ثانوية عامة غيرت فيك ايه؟

Question

احكي تجربتك مع ثانويه عامه و يوم النتيجة و قولنا دخلتها عامل ازاي و طلعت منها عامل ازاي؟

Biscuit_50330 🇮🇹 · Answer

بصو احنا عندنا الموضوع مختلف حبه يعني كل حاجه غير عندكم يعني احنا عندنا تلت أقسام في ثانوي زاي ف مصر ف صنايع بيتقسم ل قسمين في أربع سنين و تشتغل و في خمس سنين و تشتغل بارضو بس هنا بيكون متاح ليك انك تدخل جامعه غير الاولاني لازم تاخد خمسه علشان دخل جامعه في بقى الثانوي زاي ما بتقولو عام بس احنا بقى كل واحد ف التلاته في تخصص يعني على حسب التخصص أو إنتي أو إنت بتحب أي الثانوي عندنا طويله غير عندكم تلاته و بدخل جامعه يعني حاجه ف الخفيف كده ب ما إني لسه ناقصني سنه لسه هعملها علشان أنا قررت إني اعمل رابعه و خمسه مع بعض علشان الأسف عيدت ألسنه ده موضوع تاني أنا كنت متكلمه عنو part لوحدو الثانوي غيرت فيا حاجات ممكن نقول اه يعني زاي ان احنا لازم نبقى عارفين احنا عايزين أي عشان نقدر نكمل في غير كده صعب اووي غيرت فيا بقى أي غيرت فيا إني مينفعش استسلم و إني لازم اعمل الحاجه دي علشان أوصل للي انا عايزه أنا اه هعيد رغم ان ماما قالتلي اعمل ربعه و اشتغل عادي بس أنا قولت لا معجبنيش الكلام الصراحه قولت لا أنا لازم اخروج من الثانوي اعمل المستاحيل علشان اخروج منها ب أي ثمن رغم إني تعبانه نفسيا بس قولت لنفسي أنا لازم اخلص الثانوي علشان كده كتير و أنا بطبعتي مش بحب اطول ف الحاجه علشان بزهق بسرعه و علمتني بارضو إني لازم اعرف اختار الصاحب الصح الي معاك على الحلوه و المره معاك على أي حاجه بس بارضو علمتي ان في بارضو في ناس بوشين و في الي مش بحبلك الخير في ناس كده فعلا ولله حته لو كنتي أو كنت عرفهم بقالك سنين كلو بيتغير اهم حاجه من كل ده انك متستسلمش أو متستسلميش ل أي حاجه حاولي مره وأنتين و تلاته لغايت ما توصل أو توصلي للي أنتي عايزه أو الي أنت عايزو لازم يكون في تحدي ف الموضوع و اه مش لازم ناخد الموضيع ببساطة علشان في مواضيع مش بتتاخد ببساطه دي رسالتي ليكم أنكم اعملو أي حاجه علشان توصلو للي انتو عايزين مهما كان التمن علشان تكونو راضين بل ناتيجه

Banana_55395 🇪🇬 · Answer

الثانوية عندي كانت من حوالي ٨ سنين 
عيشتها يعتبر لوحدي 
كان ديما اخواتي اللي اكبر مني لهم قصص ومواقف ولازم البيت يتهيأ لهم بكل التفاصيل وكل البيت متوتر لهم ومقلوب عشانهم انا كانت السنة عادية خالص عند البيت ولا في اي حاجة وكنت بتعامل مع كل الامور لوحدي واتضح ان حتى اللي اصغر مني كانوا كدا برده ومن وقتها بقيت بتعامل مع كل الامور لوحدي

Strawberry_55445 🇪🇬 · Answer

انا كان عندي لا مبالاة بالسنة ديه عجيبة
كنت بعاملها سنة زي اي سنة تانية و مش مديها حجمها عشان متخدش مني كتير 
ندمت شوية بعد كده بسبب اني كنت شاطر بس الحمد لله عوضت في حياتي الأكاديمية و كنت سوي نفسياً جدا في التعامل في الجامعة 
مش عارف ده صح ولا غلط لحد دلوقتي

Potato_55495 🇪🇬 · Answer

للاسف أُعجبت ببنت 
كنت بذاكر علشان لو بعتت علي جروب الدرس اجاوب عليها انا 
و ده اللي حصل فعلا سالت ع الجروب جاوبت بعتت برايفت علشان اشرحلها 
كنت بشوفها انسي هموم الدنيا و للاسف انا مشكتش فيها ل لحظة بس ليا ف الهاك و كان نفسي اقولها هي ايه بالنسبة ليا 
عملت هاك بسيط علي تليفونها لقيتها مرتبطة و كلامي معاها مكنش قليل و اكتشفت انها وخداني اني بشرحلها مع اني لما اختفي كانت بتسأل عليا بهستيرية يعني و من ساعات ما قطعت معاها مفتحتش كتاب و جيبت ٧٠ ف المية

Apple_56646 🇪🇬 · Answer

للأسف انا اتخرجت م الجامعه بس ثانوية عامة لحد دلوقتي مسببالي تروما ، كنت طالب متفوق و في ثانوية جبت مجموع وحش ،
وزني زاد ،
جالي كذا تعب مزمن ، 
كنت بحب بنت في الدروس و مبقيناش لبعض،
فيه أغاني علي الساوند كلاود بتفكرني بثانوية عامه و كنت بسمعها ف الثانوية لحد دلوقتي بترجعني بالزمن لورا و بكتئب في لحظتها ،
انا الحمدلله تمام بس لما بفتكر ثانوية بتبقى تجربه مؤلمة فشخ ..

