عرفت تنساها او تنسيه

Question

ازاي قدرتي او قدرت تتخطى حد انت حبيته من قلبك وهل ان رجع او رجعت ندمان هتوافقوا انكم تكملوا في العلاقة ولا هتقولوا البعد احسن

Mango_70499 🇪🇬 · Answer

ممكن اه الواحد ينسا بس لو عدت كام سنه وفجأه فكرت في بيكون أسوأ حاجه بتحس افتكرت الوعود والأمان اللي الواحد خلاص اطمن مع الشخص ده بس الانشغال ده أهم شي في الحياه عشان نعرف نتخطي اي حاجه كانت بتوجعنا واكيد ده بيكون درس عشان نتعلم نفهم الناس علي حقيقتها ونختار بعد كده صح مش معنا اني خسرت حد وخلاص راح لحد تاني انت متعرفش الخير اصلا بيكون فين لما اتقابلنا ده بيكون نصيب اول وفي الاخر فا عشان كده دايما سواء بقي علاقه سواء اي لازم الواحد ينهي  اي حاجه لو مش هتكمل لازم تتقفل صح وناخد القرار الصح مش يكون في اهانه لبعض لأن احنا هنموت ليه نعمل في نفسنا كده فا دايما بقول أفضل صلي حتي لو بتقطع حاول وادعي الإنسان هو اللي يقدر يساعد نفسه بس محدش هيقدر ما كده كده ربنا عالم بكل واحد والله ربنا بيساعدنا بس لازم نصبر ولا نحاول عشان نرتاح واكيد مش هقول خلاص لا هقول هحاول واجرب ولازم افرح نفسي الحياه مش هتقف علي حاجه واحده حتي لو هنشوف حد تاني في حياتنا من حقنا نعيش ونفرح ونطمن ونتشجع مش مشكلة نفضل نحاول بس عوض ربنا كبير عشان كده لازم نحط تفائل حتي لو اي اللي هيحصل لازم نتفائل في حياتنا انا اتكسرت كتير وعايزه حد يكون معايا نحاول مع بعض في كل حاجه ونشجع بعض وحتي لو مفيش عادي الدنيا ماشيه هي دي الفكره احنا اللي نقدر محدش تاني هيقدر يساعدنا غير ربنا وبس بس احنا اي بقي نحاول عشان نلاقي الخير👌❤️❤️❤️❤️❤️❤️❤️

Onion_71041 🇪🇬 · Answer

ولا يوم نسيت 
دايماً فى بالى صورته صوته ضحكته و عينيه 
اتمنى لو يرجع هنسى اللى راح و هسامحه و نعيش من جديد 
يمكن مش احسن شخص ليا بس انا عايزاه هو و راضية بأي حاجة تانية 
واحشنى جداً و نفسى اكلمه و اسمع صوته 
ياترى لسه بيحبنى … بيفكر فيا … ولا نسى اللي كان 💔

Carrot_70235 🇪🇬 · Answer

عدي تقريبا ٦ سنين فاكر كل حاجه لسه مع اني ال سايبها بس ظهر كام ريد فلاج خلي عقلي هو اليغلب.. مشيتها الاكل البتحبه طريقه كلامها لبسها نظارتها... بس اما بسأل نفسي لو جت الفرصه هترجع.. بتكون دايما الاجابه مستحيل

Apple_70652 🇪🇬 · Answer

ياريت عرفت انساة ممكن قدرت اتعايش لكن عمري ما انسي الانسان الوحيد الكويس الي قابلته عمري ما انسي ان الشخص الي كنت بتمناة ضيعتة وانا مش دارية ربنا يعوضني يارب وانساة مش قادرة اتخطاة حاولت كتير

Cherry_70867 🇪🇬 · Answer

نسيت لما دخلت في علاقه جديده يارب حافظلي عليها بس اتعلمت اني حتي لو بموت ما اشتكي له لان الرجل ما بيحب الشكوه وبيجيب نفور هي صعبه يارب عني وحافظلي العلاقه ولا بلومه حتي لو ظلمني اعيط علي سجاتي وقول ياتي به الله يارب عنا وارضي عنا

