ايه اكتر حاجه وجعتك ؟

Question

الوجع ممكن يكون حاجات كتير وكل واحد فينا بيعيش وجع تفاصيله غير التاني . احكيلنا اية اكتر حاجة وجعتك في قصة حياتك

Chilli_55453 🇪🇬 · Answer

خطيبتي سابتني في اكتر وقت كنت محتاجها فيه جنبي وخصوصا اني كنت بمر بظروف صعبه اوي وحالتي النفسيه كانت في الأرض، انا مازلت مش عارف اتخطي الموضوع بس الحمد لله اني مكملتش حياتي مع حد زي ده، الله اعلم في المستقبل كان هيحصل ايه

Grape_55291 🇪🇬 · Answer

اعتقد اول مره احكي بس ان اديت فرصه لحد ايام الجامعه وبنت كانت مريحه بشكل و بريئه بس اتعقدت لاني اتوهمت ان من قصصها انها لويال وسابتني لما قربت اشيل السنه وموقفتش جمبي وفي الاخر عرفت ولد معانا ف نفس جامعه ونفس السنه وكان معروف انه بيكلم بنات كتير وبكل صراحه قالت انا استاهل فرصه تانيه مع شخص تاني وانا قولت مش هعرف ادي فرص بعد كدا ! عدم الوضوح وان الطرف تاني عاين استبن حاجه وحشه و موذيه لابعد حد هو وكلام الجارح

Mango_56606 🇪🇬 · Answer

انا كنت بحب واحد معايه في الشغل و كل يوم مع بعض فعلا و نروح نتكلم و كل ده مره واحد اختفي  و مبقاش موجود حتي الشغل مكنش بيجي و عملي بلوك من كل حاجه و بعدين فكه و كلمني و ظروف و كده و رجعنا تاني و هو بقا كان بيكلم واحد تانيه علياا و جه قالي بعدهاا بسنه علشان هيروح يخطبهاا و فضل يكلمني و يقولي انه بيحبني انا و انه مدبس بس طبعا ده اي كلم و و خطبهااا هي و انا اللي عدلت فيه كل حاجه بجد حسبي الله ونعم الوكيل فيه 
و انا شايفه كل التجهيزات و كل حاجه بجد مش مسامحه حسبي الله ونعم الوكيل فيه بجد

Banana_56622 🇪🇬 · Answer

لما ابويا مات...كانت الوحش حاجه حصلت في حياتي حسيت أن ضهري اتكسر، حسيت ساعتها اني عريان كان احساس صعب اوي كان اول مره انده عليه أقوله يا بابا وميردش عليا واحشني ابويا واحشني يوم الجمعة واحنا نازلين مع بعض نصلي واحشني المشواير اللي كنا بنخلصها مع بعض كل اسبوع 
دعواتكم له بالرحمة والمغفره

Pear_54544 🇪🇬 · Answer

يوم ١٥ / ١ / ٢٠٢٠ اتحبست ظلم في قضيه كبيره  وفضلت التحقيقات شغاله وانا محبوس وفي الاخر اخدت براءه وطلعت يوم ١٧ / ٢ / ٢٠٢١ 
وبعدها باقل من اسبوعين يوم ٢٨ / ٢ / ٢٠٢١ ابويا مات 😔💔
كان يا حبيبي عنده كانسر والمرض اكل جسمه واتشعب من الكبد للعضم وكان طول ما هو صاحي بيتوجع
مات وحسه اختفى من الدنيا وضهري اتكسر من بعده
كان مجرد وجوده في الدنيا امان حتى لو بعيد عني  
ارتاح و راح عند ربنا الاحن عليه من اي حد 
ومن وقتها وممكن اقول ان الفتره دي مسحت تفاصيل حياه قديمه وبناءا عليها اتبنت حياه تانيه ملهاش ملامح ولا طعم

وفي كل الاحوال الحمدلله راضي والله 
ومؤمن ان ربنا اقداره كلها خير 
و انه سبحانه مش هيحملني حاجه انا مقدرش على شيلها
وعلشان كده راضي ومطمن وسابها على الله في كل حاجه

