أنا فقدت الثقة في البنات، وبجد مش فاهم… واحد زيي هتعجب بيا؟ على إيه؟ لا معايا فلوس، ولا شكلي يلفت، ولا عندي وظيفة تِتشاف. كل مرة أحاول أفتح نفسي لحد… ألاقي لعب، أو خداع، أو حد مش جاي بوشه الحقيقي. فبقيت أسأل نفسي: هو أنا ليّا قيمة عند أي بنت؟ ولا أنا مجرد واحد يعدّي وخلاص؟ ايوه… كل ده بسبب اللي حصل. زميلتي في الشغل وشّت بيا… وعملتلي عدم أمان وخلّتني أشوف البنات كلها بعيون الشك. وبنت تانية من محافظة تانية… كنت شايفها لعب هي كمان، فطردتها من حياتي. والصدمة إن البنت دي كانت بتحبني بجد… كانت من بحري… وكنت أعمى ومش شايف. ومش عارف قد ايه شايفاني كويس بس طردتها من حياتي إحساس العدم إحساس وحش فبقيت واقف في النص… مكسور من اللي خانتني، وندمان على اللي كنت فاكرها بتلعب وهي كانت صادقة. وأكتر كلمة بتوجعني دلوقتي؟ إني بقيت شاكك في الكل… حتى اللي يستاهل. وفي الآخر… بقيت مش فارق معايا مين تقرّب أو مين تِبعد. أنا خلاص اتعلمت إن الثقة مش حاجة ببنيها مع أي بنت… الثقة عندي ماتت يوم ما اتكسرت من أقرب الناس. علشان كده، أنا مش عاوز أتجوز. مش علشان أنا ضد الزواج، ولا خايف من المسئولية… بس علشان تعبت من علاقات بتستنزف وبتجرح، من توقعات أكبر مني، ومن ناس مش شايفاني بجد. بقالي فترة شايف إن راحتي في وحدتي، وإن أعيش مع نفسي أريح من إني أعيش مع حد مش صادق أو مش بيشوفني زي ما أنا. أنا مش عاوز أتجوز لأن قلبي اتلسع، وبقيت مش قادر أدي فرصة لحد جديد. وجودي مهم… بس مش لأي حد، ومع أي حد. أنا لسه محتاج أشوف مين فعلاً يستحقني قبل ما أفتح باب حياتي لأي حد.

0

2