Banana_71095 🇪🇬 · Answer

عمري ما هعرف انساها كانت حب حياتي مشيت واخدت عمري معاها الكلام يعتبر محن لبعض الناس بس لاسف دي الحقيقه...بس انا الي غلطان انا الي قصرت وانا الي جيت عليها وظلمتها معايا وهي مكنتش تستاهل كل ده

Blueberry_69403 🇪🇬 · Answer

اه عرفت مكنتش متخيله اجت متأخر فعلا بس الحمدلله معتش بحكي عنوا أو معتش بحكي زي الاول بس مع كل تروما كل حاجه كل خذلان حي لو من يوم وحش برجع اعيط و افتكرو أنا بعد خمس سنين نسيتوا شويه بس الفكره أنا معتش فكره ملمحوا معتش وانا نزله من البيت بهتم بنفسي عشان ممكن اشوفوا صدفه معتش في حاجات كتير اوي

Apple_71377 🇪🇬 · Answer

أدركت مؤخرا إن وجودها في حياتي وتعلقي بيها لأكثر من خمس سنين مكانش إبتلاء من ربنا بالعكس دا كان عقاب من ربنا لأني قبلت اتبع خطوات الشيطان و دخلت علاقة حرام وانا عارف انها فتنة والحمدلله استعنت بالله و أدركت إن أفضل جزء في قصتنا هو النهاية وربنا قادر يعافيني وينزع فتنتها من قلبي. الحمدلله

Carrot_71193 🇪🇬 · Answer

لا ماقدرش 
اتعرفنا علي بعض ف 2016 كنا ثانويه علاقتنا انتهت ف 2018 وعاش حياتي وانا معرفتش اتخطي كنت فاكره هيرجع ونتكلم من تاني لعند 2024 اتفاجأت انه وهيتجوز، هو اكيد مش غلطان  هو عادي كمل حياته وعايش دنيته ، بس مابفتكر هو ليه كنت غبية وموقفه حياتي كدا ومستنيه رجوعه، وعلي فكرة يعني دلوقتي اتجوز ولسه عندي برضه شعور انه هيرجع ومعرفش اي العبط اللي انا فيه دااا، ليه مش عارفه اتخطي ولا انسي ، دا حتي كان مابينا لعب عيال 💔

Banana_67660 🇪🇬 · Answer

انساها ازاي وهيا مالكه القلب والروح مهما عدي من وقت ومهما قابلت من ناس هيا وبس اللي ملكتني هو دا اسوء حاجه في الحب انك بعد الفارق تبقي عايش ومش عايش يلا مفيش حد بياخد الا اللي ربنا كاتبه
الحمد لله 💔

Pineapple_62201 🇪🇬 · Answer

كان في واحده في الشغل كنت معجب بيها وهي أجمل بنت أنا شفتها في حياتي .هي كانت بتكلمني كويس وخرجنا لوحدنا ثلاث مرات. استجمعت قوايا وقلت لها إني بحبها وهي قالت لي لأ بس خلينا ما نخسرش الصداقه اللي بينا. سالت الستات اقاربي وقالوا لي أنت تسرعت استنى شويه وبعدين قول لها وهي هتغير رأيها (نصيحه غلط). المهم، فضلنا نخرج لوحدينا وتكلمني في التليفون بالساعات. كان كل ما أحاول أقرب منها تبعدني وكل ما أحاول أبعد عنها تقربني. قالت لي أن سبب أن هي قريبة مني أن أنا شخص محترم وموثوق فيه وأن أنا بحل لها المواقف الصعبه (بصراحه ما خلتنيش ادفع فلوس عليها أبدا). لغايه لما جت في يوم واختفت وانا اتجننت حرفياً. اكتشفت ان هي تقدم لها واحد غني وقال لها هجيب لك عربيه لو اتجوزتك واتجوزته. واكتشفت ان كان في اثنين ثانيين غيري كانت بتعمل معاهم الموضوع ده واحد منهم كان أمور بعضلات والثاني كان معاه عربيه وكانت بتستغله في المشاوير. أنا ضيعت خمس سنين في علاقتنا على الفاضي وقعدت  سنتين على  ما عرفت انساها (إجمالي سبع سنين) وطبعا استحاله أقبل أنها ترجع لأنها خلاص معاها طفلين.

