فيه مثل بسيط دايمًا بييجي في بالي: تخيل إنك عملت سفرة كبيرة، مليانة كل حاجة — ديك رومي، لحمة مشوية، كفتة، ريش، كباب، جلاش باللحمة المفرومة، سلطات بكل أنواعها، فراخ مشوية، بامية، وصنية بطاطس باللحمة... تعبت، وجهزت، وعزمت ناس كتير عشان يشاركونك اللي عملته بحب، وفجأة تكتشف إن محدش جه. كل اللي عملته راح، والمجهود والفلوس والطاقة اتحولوا لهدر. الموقف ده علّمني إن الحياة أوقات بتعمل فينا نفس الحاجة. تتعب على نفسك، تاخد كورسات، تشتغل زيادة، تتحمل شغلك وتضغط على نفسك، تحاول تكون أحسن وأقوى، وفي الآخر تسمع كلمة زي: > "إنت مش مضطر تعمل كل ده عشاني." وقتها بتفهم إن مش الكل هيشوف تعبك بنفس الزاوية اللي أنت شايفها، وإن أحيانًا بتكون "كتير" على ناس مش مستعدة تشوف اللي جواك. بس الدرس الحقيقي كان إنك تشتغل على نفسك مش عشان حد، لكن لأنك مؤمن إن اللي بتعمله "الصح". اللي فهمك غلط ممكن في يوم يفهمك صح، وإنت كفاية إنك تكون صادق مع نفسك. أنا بني آدم، عندي عيوبي زي أي حد، بس التجربة دي علمتني أوازن بين الطيبة والوعي، وإن مش كل الناس تستاهل تعبك أو زعلك، وفي بنت تانية خالص ممكن تشوفك كفاية، وفي شغل تاني فعلًا يستحق جهدك.

2

0