درس علمته لك الحياه

Question

ايه هو الدرس اللي انت تعلمته في تجاربك مع الحياه وما فيش حد علمه لك وعايز تشاركه معانا؟

Pineapple_65871 🇪🇬 · Answer

الحياه بطبيعتها دورة يعني غير مستقره علي رتم واحد
الجميل في الموضوع بتاع عدم الاستقرار انه بيخليك متملش لان كل يوم في جديد. كمان كل يوم اسعي انك تتعلم درس جديد . الاهم من الدروس اللي هتعلم فيك انك تكون عارف وعايز انك تتعلم عشان تكبر وتعرف تاخد قرارات .. شوف عايز تكون مين متعلم ومتألم ولا متعلم بس.. اللي اقصده انك لو عامل حسابك انك اتخلقت عشان تتعلم مش هتتالم  .

Pineapple_59991 🇪🇬 · Answer

اوعي ثم اوعي ثم اوعي تثق ابدا
DON'T EVER TRUST 
عشان مهما كان و مهما اتقال و مهما كانت الوعود و الشغف و الصدق باين إلا إن ثقتك هتتخان لا محاله 
لا محااااله مهما كنت فاكر انه قريب و انه حلو و انه لا مستحيل ده يحصل

Mango_64794 🇪🇬 · Answer

متثقش في حد ثقة عمياء دايما توقع الوحش منهم عشان لو عملوا حاجة حلوه تنبسط ومتبقاش متوقعة بالنسبالك 
متجيش علي نفسك عشان حد محدش هيجي علي نفسه عشانك ولا حد هيقدر وقتك جمبه صدقني 
دايما ثق بالله ان في كل الابتلائات فيه حكمة من ربنا مفيش حاجة بتحصل عبثاً دايما درس هتتعلمه من كل حاجة بتحصلك حلوه او وحشة 
اهتم بنفسك وانزل جيم حتي لو مش هتنتظم 100 بس انزل اهم حاجة ال consistency  الاستمرارية هي الحل لكل حاجة بجد

البداية هي الاهم من كل حاجة مش لازم كل حاجة تبقي بيرفيكت هشان تبتدي لا ابتدي بس انت وتوكل علي الله واسعي متوقفش سعي 
ومتسيبش نفسك لدوامة الدنيا والفشل انا لما سبت نفسي بعد ما خلصت جيش واحبطت من اني مش لاقي شغل مع دوامة الحياة ومشاكل كتيرة تانية وتراكمات اكتئبت خدت وقتها خطوة الدكتور النفساني والله الخطوة ديه اكتر حاجة صح اعملها من سنين انت لو مش كويس فعلا روح واتعالج وخلي حياتك احسن انت هتعيشلك بتاع خمسين ستين سنة متبقاش عايشهم في معاناة ملهاش لازمة لا فوق لنفسك ودور علي نفسك واهتم بيها متستناش الاهتمام من حد خليك احسن نسخة من نفسك وقارن نفسك ب امبارح متقارنش نفسك بحد المقارنة هتبقي غير عادلة 
من احسن البودكاست اللي سمعتها كانت لدكتور بيعمل لايفات بجد من افضل الناس اللي سمعتها بيفهمك نفسك وبيوعيك الراجل ده ليه لايفات تحففففة لازم تسمعوها ليه فيديو اسمه الانسان اصله بصلة وازازة كولونيا

Lemon_66019 🇪🇬 · Answer

لما تلاقي البدايه سهله وبسيطه ومفيهاش تعب .متثقش بنسبه 100% .غالبا في خازوق منتظرك .

في مقوله عسكرية أنا مؤمن بها جدا .بتقول :
إذا كان الطريق هادئ وعلى مايرام فاعلم انه كمين !!

علم نفسك ياصديقي انه لا شيء سهل في هذه الحياه وعندما تجد شيء مغري وسهل تحسس مسدسك!!

