الطفل ما يتأثرش غير بـواش صرا.. يتأثر أكثر بـوش ما صراش... أخطر أنواع التربية المرضية ماهيش القسوة ولا الضرب ولا الصراخ... هادو واضحين و مفروغ منهم ...الأخطر هو le vide psychique... الفراغ العاطفي لي ما يتشافش ما يتسماش وما يتعاقب عليه حتى واحد... في ديار بزاف.. الطفل ما يتضربش... ما يتسبّش... ما يتظلمش ظاهرياً... بصح ما يتشافش تاني... ما كانش واحد يبينلو بلي راهو مفهوم... ما كانش واحد يعكسلو مشاعرو...(راك حزين و من حقك تكون حزين)...وهنا بالضبط يتشكل اضطراب... l’alexithymie acquise .. العجز عن تسمية المشاعر... الطفل هذا يكبر وهو عاقل...هادئ... ما يطلبش بزاف... بصح داخلياً جهازو العاطفي ما تعلّمش اللغة تاعو... يحس بصح ما يفهمش واش يحس... يتقلق بصح ما يعرفش علاه تقلق... Et la société تكافؤو على هذا ( ما شاء الله ولدي/بنتي مربّيين)...كاين نقطة أعمق... الطفل لي يتربى مع والدين غير ناضجين عاطفياً... غالباً يتحول دون وعي إلى ... parentification émotionnelle... يعني... هو لي يولي يراعي مزاج الأم... يخفف غضب الأب... يقرأ الجو قبل ما يهدر...يتعلم يكون radar émotionnel ... في عوض ما يكون طفل.. هذا النوع من الأطفال ما يمرضش و يبان عليه المرض يمرض بالسكات... يتعلم بلي الحب لازم يُكتسب... ماشي يُعطى... Et plus tard... في العلاقات ما يوليش يحوس على شخص يحبو… يحوس عن شخص يحتاجو... كاين تجربة نفسية معروفة (Still Face Experiment). تبين بلي مجرد ثواني من غياب التفاعل العاطفي من الأم... تخلي الطفل يدخل في détresse... وش تبانلك سنوات من أنا هنا جسدياً بصح مش معاك عاطفياً...و الحاجة لي ما يعرفوهاش بزاف... الدماغ تاع الطفل يتكيف بيولوجياً... Le système nerveux autonome .. يتبرمج على التوتر.... يولي hypervigilant دايماً مستعد للخطرزحتى في علاقات آمنة...يعني يكبرو وما يعرفش يهدأ... الراحة تخوفو...الناس تقول هذا عندو anxiety بلا سبب... Non... السبب كان في والدين ما علّموهش الطمأنينة... و المشكل ما كانش في سوء نية الوالدين...كان في جهل عاطفي متوارث... ناس جرحى ربّاو أطفال قبل ما يداويو رواحهم... ولهذا أخطر شيء يقدر يديرو إنسان غير ناضج عاطفياً…انو يتزوج و يجيب ولاد ...لازم الانسان يراجع نفسو قبل و يحاول يحسن من تفكيره... خير ما يكون normal من برا ويخوف من داخل... الطفل ميحتاجش عائلة مستقرة.. يحتاج جهازاً عاطفياً مستقر معاه.. Sinon.. يكبر يتعلم يعيش… mais jamais ressentir pleinement...

2

1