فاللهم لك الحمد حتى ترضى ولك الحمد اذا رضيت ولك الحمد بعد الرضا ولك الحمد والشكر كما ينبغي لجلال وجهك وعظيم سلطانك 🤲

Coffee_56037 🇪🇬 · Answer

في حد كان في بيني وبينه علاقة كانت معقدة شوية لان خلافاتنا كانت كتير ويمكن كان بيزعل بسبب وبدون وعلى حجات تافهة ومكنتش كتير بقدر استحمل ده
جيت في اخر خلاف بنا بعد شهور قررت ابعتله رسالة على الواتس واعتذرله ويمكن كانت اول مرة اكون خايف اصالح حد خوفا من ردة الفعل لاني حبيت الشخص ده جدا 
كان كلمني عشان ننزل وانا كنت مستغرب انها جت منه
نزلنا واتكلمت وحكيت وهو كان يدوب بيسمع وكنت للحظات حسيت ولا اللي كأنه مجبر يقعد معايا وعملها كدا من عنده بس 
من بعدها بيرد عليا على قد الكلام ويقولي انه مش فاضي نتقابل واكتشف انه في date وبينزل عادي ومبسوط ومصدر ليا الوش الخشب
للحظات حسيت أدركت انه خلانا ننزل عشان يشوفني بس وانا بتكلم ويرضي غروره وانه شخصية توكسيك مش اكتر
كنت والله حتى بتصل اطمن عليه من 5 ايام كنسل عليا وللحظتنا مفكرش يعبرني خالص 
وطبعا هيمسك في حجة انه مشغول وبينسى والكلام ده
وانا فهمت اللي فيها اصلا
صعبان عليا نفسي جدا انه حتى لو كنت انا سبب في زعلك
بس ليه تعمل فيا كدا وانا جي اصالحك واقولك اني فعلا غلطت!!!!

Banana_57181 🇪🇬 · Answer

اتكرر اكتر من مره ان ييجو ناس يتقدمو ونقعد وتبقي الدنيا تمام وبلا أسباب حقيقيه يمشو ففوق وجع انك اتسابت في وجع العيون اللي باصه عليك وانت متساب والاصابع اللي بتشاور عليك وهم بيقولو بشفقه اسم الله عليها او بشامته او بأي كان،  وجع يخليك تسأل نفسك انا عملت ليه،  انا هونت ليه،  انا ليه ماكنتش في حسابه لما مشي،  ويتكرر نفس الموقف بنفس التفاصيل مع حد تاني فاكيد بقا العيب فيا فيضرب الوجع في اتنين

Watermelon_57331 🇪🇬 · Answer

إن ممكن اكون بفكر بخوف و زياده اهتمام للشخص الي قدامي سواء كنت اعرفه او لا و بعمل حساب ل مشارعه و أن كل الكلام أو الفعل الي اعمله مياذيهوش باي شكل من الأشكال بس مع ذلك كنت باذيهم او بيفهموا طريقتي دي ضعف أو حاجه غلط و مش بيقدروها ابدا و بقيت بعد ما بعمل الحاجه عشانهم لا طلعت انا الي غلط و وحش ف مش عارف اقدر اغير من طبعي ازاي لاني لو غيرت هبقي قاسي و صعب جدا ف التعامل

Blueberry_57373 🇪🇬 · Answer

وثقت في ناس بزيادة وبالمعنى الحرفي ادوني على قفايا مع إني كنت كويسة معاهم اوي واديتهم اكتر ما يستحقوا حرفياً ، ونسيت اهتم بنفسي وطاقتي واشتغل على نفسي بجد وركزت على الناس وكل حد جه خد من طاقتي لحد ما طاقتي خلصت مع ناس ميستحقوش.