Avocado_71487 🇪🇬 · Answer

خاااالص 
بس عرفت ابعد شوية واتحكم في نفسي اكتر بدل ما كان يمشي و يرجع و يكرر كداللي بيضايقني لما جه المره داي افتكرت كل حاجة عملها ضايقتني كل كلمة كل تصرف وجعني كل وقت كان بعيد فيه و مكنش جمبي كل الحاجات دي كانت بتيجي في بالي فجأة لما كان يبعتلي و هي نفس الحاجات اللي بتخليني مردش عشان كرامتي اهم و اعز عندي ناهيك بقي عن اني اصلا بدأت اسأل نفسي سؤال تاني غير ليه؟ وهو هل كل ده كان حقيقي؟ولا انا اصلا متحبتش ومش هخبي عليكم بحس اني فعلا متحبتش و ده احساس بشع و يكسر خصوصا اني لا خدعته ولا لعبت بيه بالعكس كنت صادقة في مشاعري و اديته بدل الفرصة ٢و ٣ و٤ لحد ما خلص الرصيد و حتي لما بعتلي مهنش عليه يعمل مجهود في الكلام يقول حاجة تخليني حتي ارد 
تعبت ولسة تعبانة بس مش هعيد نفس الوجع ده تاني صعب قوي

مرة تانية ابقي احكيلكم القصة

Sugar_67031 🇪🇬 · Answer

انا اللي سايب بسبب الذنوب اللي بعملها معاها و لاسف لاسف مش عارف انساها و كل يوم بحس بتانيب الضمير انها بتحبني و بحاول انساها لاكن هي كل فترة لازم تعمل اي حاجه لمجرد تقولي انا هنا 
اخر مره كلمتني بعتت رسالة قالتلي فيها بحبك و رجعت عملت بلوك تاني عشان مقولهاش انسيني و ازعلها حاسيت في اليوم اللي كلمتني فيه ده اني عايز اقف قدام مكان شغلها لمجرد بس عيني تيجي في عنيها و امشي تاني لاكن لقيت نفسي هفتح باب انا بحاول اقفله بقالي 4شهور

Avocado_71541 🇪🇬 · Answer

بقالي سنتين ومش عارف وجربت كل الطرق اللي ممكن تتعمل ومش عارف اطلعها من دماغي مع انها خانتني والمفروض ان الادوار تكون متبدلة بس انا اللي طلعت متعلق جدا بيها ومش عارف اعمل ايه تاني ووصلت لمرحلة اني شايف ان ده ابتلاء من عند ربنا وهوا ابتلاني فيها وفي اني احبها القدر ده من الحب وكمان معرفش انساها

Cherry_55017 🇪🇬 · Answer

مش عرفه هقدر انساه ولا لا بس اللي متاكده منو اني لازم  اعمل كده صعب اوي لما تكوت مربت حياتك علي شخص انت حبيتو و مكنتش عايز اي حاجه غير انك تكون معاه بجد انا حبيتو و مش عرفه هعرف احب غيره ولا لا 
نفسي  كان يفهم ده

Apple_69931 🇪🇬 · Answer

اولا في حاجات ولحظات مش بتنسي في حاجات جميلة وفي ذكريات حلوة كتير 
بس الأهم من كل دة مستحيل هعيش علي ذكرك الكلام دة لازم تشغل نفسك جامد شغل تعليم رياضة كل دة مهم وكل تفصيل هتكون

