أنا ماحققتش حاجه في حياتي لعند دلوقتي ولا اخدت حاجه انا عاوزاها، كان نفسي أوي في صيدلة بس مجبتهاش وقدمت خاص وماتقبلتش في جامعتين، ولما خلاص بقا دخلت تربية عام عشان معنديش حل تاني قولت هدخل قسم انجليزي ومجاليش عشان وقف معايا على درجتين قولت هقدم كريديت كل الاقسام كانت متاحه ماعدا الانجليزي ف جالي قسم عربي وخلاص وبجد الكلية دي عمري مافكرت فيها وكان من المستحيلات ادخلها لاني مابحبش المدرسة ولا المدرسين ولا هعرف اتعامل مع طلاب ولا ليا خلق للشرح انا مش مؤهلة ابدا ابدا اني ابقا مُعلمه ولا شايفه نفسي في حاجه زي دي خالص، كان نفسي اوي ادخل كلية طبية، عامةً انا زعلت اووي اوي بجد وكنت بعيط ولسه بعيط كل يوم على نفس السبب وبجد خايفه ربنا يعاقبني او كده عشان مش راضية بقضاءه، بس أعمل ايه؟ انا في مكان مش شبهي ولا ناس شبهي ولا عارفه اعيش ايام الجامعه اللي هي المفروض احسن ايام حياتي مش قادرة اذاكر مش قادره افتح كتاب وابص بجد مش قادرة، وبعيط اوي على نفسي لما اشوف كل صحابي داخلين خاص اللي يستاهل وميستاهلش، هي كلها ارزاق بس ليه انا كده اتقفلت في وشي؟؟ استغفرالله يارب سامحني بس والله غصب عني وبجد شعور صعب أوي لما تشوف الناس بتحقق وبتعيش احلامك اللي انت كنت بتتمنى تعيشها،والمشكله محدش من اهلي ولا اللي حواليا شايف الوضع صعب ازاي عليا وعلى مشاعري! انا كل يوم بعدي من قدام كلية احلامي وبحس اني بتحطم اصل محدش فاهم كان نفسي فيها ازاي وكنت مخططه لحياتي على الكلية دي ومظبطه كل حاجه وفجأه كل دا في الارض!! اهلي مش مدركين موضوع الكلية اللي انا فيها دي وازاي مش قادرة اتقبلها ومستنيين مني اطلع من الاوائل عشان عارفين اني شاطرة وان دي كلية تافهه وسهله خالص يعني!، عامةً يا جماعه عرفت خلاص ان مفيش مفر من اللي انا فيه وبدعي ربنا يعوضني عن كل دا، و قررت خلاص اني اتقبل الوضع واذاكر لان الفاينال بعد اسبوعين خلاص وانا سنة اولى، ف ان شاءلله هلحق صح؟؟ انا بقولكم كده عشان تدعولي اجيب تقدير حلو واطلع من الاوائل عشان ابقا معيده لان دا الحل الوحيد اللي ممكن اتقبل الكلية بسببه بجد، ادعولي ربنا يحببني في الكلية دي واعيش ايام زي باقي الناس بدل مانا بنزل غصب عني ومش طايقاها ولا طايقه حد فيها، بجد صعب عليا اوي اني ابقا مُعلمه بجد صعب، ف ادعولي بالله عليكم وان شاءلله واثقه في ربنا هيعوضني المرة دي ويكرمني، اصل مش معقولة هفضل عايشه في دوامة الاكتئاب والاحساس بالفشل وجلد الذات دا، ومش هفضل اعيط كده عشان مش راضية، ادعولي رينا يراضيني ويرضيني❤. ️‍🩹

1

2