انا شاب ٢١ سنة بقالي فترة فاقد المشاعر من ناحية البنات، مهما كانت جميلة أو ذكية مبتفرقش معايا زي الأول، من كم سنة كنت لما بحب - وغالبا من طرف واحد - كان بيبقا نوعًا ما شعور جميل ونظرتي للشخص على انه كائن مثالي بالرغم إني مُدرك تمامًا عيوبه بس متقبلها، كان شعور طفولي شوية بس كان من أجمل الحاجات الي حسيت بيها، معرفش هل دة نضج ولا ايه، بس لما اتعاملت نوعا ما من الناس أكتر وعرفت طباعهم مبقتش بنبهر بحد بسهولة مبقاش عندي الرغبة أصلا إني أتقرب لحد، ولو إن بيجي فترات مشاعري بتغلبني ولكن أظنها بتبقا مرحلة طبيعية ملهاش علاقة بالشخص نفسه لانها كلها فترة بسيطة وبرجع زي الأول، من فترة قريبة فضلت شهور مرتبط - سوشيال - كنا بنتكلم كتير فيديو كولز وغيره ورغم الكلام الكتير الي كنت بقوله بس حرفيا مفيش ولا كلمة كنت صادق فيها، وبالتالي بعدت طبعًا علشان معلقش حد بيا أكتر من كدة ولأن الموضوع كان غير واقعي، وبعتذر إني هقول كدة بس لازم أعترف بالذنب بردو، أظن الأمر كان مجرد تجربة لا أكثر ولا أقل. الموضوع مجاش فجأة لكن مشاعري بدأت تقل بالتدريج وغالبًا الحوار ممكن يتطور أكتر، حاجات كتير فقدتها، مبقيتش بنفس الطاقة زي الأول، مفيش حاجة بتلفت انتباهي بسهولة زي زمان، إلى جانب شعور الحب، الاعجاب لسة موجود، ممكن يعجبني شكل حد معين أو طبع فيه لكن الشخص؟ لا الرغبة الجنسية لسة موجودة، مش متأكد إذا كنت طبيعي ولا لا، هل هي مرحلة نضج طبيعية، بس حبيت أفضفض

5

3