عبارة عن ذكرة فقط

Corn_71708 🇪🇬 · Answer

معرفتش انساها رغم اني اتجوزت و بحب مراتي و مخلص ليها بس دايما بتيجي في بالي و يعلم الله مش بعمل اي محاولة تواصل معاها بس بحس ان اول كل ذكري حلوة كانت معاها هي ف عمرها ما غابت عن بالي للاسف... هتفضل حاجة حلوة في حياتي اكيد

Watermelon_63268 🇪🇬 · Answer

لا بس محتاجة اتخطى، مبقاش موجود كدا كدا، محاولش يرجع، مش فارقة معاه، فليه تعب القلب دا على الفاضي يعني!
مضطرين نمشي ونعدي لأن يمكن نقابل ناس تانية تستحق الحب الصح، محدش يستاهل ياخد بقايا حد فرط فيه حد تاني.

Marshmallow_70902 🇪🇬 · Answer

مش عارف انساها ولا اتخطاها لان هي مش وحشه وانا مش وحش الي بوظ الدنيا هو اهلي للاسف وانا لسه بحبها وكل ما بشوفها بحبها اكتر لان هي الي كانت حنينه عليا وبجد حبيتها من كل قلبي والي مدمرني انها معايا في الشغل وبشوفها كل يوم ولازم اتعامل معاها عشان الشغل وبنتعامل عادي معتفش هي شعورها ايه بس انا حقيقي بموت من جوايا كل يوم وانا مضطر اتعامل معاها كزميله شغل وان الي بينا لم يكن وده حقيقي ايوء حاجه ممكن تحصل لحد

Tofu_71960 🇪🇬 · Answer

انا عادي بالنسبالي اتخطى اي حد بسهوله معرفش ده عيب فيا ولا ميزه بس انا لما ببقا بحب حد بحبو اوي فالاول وبعدين بزهق منو والمشكلة اني بزهق بسرعه بس لو حد كارفلي أو كده مبزهقش خالص تقريبا عشان انا الي بجري وراه بس برضو بعرف انسى بسرعه اكتر وقت اخدتو ف نسيان شخص كان اسبوعين هو ده عيب؟

Orange_72052 🇪🇬 · Answer

لا ماعرفتش 
حاولت اكتر من مره بجد 
بقالي سنه ونص بموڤ اون من علاقه انا اللي ناهياها 
اه هو السبب في الاول والاخر بس انا اللي قررت وقتها انه كفايا كدا 
كل فتره كان بييجي في بالي 
بدخل الاكونت وكدا 
بس بقالي شهرين بحاول اني مادخلش الاكونت ولا افكر فيه 
وهو اصلا ناسيني ولا بيفكر حتى 
بجد مش مسامحه

Chocolate_72070 🇪🇬 · Answer

مش عاوزه انسي اواتناسي ومش عارفه لحد دلوقتي الحقيقه بالظبط احنا  بعدنا ليه أصلاً قرار هو اخده لوحده  بس تمام المهم يكون مرتاح احنا بعدنا  عن بعض  كااحبايب وعشاق ولاكن لسه بنتواصل كابني ادمين وانا مش محتاجه اكتر من وجوده دايما لاني معرفتش الامان غير في وجوده بجد معايا

Tofu_71960 🇪🇬 · Answer

الشخص الي مبيعرفش ينسى ده عندو تعلق مرضي بيبقا متعود عالطول يكلم الشخص الي معاه تخيل مثلا انك متعود علي حاجه وبعدين تروح اكيد مش هتنساها بس لو لقيت بدايل هتنسى عادي زي انك تتعرف علي ناس جديده وتخرج وتعمل حجات انت اول مره تعملها وتملى وقت فراغك عشان متديش مساحه لعقلك انك تفتكر حاجه ولما تتعافى من التعلق تبدأ تشوف شريك أو شريكه حياتك عشان مينفعش نبقا مع حد واحنا بنفكر ف حد تاني والناس المريضه بس هي الي بتنسى حد ب حد..