Apple_57323 🇪🇬 · Answer

الخيانة اكتر حاجة بتوجع لما عرفت خيانة مراتي ليا مبقتش حاسس بالدنيا كلها في لحظة طلقتها في لحظة بيتي اتهد اللي بنيته 14 سنة في لحظة خلاص حياتي كلها اتشلقبت ومليش نفس في اي حاجة لعن الله الخيانة

Chilli_57773 🇪🇬 · Answer

انا محققتش اي حاجة كان نفسي احققها وحاسس دايما اني مقصر في حق نفسي كان نفسي اعمل حجات كتير اوي وابقي ناجح ولكن للاسف من فشل لفشل والمفروض انا الكبير واساعد اخواتي وعيلتي لكن للاسف مش عارف اساعد حتي نفسي

Mango_57850 🇪🇬 · Answer

ان انا حبيت شخص محبنيش 
و كنت بديله كل وقتي و حياتي بس ملقتش الحب الي حبيته للشخص دا رجع تاني 
و انا عارف ان علاقتنا صعبه أنها تحصل عشان قرايب و الي هيقول انت مجنون أن انت حبيت قريبتك ف القلب يذهب للشخص الذي يحبه بس مش عارف هل دا حب شخصيه و لا حب الي هو الحب الحقيقي 
مش عارف و انا بحاول انسي اهو بالرغم أن انا حاولت ابعد عنها كذا مره بس هيا كانت متمسكه بيا و مش عارف ابطل تفكير فيها و ان هيا ازاي لو اتجوزت حد تاني و هكون مطر اروح الفرح و دا احساس هيوجعني اوي 
و كمان مش قادر انسي لما صحبي او الي كنت مفكره صحبي خد رقمها و دخل كلمها و هيا كلمته عادي و لا اكنها كانت بتطعن خنجر في ظهري و لما كنت يكلمها و هو جمبي و شايف أن انا مبسوط و انا يكلمها كان بيقولي ان هيا عمرها ما تحبك و كان بيحاول يخليني ابعد عنها اتاريه عشان يفضاله الجو 
و انا كبير اهو بما فيه الكفايه و كده كده ناوي أن انا اسافر بره عشان اسيب كل حاجه ورايا بحلوها و مرها و بالرغم أن بعد الموقف دا قعدنا فتره كبيره منتكلمش و معرفش كانت فتره قد اي بس لقيتها هيا عرفها بالظبط و لا اكنها كانت بتحسب بس سامحتها و رجعنا نتكلم تاني و دي يعتبر اكتر غلطه ندمت عليها و تصرفتها كانت احيانا بتبين أنها بتحبني بس انا بنكر طول الوقت يعني كانت مبتحبنيش اكلم حد من قرايبنا و اهزر معاه غير معاها و كل شويه لما كنت بقولها إن السنه دي اخر سنه هنشوف بعض فيها فتقولي هنشوف بعض علي طول و بقولها احتمال كليتي تبقي في القاهره و تقولي خلاص ممكن كليتي تبقي في القاهره و هنخرج و لما كنا بنتخانق فتره طويله كانت بتسال عليا واحده قريبتي من دوري 
بس انا معرفش هل فعلا هيا بتحبني و لا لا  بس برغم كل دا انا مش هقدر اعترفلها عشان ممكن يكون كل دا عادي و لما اقولها كده و ترفض منتكلمش تاني 
بس انا متاكد ان هيجي اليوم الي هعترفلها بيه و نكون مع بعض ساعتها

Pistachio_29992 🇪🇬 · Answer

موت بابا و للاسف أتجهت للسجاير و الدخان مع صغر سني و أني ثانوية عامة وحشني جدا جدا جدا جدا جدا 
و لو كان موجود كنت افكر مليون مرة قبل ما أشرب اي حاجة و نفسي أجيب اي مجموع أنبسط بيه أدعولي ربنا يهديني و أجيب المجموع اللي نفسي فيه

Coffee_58305 🇪🇬 · Answer

اكثر حاجه وجعتني التعوض ، الاعتياد علي شخص في حياتي ان كان مكانتة ايه ، وفجاه يأثر معايا بدون اي مقدمات ، فجاه القي نفسي وحدي بعد التعوض ، توصل بيا الحاله اني بنهار من بعد الاشخاص واني قدمت كل حاجه عشان مش احس بالوحده احس بحد جنبي وفي الاخر ارجع لنقطه الصفر ...