Avocado_57179 🇪🇬 · Answer

انا مشكلتى انى مش عارفة اعدى منها ، انا حاربت كل اللى حواليا وضحيت بكل حاجة علشان اجيب مجموع كويس والنتيجة فشل ذريع ، انا 25 سنة ودخلت امتحانات تالتة ثانوى اربع مرات ودلوقتى باقى معايا تلات مواد وبيقولولى مليش دخول امتحانات تانى وانا بجد مش عارفة اتصرف ازاى انا عايزة اكمل دراستى بأى طريقة انا تعبت جدا جدا جدا علشان الخطوة دى وبرضه النتيجة صفر واقفة محلك سر مش عارفة اعمل ايه ياريت لو حد عنده حل يقوللى انا عندى امل لاخر لحظة انه يبقى فيه حل وانا مش هعرف اعيش حياتى طبيعى غير لما اخلص من الكابوس دا ، انا بحب الدراسة جدا ومعنديش اى استعداد انى اكمل حياتى فاشلة دراسياً وربنا يعلم ان اللى حصل كان غصب عنى وانى عملت كل اللى اقدر عليه علشان اكمل الخطوة دى

Coffee_52334 🇪🇬 · Answer

كل اللي أقدر أقوله إني اتحولت 180 درجة ومبقاش يفرقلي حاجة في الدنيا ولا دراسة ولا درجات ولا حتى مهتمة إن يبقى عندي صحاب 
أنا دخلت أكتر مجال بكرهه في حياتي حرفيًا عشان مفيش قدامي غيره للأسف وتقريبًا خلاص أول سنة خلصت فاضل فيها أيام ولحد إنهاردة مش قادرة أستوعب إني في المكان دا والمفروض أقضي فيه السنين الجاية... الحمدلله أنا أحسن من غيري كتير والمجال اللي بدرسه مش صعب وأنا مستوايا مش وحش فيه بس فكرة إن حلمي ضاع وكل تعبي راح وإن دعواتي وعياطي كل دا راح مش قادرة أتقبلها... أنا لسة لحد دلوقتي لما بصلي بنسى وأدعي نفس الدعاء اللي كنت بدعيه وقتها
اللي مصبرني إن دا إختيار ربنا وله حكمته في دا والحمدلله على كل حال

Apple_57874 🇪🇬 · Answer

انا طول عمري عندي لامبالا ف موضوع الدراسه  مش بعرف اذاكر حتى ف الثانويه العامه المشكله اني كنت مدرك انها سنه فاصله و ان لو معملتش اللي عليا هندم باقي عمري بس كان في لامبالا اني اذاكر لحد ما جيت ف للآخر و بدأت احترم نفسك ف المذاكره و ف الصلاه و فالاخر نجحت بالعافيه ف كل المواد و دخلت معهد خاص عدى 3 سنين ولحد دلوقتي مش عارف انسي اني عملت ف نفسي كده 
و دايما شايف ان الناس شيفاني اقل منهم رغم اني وانا بدرس شغال ف مجال تاني ملوش علاقة ب دراستي و و ناجح فيه جدا و بيتقال اني اشطر و أصغر واحد فيه بس مش عارف اشوف غير شخص الفاشل اللي فشل ف الثانويه العامه كان الحياه وقفت

Coffee_57918 🇪🇬 · Answer

ثانوية عامة كانت السنة اللي فاتت، للأسف كنت ممتازة وشاطرة موت لكن أهملت جداً في السنة دي ومذاكرتش، كنت ضامنة إني هعرف ألم زي كل مرة وأنها هيعدي، كان عندي ثقة زيادة وعايشة في الوهم، أهلي مقصروش معايا أبداً، ماما مكانتش بتخليني أرفع ورقة حتى من على الأرض، كل حاجة كانت متوفرالي كل حاجة حرفياً بس أنا ضيعت نفسي
أهلي، المدرسين، أي حد يعرفني حرفياً كان واثق إني هبقى من أوائل الجمهورية لأني فعلاً ذكية وشاطرة
ولكن بغبائي مذاكرتش وخيبت ظن كل الناس فيا وجبت مجموع زفت
أهلي مكانوش مصدقين، رد فعلهم كان عنيف جداً جداً وحقهم والله، أنا بموت كل يوم من الندم ومش عارفة أتخطى، حاسة الحياة وقفت يوم النتيجة والله
المدرسين بتوعي كمان مكانوش مصدقين إني جبت كده، كل الناس اللي يعرفوني، أي حد يعرفني حرفياً مكانش مصدق، ازاي أنا أجيب المجموع ده؟؟
أهلي دخلوني طب خاص، بس أنا نفسيتي زفت زفت ومنهارة بجد وحياتي حرفياً واقفة، مش ناقمة للنعمة والله الحمدلله ألف مرة بجد على اللي أنا فيه ، بس أنا تعبانة خالص والله ومش عارفة أتخطى وشايفة نفسي شخص فاشل ومهمل وأوحش حد في الدنيا والله، حتى أهلي معاملتهم ليا بقت وحشة بعد النتيجة، والله مش قادرة فعلاً استحمل كل ده ومفيش حد أتكلم معاه وكل ذكريات ثانوية عامة بتطاردني والله ونظرتي لنفسي القليلة دي مدمراني وحتى مش بعرف اقعد مع نفسي عشان دماغي مش بتبطل تفكير أبداً لدرجة والله بفضل أخبطها في الحيطة عشان ابطل تفكير
أولى جامعة خلاص بخلصها ولسه عند نفس النقطة، معرفش هفضل كده لغاية امتى بجد