Apple_57874 🇪🇬 · Answer

الدرس لللي اتعلمته اني لازم أقف ع رجلي لوحدي من غير مساعده حد و ان محدش هيقف جمبك مهمت كان مين كله يهمه مصلحته  و لازم ابقى قوى عشان تلاقي الاحترام و التقدير من كل الناس و متببنش مشاعرك او ضعفك لحد مهما كان مين

Strawberry_11964 🇪🇬 · Answer

إن لما لما تيجى ترفض حد ارفضه بوضوح ... ماتعتمدش على البلوك او انك تعمل Seen وماتردش ...

لا  أفهم  الشخص كويس ان ملناش فرصة خالص !

عشان يروح يشوف حياته ومايتعلقش بقشايه فى الحوار بتاعكوا "رحمةً بيه"ودا أتعلمته مؤخرا بعد ندم عظيم للأسف

لان حقيقى فى ناس بتفضل معلقة نفسها وحياتها سنين بأمل ضعيف

ودا كله لأن اسلوب الرفض ماكانش واضح كفايه ،مافيش حد يستاهل يعيش كدة
ف خلاص اتعلمت إني أكون  إنسانة واضحة  وارفض بوضوح ! 🫠🦆

Olive_66804 🇪🇬 · Answer

ان صحة جسمك ونفسيتك مرتبطين ببعض فمهما حصل ما تسبش نفسيتك للضياع لأنك هتكون فريسه سهله جدا للامراض ووقتها ماحدش هينفعك لا اللى اذوك ولا اللى ضايقوك هيعوضوك عن صحتك جسمك هو اللى باقيلك فماتظلموش عشان خاطر اى حد

Cherry_63750 🇪🇬 · Answer

ان ربنا الي بايده كل حاجه وانه  قريب مننا ديما وبيسمعنا ولطيف بينا ومالناش غيره هو بس وهو كفايه يغنينا عن اي حد حسبي الله ونعم الوكيل ودي مش دعوه علي حد دي دعوه لينا احنا ان ربنا يكون حسبنا ووكيلنا ديما

Ice Cream_66949 🇪🇬 · Answer

المتغطي بالأيام عريان.
كنت مأجر مكان كبير من واحد وكان عندي 21سنه ف كان جا عليا شهر ف شهر اقول بكره بعده طب بسلم الشغل طب اصل طب فصل عدى اسبوعين بعدها نده عليا وهو بيضحك قالي يابني الايام مفيش اسرع منها لما تدي معاد ادي لنفسك براح عشان محدش ضامن الظروف متدييش موعد غير لما تكون الحاجة ال بتتكلم فيها في يمينك وانت راجل عندك حاجتك وبضاعتك استحالة تقدر تمشي ولا تهرب مثلاً بدون مااحس ولا اعرف ف قالي الكلمه دي المتغطي بالأيام عريان قيس بقا ع كل حاجة ف حياتك الجملة دي

Strawberry_67003 🇪🇬 · Answer

انى مثقش فى الرجالة مهما كان بيعمل عشان اى ، فهوا دايما عايز منى حاجة معينة لو مديتهالوش هيمشي ومش هفرق معاه، كنت اعرف واحد بيقول أنه بيحبنى جدا بس كان عايزنى أتنازل عن كل حاجة انا عايزاه وبحبها عشان ارضيه ، مش مهم أنا عايزة اى ، المهم هوا عايز اى

Donut_55584 🇪🇬 · Answer

مبقاش كثيرة العطاء ،مبقاش همي اثبت اني شاطرة 
لا عادي مبقاش عارفة اعمل كل حاجة ، ماخدش اول خطوة وابادر و احب من ضلوعي علشان ابقى كدة بعوض اللي قدامي 
بلاش اكون شاطرة ، ممكن استسلم عادي ، بلاش اشغل قلبي باللي حواليا وانسى أن ليا احتياجات زيهم

Corn_67299 🇪🇬 · Answer

في لحظة ما، كنت دايمًا بستنى النصيحة. مستني حد يوجّهني، يقولي الصح من الغلط.
بس مع الوقت، ومع كل سقطة قومت بعدها لوحدي، فهمت حاجة:
مفيش حد هيحس بجسمي لما يتخبط، ولا بقلبى لما ينكسر.