Strawberry_58726 🇪🇬 · Answer

لما عدا العمر بيا واكتشفت ان عمر ما حد حبني بجد تم استغلالي لأبعد درجه والتقليل مني واذلالي وضربي وشتيمه وقله قيمه
اشتريته ودايما كان بايعني.
انا كنت عايزه اعيش حياه بسيطه طبيعيه هاديه بس والله مش بطلب حتى اي حاجه غير ان يتم تقديري واحترامي والتعامل معايا كبن ادمه مش حيوانه
منه لله

Marshmallow_57255 🇪🇬 · Answer

لما وثقت فى حد اوى و حكيت كل نقط ضعفى و الحاجات اللى بتوجعنى و بعدين اتعايرت بيها فى وسط كلامنا 
عمرى ما كنت اتخيل ان اقرب حد ليا فى حياتى تعمل كده يعنى انا كنت بفضلها على اى حد فى الدنيا لكن هى لما جات تختار مفكرتش للحظة تختارنى حسيت انى كنت ولا حاجة و انى هنت عليها عادى

Chocolate_59593 🇪🇬 · Answer

لما حبيت بجد والله وهو كان الشخص الغلط ونا كنت الشخص ال كل الناس تتمني انهم يعرفوني بجد بس هو خلاني واحده مبيهماش غبر نفسها وراحتها وشخصيتي الضعيفه المكسوره دي مبطتلعش غير ليا بليل ونا لوحدي بعاتب نفسي واعرف ان الي بعملو ده م صح بس هكمل لاني بالفعل جميله شكلا وده بكلام الناس وده ولا غرور ولا تكبر بس شخصيتي الضعيفه دايما بتشوفني  وحشه ف قررت اعمل شخصيه ليا مبنيه ع كلام الناس عني و اهو بقيت بكرفف م بدي فرصه لحد بتسلى جداا

Chocolate_60641 🇪🇬 · Answer

موت بابا بقالي ١٠ سنين مش عارفه لتخطي اللحظه دي ، خصوصا لما يحتاج حد اتكلم معاه بكل الي جوايا ، مفتقداه و اتعرضت بعد ما راح لربنا لمواقف صعبه كنت محتاجه وجوده حقيقي ، و اتعايرت بموته 
لحد اللحظه دي مش ناسيه

Avocado_64171 🇪🇬 · Answer

اكتر حاجه وجعتني الخذلان من اللي المفروض يكونو سند وضهر و الظلم من اللي شوفته من الناس القريبة والغريبة ومن قساوة قلب الماس والجحود اللي بقي باين اوي في عيون الناس  وغياب الضمير اللي بقي مش موجود