Sugar_58083 🇺🇸 · Answer

اخيرا هقدر اتكلم في الموضوع دا 😭💔
ما علينا المهم، من وانا صغيره وانا معتمده علي نفسي، انا الكبيره ف اخواتي ف كان كل الاهتمام بيروح للي بعدي لدرجة اني حسيت ان الموضوع عادي ومش لازم يهتمو بيا (ملحوظه عندي فاينال كمان كام ساعه وقاعده بحكي في احزاني😭وربي معرف كلمه ف الماده ) نرجع تاني، معرفتش قيمة الاهتمام غير ف ٣ث او من قبلها بشوية كانو صحباتي دايما يحكولي ماما بتعمل معايا كذا وبابا بيعاملني كذا ف طبيعي ابدا ابص لحياتي والتعامل فيها بيكون ازاي، دا بعيدا عن اللي مريت بيه في حياتي عامة، نيجي بقي لموضوع ٣ ، صراحة كنت بادئة صح دروس بحضرها مزاكره بزاكرها ، مفيش مواد متراكمه مش بسيب فرض، علاقتي بربنا كويسه، مفيش علاقات محرمه و و و و.... الخ بقي. 
طبعا كنت متوقعه معامله تانيه من اهلي، ويكون في اهتمام بقي، لكن لا مفيش اي دعم معنوي نهائي ارجع من الدروس تعبانه وهلكانه مفيش عملتي اي حصل حاجه انهارده، في حاجه مضيقاكي، دا لدرجة ان ساعات كنت برجع هموت من الجوع وملاقيش ماما عملالي اكل، وفي نفس الوقت اخويا اللي بعدي ييجي من برا تكون مجهزاله الاكل والشاي وكل حاجه، كل تصرف نتج منهم كان بيأثر فيا جامد وكان بيشكل حاجه جديده في نفسيتي، لدرجة اني بدات ادور علي الاهتمام من مدرسيني، الحمد لله كنت متميزه دايما ومتفوقه، ومدرسيني كلهم عارفيني ودي كانت اكتر حاجه مشجعاني او بتخلي عندي ثقه بنفسي، ف وصلت لمرحلة اني بزاكر علشان المستر يقول عليا كذا لا ويشكر فيا ويتباها بيا قدام السنتر كله، ولو دا محصلش او اتباها او شكر ف حد تاني كنت بزعل جدا ونفسيتي بتتأثر اوي (السبب اللي ضيعني ف ثانويه اخيرا اعترفت بيه) جيت لحد نص السنه كدا قبل نهاية الترم الاول كنت ضايعه فيزيا حرفيا ضايعه واكتر ماده كنت بهتم بيها وازاكرها احياء في الوقت دا كنت انا وكذا حد من صحباتي المهم بدانا نغير السنتر والمستر اللي كنا بنحضر عندهم البيست فريند راحت عند اتنين مختلفين واتنين تانيين من صحباتي راحو عند مدرس تاني والكل اتفرق عند مدرس شكل وانا اختارت اني اخد اونلاين، الحمد لله الموضوع كان ماشي معايا فل وقدرت الم جزء كبير من اللي كان ضايع مني لدرجة كان المستر في الفصل الرابع وانا كنت لميت الاول والتاني ونص التالت وكمان يومين ولا حاجه هكون وصلت للرابع حرفيا مكونتش بنام، بس جينا بعدها اتجمعنا في سنتر تاني البيست سالتني عامله اي ف الفيزيا قولتلها كل اللي حصل بقي قالتلي بقي انا باخد درسين ومش عارفه المها وانتي بتاخدي اونلاين ولمتيها والحمد لله من بعدها وعينك متشوف الا النور فضلت اسبوع مفتحش فيزيا والمستر كان وصل للسادس وانا خلاص حرفيا ضعت حتي اللي لميته اتنسي اختارت اني انزل سنتر تاني بقي ونزلت وفضل الحال كما هو عليه ودخلت امتحان فيزيا ثانويه عامه بفصل اول وتاني وجزء بسيط من الحديثه 😂 تخيلو فيزيا ثانوية عامة انا قادره بالله بس الحمد لله عديت فيها وكنت خايفه لاشيلها بصراحه بس الحمد لله. 
هحكيلكم موقف تاني برضو عن اللي كانت البيست دي، كان علينا ف يوم شامل احياء المهم كان في باب الهرمونات مش مظبوط معايا اوي وفي الامتحان في سؤالين وقفو معايا من الباب دا ف راجعتهم معاها طلع واحد صح والتاني عدلته منها وقت النتيجه بقي انا جبت اعلي منها قالتلي بنفس النص كدا -يعني انا اغششك وتجيبي اعلي مني؟- اليوم دا كان الفيصل بيني وبينها وقررت اني اقطع معاها مع ان كان في مواقف زباله كتير قبلها بس كنت بعدي علشان بجد كنت بحبها اكتر من نفسي وبعتبرها زي اختي بالظبط، بس في المقابل عي كانت معتبراني عادي اه قريبه بس مش اللي هو انتي ، كدا يعني . 