Coffee_56986 🇪🇬 · Answer

سبتها ليلة ٢٧ / ٣ / ٢٠٢٤ و مكانتش فرقالي خالص لانها كانت مؤذيه جدا و مش مقدره الي كنت بعمله عشانها و بدون دخول في تفاصيل خرجت كمان في نفس اليوم و اليوم الي بعده كمان و بقول لنفسي دايما مستحيل ارجعلها و لكن مش عارف ليه لما بشوفها بتدايق طب ليه انا لغاية دلوقتي فاكر التاريخ دا طب ليه كل ما افتكر حاجه ليها علاقه بيها بتدايق بردو و بزعل بل أحيانا كمان لما يشوفها بيجيلي نغزه في قلبي و يومي بيتقلب و ببقى عايز امشي من المكان 
مع ان والله العظيم انها لو جت تكلمني مش هرضى بالعكس دا انا هقولها انتي اكتر واحده اذتني في حياتي و الوحيده الي حبيتها حب ما يعلم بيه الا ربنا و مع ذلك عمري ما هحب حد زي ما حبيتك و لا عمري هحبك تاني

ياريت لو في حد فاهم اي الي عندي دا يقولي يا جماعه لاني تعبت بجد 
مع العلم ان في واحده دلوقتي في حياتي فعلا من فتره قريبه بتحبني حب مش طبيعي يعني اقل ما يقال شايفاني نجمه في السما و بصراحه بعد الي شوفته منها امنت بمقولة خد الي يحبك و فعلا هي قدرت أنها تحببني فيها بطريقتها و معاملتها ليا 
و اخيرا اسف جدا اني طولت عليكم 😅

Pineapple_72563 🇪🇬 · Answer

انا مطلق من سنتين مش قادر انساها علي رغم أنها محبتيش وحصلي ظروف في حياتي لاقتها موقفتش جنبي وبحس انها دائمة بستغلني بس علي رغم كل دا مش قادر انساها وعرفت انها اتجوزت فحسيت بغيرة شديدة وحزن مش عارف ليه حسيت كدا وعمال اتخيل انها هتعمل معاه زي ما كانت بتعمل معايا فأنا عمال ادور علي بنت الحلال عشان اتجوز وانساها

Pear_72823 🇪🇬 · Answer

كل يوم بقنع نفسي اني عرفت انساها واني خلاص مبقتش احس بحاجه ناحيتها وللاسف عارف ومتأكد أن ده مش حقيقي .... انا علطول شايفها قدامي علطول شايفها في كل بنت كلمتها كل واحده تدخل حياتي احاول اكون معاها بس قلبي مش راضي غير بيها هي وبس مسحت كل حاجه ليها علاقه بيها وبعد عنها تماما بس في جزء مني لسه نفسه يشوفها صدفه نفسه يكملها من تاني عدي اكتر من اربع سنين ولسه مش عارف انسي ومظنش اني هعرف

Watermelon_56286 🇪🇬 · Answer

مفيش حد بينسى حد كان في حياته وحبه وكان قريب منه مهما عمل فيه مفيش حاجة اسمها كده واي حد يقول غير كده كداب انت بس بتتأقلم على غيابه وعلى الحياة من غيره مش اكتر لكن نسيان قسما بالله ماتقدر مهما عملت ومهما ضحكت على نفسك وعلى دماغك

Coffee_69368 🇪🇬 · Answer

النسيان ده حالات ودرجات طبعا النسيان النهائى لسه بل يكاد يكون مستحيل لكن متأكد ان هيجيلى يوم وهنسى تماما وانا عايش علشان اليوم ده نفسى نفسى فعلا انساها 
اما لو رجعت هعمل ايه مش عارف فكرت فى تلتين سيناريو وتلاتين رد فعل كلهم مش مضمونين او مش واقعيين انما الحاجة الوحيدة اللى انا متأكد منها انى صعب اصفى وارجع زى الاول وكل همى ان الشيطان ميغلبنيش ويجرنى لتلاعب او انتقام اوظلم او حتى ضعف 
نفسى اخلص من الحالة دى باى شكل