Ice Cream_66949 🇪🇬 · Answer

كنت ف عز نجاحي وعندي ورشتين نجاره موبيليات بابا تعب وانا الكبير اخواتي كلهم متجوزين بيجوا بولادهم البيت ماشاءالله خير ربنا يكون موجود كان معايا واحد وعشرين عامل بابا الله يرحمه كان عايزني اخطب واتجوز مكنتش بفكر خلاني اروح اشوف بنت دكتوره صيدلانيه بنت واحد صاحبه تلبيه لرغبته رحت بس مدخلتش رجعت قلت له شفتها معجبتنيش رجعت بعدها بكام اسبوع ناس كلموني ع بنت واحد جارنا وحد تاني وتالت جا كلمني قلت سبحان الله اكيد في نصيب ف الباب دا وآنا عمري ماشفتها اصلا قلت ابادر وتوكل ع الله كنت وقتها الموضوع بدأ يزيد عليا ف مصلحتي والبيت وكان من جمب دا شويه مشاكل ف ارض ملك الوالد اخويا الصغير كان خاطب كنا بنشطب مع بعض البيت مكنتش لسه قربت من شقتي وانا بطبيعتي بني آدم مسرف وغير منظم لكن كنت عايز حد ف حياتي ينظمها ويكون شريك ليا عموماً ف حياتي اتقدمت اتقبلت والناس رحبت كنت بتعامل معاهم ف بضاعه قلت اقطع المعامله واحد عندهم ال وصلني بيهم رفض وزاح كلم حمايا ان عيب اشتري من برا وكدا وانا مكتتش حابب كدا عشان عارف هيجي يوم وتحصل مشكله ودا طبيعي المصلحة متنفعش بين الأقارب والنسايب إلا ف حاله واحده ان حد يكون بطبعه متنازل ومتقبل اي كلمه او اي معامله م الآخر يكون واحد سهون كدا ولسانه معسول المهم من غير تفاصيل اخر فترة بدأوا يكلموا اهلي من ورايا ع الشقه وكدا وانا الدنيا كانت باظت معايا بسبب وفاه والدي والحمل ال من قبلها اصلا ف البيت وال هما ملهمش ذنب ولا علاقه بيه بس الحمدلله لاقلت لحد اديني ولا قلت لحد ساعدني ف عرضوا عليا اخواتي البنات ايامها بدون مايقولوا ليا ان نسايبي كلموهم اني ابيع الجزء بتاع البنات من ورثهم واخده اتجوز بيه واظبط مصلحتي من تاني رفضت لان دا ورثهم وانا مش عايزهم يبيعوا حاجة وتفضل حاجتهم زي ماهي تنفعهم مع الزمن وانت كدا كدا كنت محدد ع سنتين قلت فات سبع شهور اديني بجتهد ولو لقيت نفسي قبل الموعد بشهرين مش عارف اوصل لحاجة او مش قادر خلاص ابيع حته ارض واتجوز منها وكدا بحيث مخسرش حاجة هتنفعني ادام المهم ع الشهر تقريباً نص التاسع كدا ف الخطوبة كنا ف شهر سبعه يوم سبت جالي واحد صاحبي بيتعامل معايا قالي انت محتاج تلم دنيتك شويه هتقفل الورشة ال انت مأجرها وترجع للقديمه تحت بيتك زي ماهي وتشتغل وادي ياسيدي حق الشغل مقدم اشتري بضاعتك وكدا وال تحتاجه هديهولك واعرف انا مش بعمل معاك كدا جميلة بس انت لو مصلحتك وقفت مصلحتي هتقف احنا مربوطين ببعض فعلاً سمعت كلامه بدأت انقل ف حاجتي واجه. تخت البيت من تاني ع يوم الخميس الضهر لقيت واحد شغال مع نسايبي جاي يجري نعالى كلم الحاج عايزك الوقت اهو قلقت قلت اروحله خير ياحاج كان هو وابنه قالي انت الوقت عمال تبيع ف حاجتك ولسه مشتغلتش ف شقتك وبصراحه مش عارف اقولك ايه بص يابني بكره هبعتلك حاجتك وتبعتلها حاجتها وكل واحد يروح لحاله قلت طيب اديني فرصه لشهر 12ونعالى حاسبني قالي هتعمل إيه قلت مقدرش اقولك بس بإذن الله هتلاقيني اتقدمت قالي لا كدا بنضحك ع بعض ال بيوقع اليومين دول معتش بيقوم تاني وانت وقعت قلت ياحاج انا بعت حاجتي ال هقدر اعوضها مبعتش حاجة معتش اقدر اعوضها غير اني بيبيع ف حاجتي عشان ظروف بيتنا مش ف الهلس ولا انا مفضوح ولا حد جا عملي مشكله ادام بيتي انا محدش بيسمع عني حاجة الحمد لله ابنه تدخل وسكت والده