ندخل بقي للترم التاني بدات اراكم كتير ومبقتش اروح سنتر الانجلش والدنيا كلها باظت معايا حتي الاحياء اللي كنت محافظه عليها من اول السنه جيت عند ال DNA, RNA وراكمت والدنيا باظت علي الاخر  ، جيت بقي علي اخر ٣ شهور قعدت من معظم الدروس او كلها وتابعت اونلاين، العربي كان ضايع من اول السنه الحمد لله لميته كويس اوي ف ال ٣ شهور دول وجبت فيه ٧٢ من ٨٠ والكيميا نفس النظام بالله كنت بقول هشيل كيميا طول السنه بس اخر ٣ شهور لميتها و جبت فيها ٥١ ازاي انا مش عارفه بس كرم  ربنا والله ، والمواد الباقيه بقيت بمشي الدنيا كدا والموضوع عدي بكل اللي مريت بيه في السنه دي واللي محدش يعرفه او حس بيه غيري واللي ربنا شاهد عليه واني جيت علي اخر شهر قولت مش عاوزه اجيب حاجه بس اخلص منها بالله نفس اللفظ كدا، نيجي بقي ليوم النتيجه بالله يوم يضحك 😂 كان يوم فرح بنت عمو كنا ف القاعه وانا عامة قاعده قلقانه عارفه ان النتيجه هتظهر ومكانش معايا داتا والله 😂 بفتح الداتا بالصدفه لقيت في نت والاقي واحده من صحباتي بعتتلي النتيجه والحمد لله مكانتش حلوه بس حمدت ربنا طبعا ورضيت، بابا لما عرف قال يلا نروح وكانو زي اللي ميتلهم ميت، هقول دلوقت اكتر حاجه جرحاني في حياتي ومش ممكن اتخطاها ابدا، لما روحنا احنا طلعنا وبابا كان بيركن العربيه كنت قعدت وهديت وبدات اشوف الدنيا طلع مسالنيش عن نتيجتي لا سالني عن نتيجة واحدة صحبتي (صحبتي دي كانت البيست بتاعتي في اعدادي و١,٢ كنت برتب اعلي منها جت هي ف ٣ طلعت الاولي ع المدرسه وانا مرتبتش،ف من يومها وبابا مش شايف غيرها) المهم كان مجموعي اعلي منها ف متكلمش وقال يلا نامي، حكمة ربنا لو بجد كانت جابت هي اعلي مني كانت هتبقي حياتي جحيم اكتر ما هي اصلا، معاملتهم ليا بقت وحشه اوي بقيت بحسهم بيكرهوني،ماما طول السنه كانت بتفضل تقولي لو مجيبتيش مجموع هعمل واخلي واسوي فيكي،حتي وقت الدراسه كانت ساعات بتخليني اساعدها كانت رافضه بتاتا اني معملش حاجه واجي مثلا اخد بريك او افصل وامسم الفون تزعقلي وتقولي بدل ما بتلعبي قومي ساعديني،وبابا يقولها هي اصلا مكانتش بتزاكر (اللي هو يجماعه انتو متعرفوش حاجه عني غير اني بنتكم،المواد بتاعتي مكانوش يعرفوها السناتر المدرسين مواعيد دروسي كل دا بالله مكامو يعرفو حاجه عنه،حتي الدعم مفيش غير الدعم المادي ) اهلي قصرو؟! اه قصرو من وجهة نظرهم هم صح ومقصروش في حاجه بس هم ميعرفوش غير الجانب المادي،انا حاليا كارهه حياتي بسببهم وبسبب تفكيرهم وعاداتهم وتقاليدهم (مش عاوزه ادخل في الجانب دا دلوقت خلينا نرجع للي حصل بعد النتيجه)مش هنكر اني كنت زعلانه بس حق ربنا منزلتش دمعه واحده لاني نفسيا كنت زعلانه لكن عقلي كان رافض يصدق دا وكان دايما بيبينلي اني تمام، لغاية ما النفسيه بينت الحقيقه وشي باظ وشعري باظ وجسمي باظ كل حاجه اتدهورت ، جه معاد الرغبات، انا الحمد لله طموحي مكانش طب بس كنت عاوزه علشان بابا واهلي وكدا، كنت حابة ادارة الاعمال من زمان اوي ودايما كان نفسي اني اكون بيزنيس وومان وكل اللي يعرفوني عارفين كدا الا اهلي سبحان الله،حتي لما جيت علشان اختار الكليه ماما قالتلي انسي الخاص مع ان نقدر عليه عادي، حرفيا اصحابي كلهم دخلو طب خاص اللي دخل صيدله واللي دخل اسنان واالي دخل بشري واللي دخل علوم صحيه و و و،بس باين كدا اني ف نظرهم مستحقش بس الحمد لله دخلت تجاره ولقيت قسم جديد فيها متخصص محاسبه وادارة اعمال بس ف دخلته مع انه مكانش في خطتي بس طبعا ترتيب ربنا (هبقي اتكلم عن الكليه بعدين ) 
الخلاصه اللي عاوزه اقولها، ان ثانويه عامة بالنسبالي كانت مدرسة الحياه عرفت نفسي كويس اوي وبنيت شخصيه كويسه اوي ومبقيتش اشوف غير نفسي اتأذيت اه اتأذيت بس نتيجة الأذي حاجه حلوه ف في النهاية حابه اقول الحمد لله ❤

