعتين. أنا محتارة بين إني أعمل بلوك وأبعد، أو أتصرف إزاي. حتى فصلت النت علشان أنام، لأني المفروض أصحى بدري أذاكر، بس لا عرفت أنام ولا ذاكرت من كتر التفكير. متلخبطة ومصدومة في صاحبتي وأهلها، وفي نفس الوقت البنت التانية صعبانة عليا. مش عارفة أعمل إيه… لو حد عنده رأي أو نصيحة ياريت يقولي.

3

11