النهاردة للاسف احب أو محبش اوي بصراحة يعني اني اعلن اني اطفيت خلاص . بقالي كتييير بحاول متطفيش ويحصل حاجة وحشة وبرغم ده احاول اني مكتأبش وافضل زي ما انا . والموضوع ده كان صعب جدا بس عرفت ابقي كويسة بعد فترة طويلة . وبعد ما ابقي كويسة بفترة قصيرة بيحصل حاجة تاني تخليني اتدايق تاني وافضل الف فنفس الدوامة اللي كل ما اخرج منها برجعلها تاني والموضوع بجد بقي مرهق اوي عليا كأن فيه صراع مبين شخصيتين جوايا . شخصية مرحة و رغاية وبتحب الحياة والضحك وطيبة وبتحب تساعد كل الناس ، وشخصية تانية مش عايزة تتكلم وبتتعصب من اقل حاجة ودائما حاسة أنها متدايقة و عايزة تهرب من كل صحابها وتختفي من الحياة عمتا وتفضل فأوضتها . بحاول علي قد ما اقدر أن الشخصية الكئيبة دي متتغلبش علي البواقي اللي باقية من شخصيتي القديمة الحلوة ، بحاول والموضوع صعب اني برغم كل حاجة وحشة بتحصل متأثرش واتعامل أنه عادي بس الحقيقة أنه مفيش حاجة عادية انا بس بكدب علي نفسي وبحاول الهيني عن حياتي وعن اي حاجة وحشة بتحصل علشان افضل زي ما انا . بس النهاردة قررت أنه خلاص كفاية ، مش هفضل احاول لأن الموضوع بقي مرهق وحاسة أنه ميستهالش . اصل فيها ايه يعني لو بقيت هادئة وساكته وقاعدة فأوضتي فحالي بتفرج علي مسلسل أو بذاكر ومش بكلم اي حد أو بخرج غير مع اهلي ، اه هو تغيير كبير بالنسبالي بس مش وحش للدرجادي فخلاص هحاول اتعايش مع شخصيتي الجديدة واتقبلها لأن هي دي الشخصية اللي مش هتسببلي مشاكل وطول ما انا لوحدي هعيش فسلام ومنغير وجع دماغ . معرفش انا ليه كتبت الكلام ده او قولت يعني حاجة زي دي بس حسيت اني محتاجة أقول.

1

4