Avocado_57638 🇪🇬 · Answer

ازيكم عاملين اي 
هحكي لكم علي قصتي في ثانويه عامه 
انا اكبر واحده ف اول واحده في البيت هكون ثانويه عامه مفيش سابق خبره ولل اي حاجه في البيت اقصد عشان انا الكبيره وكدا المهم انا كنت بحب الرياضه جدا وبحب الكومبيوتر والبرمجه جدا جدا ف حبيت اربط المجالين ببعض وادخل علمي رياضه وادخل كليه حاسبات ومعلومات او هندسه الكترونيات المهم حاجه ليها علاقه بالكومبيوتر والبرمجه وكدا بعد ما كتبت علمي رياضه خلاص بابا لما عرف زعقلي وخلاني احول علمي علوم كنت في البدايه ف مش هيأثر عليا دراسيا علي قد ما اثر عليا شخصيا كنت حابه الرياضة انا مش بحب الاحياء المهم دخلت علمي علوم وبابا قالي حاسبات برضو موجوده بس انا قولت هغير المجال وهدخل صيدله ومش لازم اربط الدراسه بمجال بحبه سهل اتعلمه من غير كليه خلاص سستمت نفسي علي صيدله لدرجه اني قولت حتي لو جبت مجموع طب مش هدخله وهدخل صيدله كنت طالبه ممتازه ودماغي حلوه جيت في فتره وقعت ولحقت نفسي وقومت من تاني وعادي بتحصل امتحان الفيزيا اللي كله طلع معيط منه انا طالعه عادي امتحان حلو مش وحش وحليت كويس في قولت يوم ما انقص هما كم درجة مش هوصل حتي ل 10 يعني اقل 
وهكذا في المواد يوم النتيجه 6/8/2024 الساعه 11 بالليل اسود تاريخ في حياتي نقطه سوده معلمه لدرجه وانا بحكيلكم حاسه اني هعيط بس ماسكه نفسي 💔
المهم جبت درجاتي ومجموعي الاقي نفسي جايبه 65%
الفيزيا اللي طالعه منها حلو جايبه النص الكيميا اللي حلوه جايبه النص الاحياء جبت 34 العربي كنت جايبه حاجه وستين الانجليزي نازله 3 درجات المفروض اقفله اصلا بس ماشي الفرنساوي ناقصه 7 او 6 مش فاكره وطبعا الفرنساوي دا يعني اتفه من الانجليزي بس ماشي برضو الجيولوجيا جايبه حاجه وخمسين اي تاني اعتقد كدا مفيش تاني حرفيا انا اتصدمت انا كنت برجع من كل امتحان اراجع انا ومامتي وقولت اي يعني هجيب في حدود 85% وانت طالع يعني مش هنزل عن 85% 
يعني متوقعتش نفسي حتي في السبعينات اقوم اجيب 65% دخلت اوضتي وقعدت اعيط جامد اوووووووي اووووي وبابا قالي قولي الحمدلله وقدر الله ماشاء فعل 
مكسرنيش مجموع قد ما كسرتني قهرة امي عليا وعياطها انا اتكسرت اليوم دا واوحش حاجه هتحس بيها لما حد من قرايبك يرن يشمت فيك عمتي اقسم بالله بتكلم امي اول ما سمعت المجموع صوتها دا كان مليان فرحه وشماته فيا قد اي لان بنتها كانت عادت السنه اصلا 
المهم بابا قالي هدخلك صيدله خاص وكدا وقفت معايا علي 1% يا حسرتي 🥲 قولت اي متقفله من كل ناحيه حتي الخاص يبقي هي مش من نصيبي كنت هدخل حاسبات ومعلومات خاص ليا عمتي واحده تانيه مدخله ابنها حاسبات ومعلومات اهليه قالت لامي اي حاولي مدخليهاش خاص عشان هي بنت ومصاريف وجهاز وبتاع وحوارات كدا لحد ما امي اقتنعت بكلامها وقالت لو هتدخلي خاص صيدله يا اما لا هتدخلي حكومي حسب التنسيق وخلاص 
عارفين بابا لما لقي مجموعي دا لو جبته وانا علمي رياضه كنت هدخل علوم او زراعة وندم بابا وقال ياريتني خلتها في رياضه عيط ساعتها قولت انا السبب المفروض كنت صممت علي قراري بس انا كنت مهزوزه برضو ما هي سنه مش سهله وبابا ضغط عليا ساعتها الحمدلله طبعا وقدر الله ماشاء فعل 
المهم قدمت في الرغبات ومكنتش حابه اكتب تربيه خالص وقعدت اعيط تربيه لا مش عايزه تربيه المهم شالوها وكدا جالي خدمه اجتماعيه بورسعيد قولت لا جيت اعمل تقليل اغتراب جتلي تربيه السويس مكنش قدامي غيرها جتلي تربيه اساسي دخلت قسم علوم 
عايزه اقولكم انا بحمد ربنا علي اختياره ليا دلوقتي انا داخله تانيه جامعه اتبقالي بس كم ماده كدا واخلص الفاينل دعواتكم ليا 
ومن حكمه ربنا ليا بقيت شغاله في اربع مجالات 
كمان 3 شهور هبدأ ادي درس علوم لاختي في رابعه ابتدائي هي وكم صاحبه ليها 
بلس مجال البرمجه باخد كورسات برمجه 
والمجال التالت وهو التحاليل اكتشفت ان قسم علوم اقدر بعد ما اخلص اروح احضر سنه مكثفه في كليه علوم واتخرج منها واعمل دبلومه وابقا دكتوره تحاليل وفي نفس الوقت انا اخدت منحه في محافظة غير محافظتي واتعرفت علي دكاتره ولما عملو المنحة دي في محافظتي كلمني دكتور من الدكاتره انزل معاهم وبقيت بشرح معاهم ولناس اكبر واصغر مني وفي قدي وكلهم بيقولولي يا دكتوره وبقيت بسحب عينات دم سواء وريديه او شريانيه او شعيريه واركب كالونه و اعمل تحاليل نوع الفصيله وعملتها لنفسي وناس كتير 
المجال الرابع دا لسه مبدأتش فيه وهو اني اشتغل بيزنس مع المدرسين الكبار في اني اعمل المنهج وكدا حاجه زي تسويق بس في مجال علوم 
بس ف بحمد ربنا علي انا في وعلى اختياره 
وبجد ثانويه عامه مش نهاية الطريق 
واوعي حد يتكسف يقول مجموعه اوعوا 
انا يوم النتيجه نزلت الحمدلله وكتبت مجموعه انل فخورة بيه اياً كان هو اي وفخورة بكليتي وعمر ما مجموع او كليه ترفع او تنزل من مستوي حد ابدا ابدا 
وبس كدا ❤😊

