بحس ان الناس مبقتش تعرف تحب بعض زى زمان وان معنى الكلمة دى مبقاش موجود أصلا.. إتبدلت بفكرة التعود او سد خانة.. كل شئ بقى عملى اوى وسطحى وبعدنا عن الغرض الأساسي من إختيار شخص معين دونا عن غيره نكمل حياتنا معاه.. اعتقد مفيش أجمل من ان يكون ف حياتك رفيق لروحك مش مجرد شخص بتكمل به الشكل الإجتماعى.. حد يكون ف صورة رحمة من ربنا بيك يكون سترك ودوا لجرحك يفهمك من نظرة عينك يفهمك أكتر من نفسك يستوعب تقلباتك واللغبطة الى جواك ويبدد خوفك.. حد تعرف تتكلم معاه وتسكت معاه لما الدنيا تضلم اوى ف عينك يسحبك لنوره.. تتلغبطوا ف بعض كأنك هو وكأنه انت ملامحكم تبهت ع بعض وطباعكم و طريقة كلامكم .. حد معاه تحس انك ملكت الدنيا هتحتاج ايه أكتر من وجوده م هو كل الناس.. هو جمهورك وديرتك وعزوتك وسندك واصحابك كلهم وعكازك لما تكبر.. حد مكانش ينفع تبقى مع غيره ومع العشرة هتفهم انه كان مقدر لك من البداية..حاجة جواك كانت مصدقة انه موجود وانك هنقابله رغم انه اتأخر عليك اوى لدرجة انك ساعات بتفقد الأمل.. بس لما يجي هتفهم انه كان يستاهل كل لحظة إنتظار.. هيجيي بأكتر طريقة مش منطقية فأكتر وقت هتكون فاقد فيه الأمل يمكن ملامحه مش هتكون مألوفة ليك فالاول لكن هتألف روحه وكأنها كانت محوطاك طول الوقت.. قلبك هيكون عارف صاحبه.. مش سهل أبدا تعرف تعيش بالمشاعر دى ف الزمن دا وإنك تقاوم ضغط المجتمع وإختيارات مش شبهك ولابتكملك لمجرد انك تلحق تركب أى قطر حتى لو رايح عكس وجهتك .. بس انا مؤمنة ان ربنا الى بيضع المشاعر دى ف قلوبنا وان مفيش حاجة صدفة حقك تختار متتنازل تعيش المشاعر الى تستحقها مع حد قلبه مهيئ انه يحسهالك زى م انت يكون بيتمناك وعايزك زى م انت بكل تفاصيلك.. يكون سبب صلحك ع نفسك وع الدنيا من جديد.. حد لما الزمن يضيع ملامحك تفضل ف عنيه أجمل البشر افتكرت جملة كدا بتقول " يا حسرة من تزوج ولم يأنس ولم تذهب عنه وحدته ووحشته وغربته"

6

10