خسرت الباك ودرك راني في حالة سيئة

Question

سلام عليكم انا إنسان في عمري 18 خسرت الباك و درك راني نعاود فيه ولكن راني في حالة جد سيئة راني بعيد على الناس و على دارنا راني حاس بشعور ضياع و حلمي كان مرتبط بل باك راني حاس روحي متأخر أنصحوني ربي يحفظكم

Orange_79039 🇩🇿 · Accepted Answer

مكاش منها راكي متاخر مزال بزاف الوقت نتظم وقت او حافظ على صلاتك او ربي يوفقك ان شاء الله

Coffee_78989 🇩🇿 · Answer

مراكش متاخر و كاين لي جابو وراه في تخصص ماشي حابو وراه يعاود فلباك 
واصلا بعد لباك تفهم بلي كي تجيب لباك تبدا صعوبة لحياة

Chilli_76322 🇪🇬 · Answer

عليكم السلام ثانوية عامة أو الباك مش كل حاجه يعني يا اخوي مش نهايه العالم يعني الدنيا لسه قدامك والفشل مش انك تفشل الفشل في انك تبطل تحاول ايه يعني انك خسرت الباك عادي مره واثنين وثلاثه وعشره لحد ما تنجح وتتفوق هز الانسان الناجح في حياته كده مره واحده ولا نتيجه عده محاولات من الفشل والمحاولات المستمره طبعا انت اكيد سمعت عن توماس اديسون 999 مره ال 1000 نجح وغيره كتير باختصار يعني ربنا يوفقك وحاول ت

Chilli_76322 🇪🇬 · Answer

حاول مره ثانيه او حاول تتصاحب على ناس شاطره وتنظم وقتك وتشوف انت كنت غلطان في ايه وربنا يوفقك مفيش ضرر انك توقف بالعكس انت هتفشل لو وقفت هنا انت تكمل وتحاول مره ثانيه وربنا يوفقك

Nutella_78498 🇩🇿 · Answer

حبيبتي ما تعلقي حتى حاجة بسعادتك و ثانيا هذا باك ماهو هو إلا باب لتكملة مسيرة دراسية مش مسيرة حياتك اذا تحبي عاوديه عاوديه بأفضل إحتمالات أو توجهي إلى تكوين نفسك في مجال أخر تحبيه في نهاية راح تكتشفي أنو جامعة ماهي والو كاين عباد قراو تخصصات ماش حبينها و تخرجو في نهاية اكتشفو انهم ضيعو 5 سنين من حياتهم هادي فرصة ليك تحددي فيها أهدافك و ارجعي حطي خطة جديدة و راجعي أخطائك و اكتشفي ذاتك حرفيا واش حاب

Marshmallow_79018 🇩🇿 · Answer

لساتك عايش. لس عندك فرصة بطل تفكري سلبي. عشان ما حدا سال فيك. لازم انت تفكر بعيد عن باك او تجرب ثاني هي صعبة ومش مطلوب منك تعمل اكثر من طاقتك واكيد رح تاخذ مكتوبك لانوا الله حافض ليك نصيب تلاقيه بعيد عن باك او في باك. خويا عاودوا 4مرات وجابوا ب 11.متفقد امل. ما تبقى متامل غير فيه حوس على نصيبك في حاجة اخرى وربي يوفقك

Cookies_78860 🇩🇿 · Answer

ماراك متأخر والو مزال حال ورانا عاد فالبدية تع العام غير زير روحك شوية وصاي واذا راه عندك حلم تع تخصص ومعدل تاعه طالع زير روحك مليح وقرا لي دارو تخصص لي راك باغيه من قبل ماراهم فايتينك بوالو +كل تاخيرة فيها خيرة بالاك ربي كتبلك ماتربحش الباك خطرش كان غادي يصرالك حاجة مورا ماتربح ولا وربي يوفقك

Sugar_79010 🇩🇿 · Answer

حسب تجربتي الشخصية،  الباك وبالخصوص فبلادنا عندو تأثير كبيير على وش وراه، يعني المستقبل، سواء على حياتنا سواء على نفسيتنا وشخصيتنا. وش نقدر ننصحك أنو متتجاهلش نفسيتك وحاول تعالجها ومتضغطش على روحك وتقول اي تفوت. 
وش قصدت بيها مش انك تعيش دور الضحية صدقني أسوأ حاجة تقدر تدمرك هي دور الضحية وفالاخير تلقا بلي عشتو وحدك وخلاصت عليك مال وحدك وواحد مايقدر يعاونك.......

Sugar_79010 🇩🇿 · Answer

درك من الباك وروح تبدا تتأكد بلي مكان حتى واحد قادر يعاونك ولا كيما نقولو no one will came to save u.. عليها لازم تبدا تفهم روحك تحاول تعاونها بش تقدر هي تعاونك وتحقق وش حاب ان شاء الله. لي حبيت نوصل ليه انو حاليا اقرا متقولش مارانيش مليح صدقني الظروف عمرها مارايحة تولي مليحة لازم انت تتحدى كلش حتى نفسك احيانا ... بصح مش هادا لي حبيت نقولو دوكا........