Chilli_57982 🇪🇬 · Answer

انا ثانوية عامة 2025 السنة دي يعني و امتحاناتي كمان يومين حرفيا بس ال مش مضافة اتمنى تدعولي يجماعه الخير و 40 غريب وير ار يو انا محتاجتلكم ادعولي تجربتي مع ثانوي متبقاش وحشة و ربنا يجبر بخاطري و يديني المجموع ال ف بالي و الكلية ال نفسيي فيها و ان شاء الله دعيلي له بالمثل في جبر و طيب الخاطر❤️❤️

Watermelon_60366 🇺🇸 · Answer

دخلتها شخص خرجت منها شخص تاني حرفيا . 
غيرت فيا وجهة نظري للي حواليا 
طريقه تفكيري 
حكمي ع الناس 
الثقه 
الوحده 
المعاناه 
الصراع بين النفس و ذاتها 
تجارب نفسيه بشعه و تأنيب النفس 
لا اتمني اني اعيدها تاني

Apple_60556 🇪🇬 · Answer

فاكر تفاصيلها، قلقها، مشاعرها، و حتى الضغط اللي كان ساعتها بالنسبالي حاجة صعبة... مكنتش مدرك ان بعدها هتغير التغير اللي اتغيرته بالشكل ده.... غيرت احساسي، مشاعري، تفكيري، حتى علاقتي باللي حواليا... كل حاجه تقريبا 
سنة كاملة تعبت و الظروف كانت ضدي بكل ما تحمله الكلمة من اهل بقا، مشاكل غيرهم، او نفسيا... كنت مستحمل و مصر على حلمي... و بعدين... فين حلمي؟؟ ضاع..... المجموع مش قليل لكن ف عيني كان قليل اللي كنت اقوله على مجموعي يقول ما شاءلله د انت كنت متفوق و دحيح والخ... و اكتفي بابتسامة كدابة تبين اني راضي بالنتيجة و باللي انا فيه..... انا مش مرتاح.. و مش قادر اطلب مساعدة... و عارف اني بضيع و ادي اول سنة تعدي بعد الثانوية و انا متغير في كل شيء 180 درجة حتى مستوايا الدراسي..... كل حاجه اتقلبت و الايام دي بداية امتحانت الثانويه و بتفكرني ب احساسي تاني و برجع لنفس الدوامة تاني

Orange_40211 🇲🇦 · Answer

ثانوية عامة غيرت فيا كل حاجة لا من ناحية نضرتي لناس والواقع وتوتر والخوف..كيف اعرف شنو مناب لي..كيف اختار تخصصي..تذخل الوالدين ؟ تكاليف ..المصاريف..وحتي والمشاكيل والخدلان..تعلمك تكون لوحدك وتعيش لوحدك ونتفرق عن ناس نحبهم وتعيش مع ناس ماتطيقهم وتعلمك كيف تصنع شغف دون حب..كيف تتعامل مع المواقف والرفض
..وهذا كان رحلتي فيها..

Apple_58349 🇪🇬 · Answer

بصو يريت ترفعو كلامى ده بحيث يبان لكله انا اكبر منكو وجبت كلية طب بشري هحاول الخصلك ثانويه عامه يخواتى سنه بوشين ياما هتبقى اسعد سنه عدت ف تاريخ حياتك ياما اسود سنه عدت ف تاريخ حياتك ودا على حسب مجموعك جبت عالى سنه سعيده وجميله جدا جبت مجموع منخفض سنه سودة هي اه مش محور الكون بس اهلينا الل عاملين كده واحنا للاسف منقدرش نعارض اجنا بيتصرف علينا فلازم نجيب اعلى مجموع بص يحبيبى مالاخر متبداهاش سنه حاميه ولا براحه خدها بهداوه ومتخافش بس كمل امشي بنظام كويس قليل داءم خير من كثير منقطع والقليل ده هيزيد تلقاءى مع الزمن اما من نحيه الشخصيه فلو جبت مجموع انا بتكلم عن نفسي جبت مجموع عالى انا ادتنى ثقه بالنفس رهيبه خاصه انا من النوع الل مش بختلط بالناس مش متوحد بس بحب اكون ف حالى وزياده الثقه هنا مش تكبر ابدااا لا بل تواضع ونظره الناس ليك هتتغير ومتقولش كلام الناس مبياثرش لت بياثر مع الزمن مش هتنسي وهتلاقى نفسك بتتاثر انت مش جدار انت بشر يحبيبى ولو مجبتش مجموع مش هتعرف توشي نفسك للناس وهيحصل انكسار او بقى لو انت بجح 😂وهتطلع تتعامل عادى وخليك ف حالك حتى صاحبك المقرب ابعد عنه السنه دى السنه دى فيها كمية ناس خبثه ربنا يبعدهم عنك وخليك مع ربنا وبس كده