الحياة علمتني إن أكبر الدروس مش بتيجي من الكلام،
تيجي من الوجع، من الخسارة، من الغلط اللي دفعت تمنه بنفسي.

اتعلمت إن الثقة مش للجميع، وإن الصمت ساعات أبلغ من ألف تبرير.
اتعلمت إنك لو ماحميت نفسك، محدش هيحميك.
وإن أجمل النجاحات بتتبني في عز الوحدة.

الدرس؟
ماحدش هيعلمك الحياة… الحياة هي اللي بتعلمك

Pistachio_67460 🇪🇬 · Answer

اللى اتعلمته انك ما تعملش مع الناس غير المطلوب منك فقط وكمان ساعات امتنع او اعتذر 
لإن مش كل الناس بتقدر اللى بتعمله زيادة علشانهم وممكن تتعاتب علشان بطلت تعمله 
يعنى اللى كنت بتعمله عن طيب خاطر حيبقى مع الوقت والناس الغلط حيبقى فرض عليك لو فى مرة واحدة بس تعبت او نسيت حتبقى مقصر وحينسوا كل اللى عملته قبل كدة

Potato_67324 🇪🇬 · Answer

متحبش حد اكتر من نفسك

اى ارتباط حرام

متربطتش بحد الا لو معاك فلوس و قادر تدخل البيت من بابه

العزله و الوحده اوقات كتيرررر احسن من اللمه الكدابه

ان التعب النفسي اشد مليون مره من اي تعب عضوى

القرب من ربنا بيتحسد جداااا عشان كده متحكيش علاقتك مع ربنا للناس

Orange_67310 🇪🇬 · Answer

لابد ان نشكر الظروف والاقدار لانها من الله 
مش لازم نحكم علي الامور او المواقف باني كنت غلطان او ان حد تاني كان غلطان ممكن نحاول نفهم مشكلتنا انا لي رديت الرد دا انا لي قولت كدا ممكن اكون بطلع وجع تاني في غير محله حلو التمست العزى لنفسك تعالي معايا كدا اعد علي الكرسي التاني ياااه بقي هوا مالو هل عنده سبب زي حلاتي اكيد عنده سبب عشان هوا انسان وعنده مشاعر وبيحس زيي بالظبت طيب نقطه ومن اول السطر نعزر بعضنا رحم الله كل هين لين مع الناس اصنع الخير في اهله وغير اهله حتي ولو بكلمه جبر خاطر   
#مش_ يمكن_خير

Apple_67714 🇪🇬 · Answer

حاول تبقي في حالك اطول فتره ممكنه
الاسرار والتفاصيل الصغيرة قبل الكبيره متبقاش عالمشاع لاي حد مهما كان
الصبر والمسايسه هم اهم اسلوبين تقدر تجاري حياتك بيهم لا تثق كل الثقه ولا تبالغ فالحرص

Tomato_65220 🇪🇬 · Answer

إنك مهما عملت حاجات كويسة للي حواليك لفترات طويلة كل ده هيتنسي بمجرد ما تعمل غلطة بسيطة ومش هيفتكروا غير الغلطة بس وهينسوا الحلو كله فـ الله المستعان والمشكلة إنك لازم تتأقلم وده شئ صعب التأقلم عليه جدا للأسف

Avocado_67297 🇪🇬 · Answer

ان لا امان لاي مان وان الى تحسبو موسي يطلع فرعون وعلمتنى ان لو عايز تعرف حقيقه الى قدامك اعكس كلامه وعملتنى ان الى بيقول انا وانا وانا ده ولا اي حاجه من التلاته واتعلمت ان مفيش شيطان بيبان اول مره انو شيطان وان الراجل اكتر كائن مؤذي ف الدنيا ❤️‍🩹