واداني كلمتين قهروني لدرجة معتش قادر امسك دموعي قلت له يعني مفيش فرصه تستحملوني الكام شهر دول رد ابنه قالي كدا هنظلم البنت دي معاك تقعد جنبنا احسنلها قلت طيب سلام عليكم وال اصلا اصلا كنت بدأت ف بدايه الاسبوع شغل ف شقتي ونزلت فيها تكسير حرفياً مخلتش فيها حته سليمه عشان ابدأ شغل فيها بس كنت مستني يوم الجمعه عشان افرح خطيبتي بالخطوه دي هما ملهمش يحاسبوني طبعاً ولكن دا حقهم يطمنوا ع بنتهم وهما الناس نظرتهم فيا كدا هما حريين ودا عكس نظره اي حد الحمد لله المهم رحت البيت جري اول مافتحت الباب مبطلتش عياط طلعت البيت رنيت عليها اتفاجئت انها كانت عارفه ومتفقين مع بعض هي كمان عيطت وقالتلي هستناك وبتاع وكلام من دا وللعلم انا كنت ادينت لهم ف مبلغ بسيط والدنيا كانت لخبطت معايا بس كنت باخد ادفع الجديد واركن القديم وكدا زي المعامله الطبيعية ال ف السوق وال الحمد لله كدا كدا معاملتي كانت نضيفه ومعروفة مع اي تاجر ىلا عمري نصبت ولا عمري كلت حد ف مليم وللعلم بردو هما مكنش يلزمهم مني قرش صاغ هما ربنا كارمهم مادياً طب كان إيه المطلوب ف عريس بنتهم كان عايزين واحد من عيله كويسه ومستور حاجة بتكمل حاجة المهم انا اول مره ف حياتي اواجه احساس الرفض عمري ماحطيت مغسي ف موقف اني اترفض او حد يحرجني او يرفضلي طلب لاني عمري كدا كدا مابطلب من حد حاجة فكنت بقدر المستطاع. واكتر إني احط نفسي ف موقف إختيار بين ال آه و لا المهم دخلت اوضتي منزلتش بعدها غير ب تلت اسابيع حرفيا كنت بنام واقوم معيط شخصيتي ال ادام الناس اني قلبي جامد وميهمنيش عكسها تماما كنت ببان كدا بس ادام الناس عشان محدش يحس اني محتاج له او ضعيف او يقلق يسند عليا المهم لما قعدت قفلت ورشتي ورجعت الفلوس لصاحبي وخليت الناس تبطل شغل ف الشقه وللعلم كنت خلصت البيت سباكه محاره ودهان ورخام كله من جوا ف بدايه فتره الخطوبه قلت اسيب الشقه للآخر قعدت بقا بعت الدهب وفضلت كل اخر اسبوع انزل ابيع حاجة من حاجاتي بتاعه المصلحة بأقل من نص تمنها عشان اصرف مانا قاعد ف البيت بعد سنه لقيت امي فتحت عليا باب الاوضه ال شبه مكتتش بفارقها انت بقالك كدا 366يوم قاعد ف الاوضه بعدها كنت خلاص بعت كل حاجة ف مصلحتي وأجرتها لواحد عملها مخزن ف آول تلت شهور من الفركشه لقيت اخويا الصغير محتاج فلوس قلت والله دا رزقه قمت نازل بايع الارض الصغيره ومديله حقها كمل ال ناقصه وتمل فرحه ال كان نفسه فيه طب انا ايه ال قهرني كدا ال قهرني اني كنت بعامل حمايا زي والدي الله يرحمه وانه اصلا كان قبلها بأسبوع عمال يحكيلي عن معاناته زمان ويقوم ويقع ويكسب ويخسر وانه عصامي وياما وقع وكدا كان الله يزيح عنه تعبه احيانا يتكسف مني اقوله ياحاج انا بعمل اكتر من كدا مع الغريب مش هعملك انت؟لاني فعلا كنت بعزه اوي كلامه معايا واسلوبه واسلوب ابنه بالذات قهرني لاني عمري ماحد قلل مني كدا ولا اديت لحد فرصه يتجرأ عليا كدا بالادب وبشخصيتي غير اني كنت فعلا حبيت البنت ولقيت فيها انها هي ال هتخليني اتقدم فحياتي وابقا احسن واحسن كنت بحكيلها ع كل حاجة حرفياً انا عمري ف حياتي مانزلت دمعه ادام امي ولا ابويا دمعت ادامها هي مبينتش خنقتي ولا ضعفي لحد غيرها هي عدى ع الموضوع دا اربع سنين رجعت اشتغل بس كنت رجعت متأخر ومعتش زي الاول لسه يادوب بدأت افكر اني ارجع ابني مصلحتي كن تاني وانسى بقا موضوع الارتباط دا خالص