Sugar_65376 🇪🇬 · Answer

ثانوية عامه هي نقطه تحول شخصيتي بقيت بحبط اسرع من اي وقت فات وحزينة من وقتها مش عارفه اننا في من ٢٠١٨ لحد دلوقتي مش قادرة ولا عارفة اتعافي كان نفسي ادخل الكليه اللي نفسي فيها اوي من وانا صغيرة بجد انا من وقتها معرفتش اخرج نفسي من الحزن بطريقه صح

Avocado_51313 🇪🇬 · Answer

انا ثانويه عامه 2025 و النتيجه هتظهر كمان كام ساعه بجد السنه دي غيرت فيا حاجات كتير انا كنت في الاول بشوف ان كل صحابي اللي حوليا طيبين و كدا بس عرفت ان هما مش بيحبو الخير لحد و بيحقدو علي اي حد بيذاكر هنا بصراحه مش كلهم كدا 
كنت مصاحبه واحده هي جارتي و كانت قريبه مني اوي و احنا صحاب من الحضانه المهم ان هي استغلت ان انا لمًا حد يزعل مني او يحصل حاجه نفسيتي بتتعب و مش بعرف اذاكر خالص و بدأت تلعب علي الحته دي خاصمتني علي حاجه تافهه جدا 😔بس انا ما صلحتهاش لانها مكنتش اول مره تعملها السنادي و لغاية دلوقتي و هي مش بتكلمني 
انا دلوقت مش سهل خالص اني اثق في حد او اصاحب حد بسبب كذا حاجه حصلت السنادي لقيت ان الدنيا صعبه 
اكتر سنه بجد تعبت و اتمرمطت فيها 
بدعي ربنا دلوقتي ان هو يديني علي قد تعبي اللي تعبته طول السنه و ميشمتش حد فيا و يفرح اهلي و اتمني ان انتو كمان تدعولي اجيب المجموع اللي انا عاوزاه

Carrot_84135 🇪🇬 · Answer

هل الثانوية مجرد بس مجموع؟ لاه مطلعش زي ما كنت مفكره وجالي حاجه اصلا مش من مفضلاتي ولا عارفه هعمل بيها ايه بعدين ولا هتفيدني في ايه اصلا 
جماعه انا بجد تايه في حوار الكليه دا، مع ان صحابي كلهم مخططين يعملوا ايه ولا ايه 
وانا والله معرفش اي حاجه غير المةاد اللي بدرسها،، مع العلم كليتي شريعة وقانون..