Almond_67947 🇪🇬 · Answer

لو مشيت صح هتتفاجئ من حرفياً كم المعجزات الي ربنا هيرزقك بيها و حب الناس الغير طبيعي الي هتلاقيه 
كرم ربنا أوسع بكتير من كل مره بحاول اتخيل فيها 
محدش بيمشي علي الرولز دي برغم أن كلنا عارفين ها
بحس أن كأننا ف امتحان و معانا الإجابات ف برشام و مكسلين بس ننقلها فورقه الاجابه و ده بالمناسبه اغبي تصرف ممكن مخلوق يعمله

Peanut_68412 🇪🇬 · Answer

انا كنت من النوع الشؤوم من صغري بعيد عن ربنا تمام و مارتبطش بديني غير الاسم بس الدنيا بقي علمتني يعني ايه ربنا و قد ايه هو قادر و حنين و بيحب عبده خرجني من اصعب ظروف حجات مكنتش اتوقع اني هقوم منها

Mango_34757 🇪🇬 · Answer

انا من صغري عموما بحب اساعد الي حواليا علي حساب نفسي يعني ابسط الي حواليا ومش انا مبسوطه ولا المهم بس لما لقيت ان انا الي بعمل معاهم كده حرفيا بيمسحوني من حياتهم بعد ما يتغيرو انا بقيت بقول نفسي بعد كده الاخرون بس عارفين انا بقول كده لنفسي بس مبعملش بكده مش عارفه بق ده غباء ولا اي بظبط

Durian_68265 🇪🇬 · Answer

انو مش لازم الحياه كلها تكون بتلف حواليا ومش لازم انا اللى ابدأ كل حاجه مش دايما اكون اما الشخص اللى بيدى وبيفتح كلام يقعد يسمع ويدى كل حاجه حقها ومن ابسط حقوقو انو يتسمع بس لما يجى يتكلم يستهزأو بيه ف نقدر نقول تعلمت انى اعرف احط لناس حدود ومين اسملعو ومين لأ واعرف وامتى لازم اتكلم وامتى لازم اسكت ومش لازم ان الخمسه سته دول اللى يكونو محور حياتى ولازم اعمل صحاب غيرهم 
وان حياتى متقوفش ع حد

Avocado_68588 🇪🇬 · Answer

أن ناس كتير هتنتقد شكلك و شخصيتك و حياتك و محدش يتمنى يشوفك ناجح بجد حتى اقرب حد ليك 
بس فى الحقيقه هما مش قادرين يكونو زيك 
كان ديما عندي كذا مشكله كنت تعبانه جدا فتره معينه تعب فى المعده و حسيت كتير جدا كان ناس كتير اوي تتنمر عليا ف انا اخدت قرار اغير دا و نزلت جيم بعد لما اتعالجت الحمدلله و وزني زاد من ٥٠ ل ٥٨ كيلو و ظبطت جسمي جدا الحمدلله
و كان عندي مشكله فى اللبس كنت من الناس المتبرجه و لكن لبس كويس بس كنت بجاهد نفسي كتير عشان البس كويس و البس بجد حجاب صحيح و الحمدلله بعد وفاه والدي اخدت القرار دا أنه بجد لازم اكون حاجه حلوه اوي و اسيب الحاجه اللى بحبها اوي و هو لبسي عشان ربنا و قد كان و الحمدلله بطلت البس بناطيل و بطلت أبين شعري بقالى ٣ شهور لما اخدت الخطوه دي شوفت غل من اقرب واحده ليا و معرفش ليه لحد دلوقتي و كلام كتير يهدك حقيقي و تنمر عشان بتحسن فى نفسك و صحتك و عشان بطلت تعمل الحاجه اللى تغضب ربنا عليك و اكتر كلمه سخيفه بنسمعها انتى استشيختي ولا ايه !
ف اللى حابه اقولو تغيرك  لحياتك هو عشانك انت عشان تكون شخص احسن و شخص اقوي و واثق في نفسه بجد عشانك انت 
اتعلم تكون احسن نسخه منك 💗