Sugar_79010 🇩🇿 · Answer

حاليا وفحالتك ننصحك انك تقعد مع روحك تقول وش مقلقك كلش ... الباك مديتوش؟ انت اللول؟ لا .. بزاف قبلك ماداوهش ودوكا ؤاهم واصلين بعييييد بعيد ... وماجاتهمش غير فالباك جاتهم فحوايج بزاف ممكن حتى كل عام يعاودو وفاللخر وصلو وين حابين... صدقني الباك مش معيار للنجاح ......

Sugar_79010 🇩🇿 · Answer

وصح تصرالك صدمة بالاخص كي تكون متأكد انك راح تديه ولا رح تدي معدل معين... لكن مش هو النهاية ... ليك الباك هو اول صدمة تقدر توجع فالمسار الدراسي لانو يحددلك مستقبلك (تخصص، مهنة.... ) بصح صدقني راه والو بارابور وش راه يستناك ... صح كامل كنا نشوفوه حاجة كبيرة وهو يحددلنا حياتنا... ....

Sugar_79010 🇩🇿 · Answer

لكن كي تولي فالجامعة بإذن الله.. راه تكتشف انو الضياع لي كنت تحس بيه دوكا راه والو مقارنة بالضياع لي راح تحسو مستقبلا  عليها ارحم روحك وخفف على روحك الضغط لانو صدقني وعن تجربة جات فصحتي سرتو مين تكون انسان كتوم كيما راك تقول وجبدت على الناس كامل....

Sugar_79010 🇩🇿 · Answer

فارحم روحك وخفف ضغط ولاكان شفت بعد ما قعدت مع روحك وفهمتها انك ما ارتحتش وماقدرتش تتقبل.. ننصحك روح لمختص نفسي برك احكي معاه برك اتأكد بلي مليح (كاين ليڨروب فايسبوك ينصحوك حسب ولايتك).... ندمت اني مادرتش هاد الخطوة من قبل... لانو صدقني صدقني كي تكبر ولا  4 ،5  سنين تولي تلاحظ التأثير تع التراكمات تولي تقول يااااااليتني عالجتها بطريقة صحيحة... وبالاخص الصدمات لانو صح صح تأثيرها خاص......

Sugar_79010 🇩🇿 · Answer

وآخر حاجة ولي كانت لازم تكون أول حاجة .. يا أخي صلاتك في وقتها على وجه ربي .... الصلاة الصلاة ... عماد الدين، وش يربط بينك وبين ربي، هاديك الصلاة قادرة تخفف عليك الضغوطات اليومية، احكي لربي مستحيل مايوجهكش للطريق الصحيح، استشيرو في كل شي، احكيلو وش مقلقك، القرب من ربي هو لي ينجيك .. لاكان مش درك من بعد، لاكان من اليوم وراء أسبوع.. وهي رايحة... المهم ربي ديما معاك... و القرآن... ..

Sugar_79010 🇩🇿 · Answer

ما زاحم القرآن شيئا إلا باركه... معندكش الوقت اقرا آية ... البركة تع القرآن فنفسيتك وفوقتك مع الوقت تلاحظها.... وننصحك بالرياضة ... وبالوقت لي بعد صلاة الصبح.. الوقت هاداك مبارك جدااا.. أكيد مجربو و تفهمني...

Sugar_79010 🇩🇿 · Answer

وفالأخير نقلك ربي يوفقك ويسهلك وينجحك أخي ويوصلك وين حاب فيما يرضي الله ، ماديرش على الناس وعلى هدرتهم ... لا فرق بين عربي أو أعجمي إلا بالتقوى... واحد ماو خير من واحد ماعندك علاه تديرلهم حساب ولا ... عيش كيما حاب ودير وش تحب برك  ديما قول ربي او معاي ويشوف فيا هادا مكان. بالتوفيق

Durian_79006 🇩🇿 · Answer

إنشاء الله و شكرآ لك عطيتني من وقتك و نصحتني و أنا نقلك ربي يجازيك و ربي يوفقك في حياتك والله غير كنت محتاج لي يسمعني و ينصحني،ربي يحفظك إنشاء الله

Marshmallow_79058 🇩🇿 · Answer

كي تكبر تحس انو إعادة الباك مكان والو مجرد مشاعر مؤقتة مهيش مشكلة حقيقية فقط صوتك الداخلي يزيد عليك و لازم تكونترولي أفكارك تجاه نفسك اقتنع انها مجرد تجربة لتكون أفضل و الاهل تاعك اتذكرهم احكي معاهم كل يوم حتى يطلعلك في رأسك 😅

Lemon_78668 🇩🇿 · Answer

يا أخي أنا خرجت من الثانوية سنة2003 مستوى الثانية ثانوي كملت بالمراسلة في 2021 جوزت الباك جبتو 11.87 
ما عندي ما نزيدلك........لا تيأس 
العبادة و الرياضة يساعدونك في التخلص من السلببات