Cookies_30115 🇪🇬 · Answer

انا ف ثانوية عامة السنة دي علمي علوم و حابة اطلع اللي جوايا و اللي بقعد احكيه لشات جي بي تي و يقعد يديني نصايح مبعملش بيها و فالاخر الشات بمسحه ف الابلكيشن ده كنت محملاه من سنة تقريبا و اتكلمت فيه و اخويا مسحهولي ف حملته تاني لاني حسيت اني محتجاه عشان كنت مسموعه هنا اتمني ان اللي يقراء كلامي يدعيلي و ينصحني .
انا مبداتش دروس غير تقريبا ف شهر ٩ الاحياء اشتريت اول فصل اون لاين و طلعت مصيف ف فاتني و اتراكم محاضرات كتيرة و مكنتش فتحت ولا محاضرة لما رجعت نزلت فيزياء و عربي و انجليزي الفزياء هي المادة الوحيدة اللي كملت فيها مع المدرس لحد دلوقتي انما العربي نزلت لمدرس اختي كانت بتاخد معاه و مكملتش عشان هو بجد كان بيلخص الشرح كانه بيتكلم مع عباقرة مش عامل حساب ان ممكن طلاب ميعرفوش حاجة المهم سبته و الانجليزي الحصه كانت الساعه ٩ الصبح كنت بروح بلاقي القاعه اتملت و مفيش مكان قدام ف بقعد ورا و ببقا الصبح لسه صاحيه مش فايقه ف كنت بنعس و مش بركز و بزهق و مش فاهمة حاجة حرفيا و سبته بردو و المادتين دول لحد دلوقتي معرفش فيهم حاجة بجد خالص ممكن العربي شوية فتحت اونلاين اليومين اللي فاتوا سمعت ربع محاضرة و لحد دلوقتي مكملتهاش بس ف مكنتش بنزل ف شهر ١٠ ده غير الفزيا بس و ف نص ١١ نزلت اول حصه كيمياء كانوا ف بداية الباب التالت اصلا و ف نفس الاسبوع اللي نزلت فيه الكيمياء ده حصلي مشكلة وقفتني بجد يوم ٢٠٢٥/١١/١٩ كان يوم اربع انا مرتبطة ف اللي بكلمه ده اتقدملي مرتين اول مره خالص قبل ما نتكلم و نعرف بعض اصلا شافني فالشغل وقتها كنت ما بين اولي و تانية ثانوي  اعجب بيا و كلم صاحبة الشغل و هي طلعت لماما المصنع ده كان تحت البيت جمبنا المهم ماما قالت لسه لما تخلص تعليم قدامها سنتين ف صاحبة الشغل اقترحت عليا انا و هو اننا نتكلم لحد مثلا ما اخلص تانية ثانوي و طبعا ماما مكنتش تعرف المهم اخويا شافني و انا بكلمه فالبلكونه و مره تانية كان بيديني العيدية فالعيد و ماما كانت معايا و سبتها و روحت اخدها وسط الزحمة ف كانت شنطة كبيرة بوكس باين ف ايدي ف ماما استغربت و قالت ايه ده و جت منين قولتلها ع طول منه ف سحبت الفون مني ف وقتها و اخويا بردو قولتله ان هو كذا كذا و سحب الفون و مره تانيه اخويا كان واخد مني الفون بيعاقبني عشان هو مكنش عارف اللي حصل فالعيد و لما رجع يديني الفون جه بليل لقه الشات بتاعه مخفي و هو كان لاغي الحركة دي و انا معرفش ف عملتها بس ساب الفون اخر مره دي بقي اللي هي يوم ١٩ ده انا من اخر مره عرفوا قولتله نتكلم تليجرام و بلاش واتس ف قبل اليوم ده باسبوعين كدة رجعنا نتكلم واتس و انا اخويا بيشتغل بليل ف اول ما كان بيمشي بفتح الفون و ابعتله و لما بيجي الصبح بشيل الفون وومش بمسكه قدامه خالص عشان بابا قاله لو مشافنيش بذاكر اسحب الفون و هو كان بيستغرب ف كنت بقوله بروق و بعمل اللي ورايا مش فاضية امسكه ف المهم هو كان اجازة فاليوم اللي قبل ما يعرف اني بكلمه تاني اخويا كان تحت ف انا كلمته قبل ما يرجع من تحت و تاني يوم بقا سبت الشات و ممسحتوش مع اني بمسحه اول باول ف كنت لسه راجعه من الشغل مع ماما كنت بساعدها فالشغل بتاعها بعد الظهر مشرفة باص للمدرسة ساعة بظبط و برجع ف كنت قاعدة ع السرير انا و ابن اختي صغير و بنلعب بالفون و اخويا كان نايم ف هو صحي و عدي من قدام الاوضة روحت انا خبيت الفون راح رجع قالي شوفته قولتله ماشي ف قالي قومي اعمليلي ينسون و كنت قايمه قالي وريني الفون قولتله لا عشان خايفه و الشات موجود ف جريت ع ماما و قعد يضربني و قولت لماما مش هديهوله و تقولي ما انتي لو مش خايفه اديه المهم ماما خدته و قالت ولا انت ولا هي و كنت واثقه ف ماما و كان نفسي تبقي ف صفي بس لا هو بعدها بشوية اخده منها و هي نايمه و فتح شاف الشات ع طول كان عارف الباسورد و عامل بصمة و من قبل ما ارتبط اصلاا و قعد يضربني لولا عمتي فالشقه اللي قصدنا جت و خدتني عندها ساعدتني اكلمه و اعرفه اللي حصل و فضلت عندها نمت شويه و صحيت روحت ماما قعدت تزعقلي ع كان فالشات و ضربني هو مكنش فيه حاجة عيب و كان كلام عادي بس في حبيبي و حببتي و كده الفون بقا من ساعتها و هو متاخد شهر ١٢ و ١ و ٢ اهو بدا انا كان عليا تاني يوم فيزيا مروحتش و قعدت شهر ١٢ كله منزلتش درس الفزيا ده ولا كنت بذاكر لقيت الفون من وراهم و كنت بفتحه فالخباثه اكلمه اوقات اعرف و اوقات لا و ااه ع فكرة هو اتقدم تاني بعد العيد الكبير مامته جت و ماما كانت موافقه بس متردده من بابا و التعليم و قالوا بعد تالته نشوف و بابا قالي ركزي ف دراستك و اي حاجة ربنا يحلها بعدين المهم لحد دلوقتي بفتح الفون متاخر لما الكل ينام و اوقات بدري شوية لما ينزلوا عند بيت جدي بتصل بيه و ف مره شوفته صدفه فالشارع ف محل خاله هو شغله ف المنطقة اللي انا فيها انما بيته ف منطقة جمبنا قريبه مش بعيدة رجعت انزل الفزيا تاني نزلت حصتين و تالت حصه كنت تعبانه و نزلت الاسبوع اللي فات لقيت انه اجازة اسبوعين و كنت نزلت حصه احياء و مش عارفة اعمل ايه عاوزة اظبط نومي و مذكرتي و مش عاوزة اقصر معاه بردو لانه شخص مهم جدا ف حياتي بجد او اقرب حد ليا و معنديش صحاب قريبين ف بس بعيد شوية عن حياتي مفيش حد اللي هو ٢٤ ساعه مع بعض و محدش فالبيت فاهمني و كلهم بيحبطوني انا الاخت الرابعه و احنا ٦ تلاته اولاد و تلاته بنات اخواتي البنات اكبر اتنين ع طول مع بعض و يتريقوا عليا هتسقطي انتي فاشلة و يقعدوا يحددوا مستقبلي و كلامهم المستفز بس برد عليهم و اخويا اوقات يتريق معاهم و شوية يعمل انه بيحبني و فالاخر يقولوا عاوزين مصلحتك و بنكلمك ف مصلحتك لما اقولهم بطلوا و ملكوش دعوة حتي بقوا يخلوا الولادين اللي اصغر مني يتريقوا بردو تعبت بجد و انا اسفه ع الكلام الكتير ده ده لو حد قراء اصلا هيصدع و مش هيستحمل بس بجد تعبت و مش عارفة اعمل ايه المصدر الامان الوحيد بالنسبالي بعيد و مش عارفين نبقي جمب بعض و نساعد بعض اكتر و هو كان بيشجعني و بيدعمني بجد غيره .
يارب