Grape_68873 🇪🇬 · Answer

اني مصدقش كل الناس ولا ادي الامان لكل حد قريب وان الواحدة تهتم بنفسها على قد ماقدر لان مفيش حد بيهتم بيكي اكتر من نفسك وكمان طاقتك متستهليكيهاش لحد ميستاهلش ومتديش فرص كتير ياريت من اول رساله من ربنا تبعدي عن أي أذى .. وتخلي بالك على نفسك بجد لان هي اللي تستاهل

Almond_69465 🇪🇬 · Answer

ان لما بنحب حد مش ضروري انه يبادلنا نفس درجة الحب، اننا بنحب حد اوي وبنعامله معاملة كده خاصة وبنكون متوقعين انه يحبنا زي ما بنحبه وبعدين بنتصدم انه بيحبنا بدرجة اقل، بنتوقع منه كتير ودايما بنتخذل، بيكون صعب نتقبل الحقيقة دي في الاول بس لما بندركها بنرتاح فعلا

Banana_69913 🇪🇬 · Answer

اى حاجه حاببها
 
١/ صلى ركعتين استخاره 
٢/ توكل على الله 
٣/ احسن الظن بالله 
٤/ خد بالاسباب 
٥/ ماتاخدش رأى حد من سنك او قريب من سنك

@يعنى مثلا انت ٢٠ سنه خد رأى حد عنده ٣٠ سنه 
@@وياسلام لو ملتزم وتحس انه راسى كدا مش لاسع 
@@@والأفضل يكون من نفس جنسك يعنى انت ولد خد رأى ولد مش بنت ماتفتحش أبواب للشيطان

٦/ حافظ ع الصلاة فى وقتها وجاهد نفسك 
٧/ بر الوالدين 
٨/ صله الارحام 
٩/ الصلاه ع النبى 
١٠/ الاستغفار

Pineapple_60236 🇪🇬 · Answer

اكتر درس اتعلمته من الحياة ان الحياة دي اصلا مش بجد
كل حاجة ممكن تحصل عادي وكل حاجة ممكن ما تحصلش عادي برضه، الإنسان بس بيكبر المواضيع أكتر من اللازم شويتين، بس في الحقيقة يعني مفيش حاجة ما بتعديش، فيبفى مفيش حاجة مستاهلة نحرق روحنا عشانها، دايما عادي كل حاجة عادي، بنفرح عادي وبنزعل عادي..
الدنيا لعبة كبيرة

Sugar_71135 🇪🇬 · Answer

موثقش في اي حد بسهوله واقول لا علي الحاجات اللي مش تريحني ادافع عن رأي ولو حد أنا مش اعجبو  ولا هو مريحني مش أتردد اني ابعدو لان راحتي نفسيه اهم من كل حاجه واني ديمٱ احب نفسي ومسمحش لي حد يشكك في ده واني استاهل علطول كل حاجه حلوه واني مبصش لي ناس ولا لي رأيهم  افرح نفسي بي حاجات بسيطه والبس اللي بحس وانا لبساه اني مرتاحه اضحك اهزر ابسط نفسي وأبقا انا مصدر سعادت نفسي وثقتي في نفسي وبس

Banana_69853 🇪🇬 · Answer

يا جماعه اللي وراه التزامات زاي دراسه أو بيتطور في شغله أو بيسعي أنه يفتح بيت او شايل بيتهم من مصاريف  كل دي حاجات جميله ياريت متتأثرش بلي حواليك 
و التليفون دا متخليهوش ياخد منك وقت كتير عشان دا اكبر لعنه في أيامنا دي و ربنا يوفق الجميع

Mango_77928 🇪🇬 · Answer

المواقف علمتني أعزز نفسي وماسمحش لحد يقلل مني ولا من مشاعري و ماقبلش بوضع مش مريحني ماقبلش أشخاص ف حياتي مش مرتاحالهم
الموضوع ف الاول كان بقسوة لكن مع الوقت قدرت اتحكم في انفعالات وسلوكي