سنين من الانتظار

Pineapple_58909 🇪🇬

منذ شهر واحد

شعور وحيد

عبّر عن شعورك بشكل مجهول

9 سنين فاتو علي انتهاء علاقة 
حقيقي هي انتهت لاكن منتهتش جوايا 
9 سنين مكانتش كفايه اني اقدر اتخطي 
9 سنين بشغل بالي بمليون حاجه والف علاقه بدخل فيها عشان اتخطي 
وكل مره بكتشف اني لسه مش عارف اتخطي 
مش عارف انسي تفاصيل علاقتنا رغم ان عدي وقت كبير جداا 
نسيت حاجات كتير جداا في حياتي الا اني منستش اي تفصيله حتي لو صغيره من العلاقة بتاعتنا 
مبتروحش عن بالي لحظة حتي وانا مرتبط 
معرفش احب حد معرفتش ادي مشاعري لحد 
رغم ان اغلب العلاقات اللي دخلتها كنت الطرف الاقل حماس واقل حب والطرف التاني بيبقي هيعمل اي حاجه علشاني
وبرضو مقدرش ادي مشاعري لحد 
9 سنين عدو خلصت فيها مراحل عمريه كتير 
منها مرحله المدرسه والكلية 
اديني بدأت مرحلة تكوين نفسي الا اني مش عارف هكون نفسي ليه ولمين 
طول ال9 سنين بحاول مفكرش فيها لاكن مبعرفش 
الزعل والاكتئاب والتعب مع مرور الوقت دا كله كان بدأ يهدي 
بقيت عارف اتعايش مع يومي لاكن مش عارف اعدي يومي من غير ما تيجي في بالي 
قعدت اخر سنتين بحاول مدورش علي اي حاجه تفكرني بيها 
الا اني اليومين اللي فاتو دول كنت لسه ناهي علاقه كنت متفق فيها علي جواز ونهيتها لأني معرفش اتخيل واتصور نفسي فيها 
ف مجرد ما نهيت العلاقه وهي سببها الاول والاخير اني لسه بفكر في البنت الي علاقتنا خلصت من وانا لسه صغير طفل يعتبر 
ف ملقتش نفسي غير اني بدور علي الاكونت بتاعها وبما اننا كنا في مدرسه واحدة ولينا زمايل من ايام المدرسه ف مكنش صعب خالص ان الاكونت بتاعها يظهرلي لمجرد اني اكتب اسمها 
لاكن لقيت صورة البروفايل مختلفه مكانتش لوحدها وحد معاها 
اتصدمت وببص علي باقي صورها اكتشفت انها اتخطبت من شهر 
رجعلي نفس الاحساس اللي حسيت بيه يوم ما سبنا بعض 
من ساعتها وانا مش كويس 
مش قادر اتعايش مع يومي عادي من ساعتها 
كل يوم بفتح الاكونت وبتفرج علي صورها 
كل يوم بشوف صورهم سوا وبفكر ان لو كان انا 
حقيقي انا مش كويس حقيقي انا مش عارف اتخطاها 
معرفش يمكن عشان كنا صغيرين مشاعري نحيتها كانت صادقه 
معرفش اشمعني هي اللي مش عارف 
في ال9 سنين دول ارتبط كتير جدا مش فاكر تفاصيل اي علاقه فيهم ويمكن مش فاكر اغلب اسامي اللي ارتبط بيهم 
مش عارف ايه حل مشكلتي يمكن لأن ملهاش حل لأن كان زمانه نفع لأني جربت كل حاجه طول ال9 سنين دول 
بحبها ولسه بحبه وهفضل احبها واوقات بحب حبي ليها ومش عايزه ينتهي رغم انه مؤذي نفسيا 
عارف ومتأكد ان دي حياة وبتتعاش وزي ما اتخطبت وهتتجوز هخطب وهتجوز 
لاكن حقيقي هبقي بظلم اللي بتجوزهاا وبقول كدا من دلوقتي 
لأني هتجوزها وانا بتخيلها البنت اللي عيشت معاها طفولتي ومشاعري وحبي 
اغلب الوقت مش بيطلع من بالي اني لما هخلف ان شاء الله لو خلفت بنت هسميها علي اسمها بعدين افكر وايه ذنب اللي هتجوزها وانا مسمي بنتها علي اسم البنت اللي لسه بحبها 
مش عارف اعمل ايه الكلام دا مش بقوله مترتب 
شوية كلام حبيت اكتبه واقوله 
انا بحبها وبحبها جدا حتي وهي مخطوبه حتي وانا خلاص بقيت علي اقتناع انها هتتجوز ودي سنة الحياة 
هفضل احبها من بعيد من غير ما تعرف زي ما هي مش عارفه لحد دلوقتي 
بتمنالها حياة سعيده مع اللي معاه 
بتمني اكون معاها لما ربنا يفتكرنا ونروح عنده مش عارف ازي بس اهي امنيه 
حياتي من غيرها واقفه من 9 سنين

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Chocolate_64253 🇪🇬

عايزة أكون أحسن علشان متحسش إني قليلة لما أتخطب

انا لو شايفه نفسي مش حلوه اي الصفات اللي مفروض تكون فيا علشان فالمستقبل لما اتخطب محسش اني قليله طبعا الاخلاق رقم واحد ، غير كده ايه الصفات اللي الشباب بتحبها فالبنت غير شكلها ، انا بتكلم علشان يبقي عندي خلفيه فالمستقبل ... ...عرض المزيد

1 الدعم

26 نصيحة

Sugar_87672 🇪🇬

مش بعرف أكون صداقات حقيقية.. حد عنده نصايح؟

حاسة إني مش بعرف أكون صداقات أو علاقات اجتماعية حقيقية. بحاول أفتح نفسي للناس، لكن غالبًا بحس بالمسافة أو البرود، ومش عارفة إزاي أكوّن روابط تستمر. أغلب الصحاب اللي بعرفهم، علاقاتهم بتنتهي بعد فترة الدراسة أو الشغل، وبعدين كل واحد بيكمل حياته ومش بيكون موجود. ساعات بحس إني لو حاولت أتعرف على حد، هيتكرر نفس النمط، وده بيخليني أرجع أتمسّك بعزلتي. حد عنده نصائح أو مرة بتجارب زى كدة ...عرض المزيد

1 الدعم

19 نصيحة

Biscuit_87034 🇪🇬

مش عارفة اتخطى حب مراهقتي وبقيت حياتي واقفه

انا كنت بحب حد والحد ده سابني بقاله سنتين وعشر شهور انا مش عارفه اتخطاه خالص مش عارفه حاولت كتير اوي الموضوع تاعبني نفسيا اوي نفسي أنساه بجد بس مش عارفه المفروض أن ده كان حب مراهقه كنت صغيره اوي 17 سنه ولحد هذا الان بقيت 20 ومش عارفه يمكن عشان الوقت الي حبيته فيه كان في مشاكل كبيره اوي انا متربيه من صغري علي المشاكل والخوف بسبب ابويا لدرجه أن الي كنت بحبه ده كان حنين عليا فوق الوصف فعتبرته ساعتها بدل ابويا يعني كان هو مصدر امان بالنسبالي ومن بعد ما سابني وانا كل مشكله بتحصل معايا بفتكره هو اول واحد هو اول واحد بيجي في بالي بفتكر حنيته عليا تعبت من كتر التفكير فيه يوميا لازم افكر فيه قبل ما انام يوميا لو زعلانه بفتكره تلقائي كده بقيت حاسه أنه شاغل تفكيري كله هتقولولي اشغلي نفسك اقسم بالله بروح كليتي وارجع علي الشغل بخلص 10 بليل واول ما بحط دماغي علي المخده بفتكره بردو وبقعد أخلق مواقف حلوه وهميه بيني وبينه والحاجات دي مش موجوده اصلا بس مش عارفه الي بيحصل ساعات بقول ياريته كان معايا دلوقتي وساعات ببقي مش طايقه ابص في وشه كل ما اقول خلاص نسيته برجع افتكره تاني برغم أن مش بشوفه اصلا وعملاله بلوك من كل حته وكمان هو اصلا مش عايزني ولا انا عايزاه هو ارتبط ب 2 بعدي وعاش حياته انا حاسه حياتي واقفه عليه نفسيتي تعبانه اوي ...عرض المزيد

0 الدعم

18 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع