اخت

دلوقتي يا جدعان انا عايز حد في الازهر يساعدني انا كنت في تالتة اعدادي واختي كانت بتقولي لو جبت فوق 132 هتجيبلي 5000 جنيه عشان مكنتش متوقعة اني هوصل للمجموع ده ولما النتيجة طلعت انا كنت جايب 137 بس اختي احوالها المادية اتبهدلت شوية وعملت جمعيات وحاجات عشان تجيبلي الفلوس وهتجيبهم يوم 7/1 فخالتي بتقولي متخدهاش منها عشان حرام انك هتبقي اخدها بعين الحياء ومش عارف اي بس انا عايز اخد الفلوس عشان اولا محتاجها ثانيا عايز اعلمها درس انها تبطل توعد تاني لو مش هتقدر تنفذ وبتتريق علي وتقول كلام زي السم فمش عارف اعمل اي بس انا اتحرق دمي طول الترم وبقيت عايز اخد حقي منها فمش عارف هل لو اخدت الفلوس هتكون حرام ولا لا؟

اللى انا عملته غلط كبير ومش حلو وكنت بعارض الفعل دا لغاية اما عملته ومش عارف دلوقتي اصلحه ازاي كان في بنت من التطبيق هنا بكلمها والبنت دي كويسة ودماغها حلوة وفعلا بعتبرها اختي وكنت عايز افضل جمبها واسندها واطمن عليها حصل خلاف من فترة كبير وكلمتها باسلوب مش حلو وصالحتها بس هي كانت لسه متاثرة بالمشكلة بس بسبب اختلافي معاها في طريقتها قررت ابعد فجاه وقلت علشان متحصلش خلافات بينا تاني وماتكلمش معاها باسلوب وحش تاني زي في الخلاف الاول الفعل جبان وندل وعارف رايكوا فيه هيكون ازاي بس بجد انا زعلان من جوايا وندمان على اللى حصل دا ومتضايق جدا ان انا كنت سبب زودت اللى عندها بدل ما اساعدها زي ما قلتلها حقيقي انا لسه بحبها وبعتبرها اختي وعايز مصلحتها وصعب اوي اصلح الموقف ويكاد شبه مستحيل بالنسبالها لان دا كان تاني موقف والاول كان بردة تقيل مش سهل مش عارف اصلح دا ازاي وبجد زعلان علشانها وان انا كنت سبب زودت بيه اللى عندها انا اسف ليكي بجد ونفسي حتي لو مش هتكلميني تاني تبقي احسن وكويسة وتعرفي انك غالية وبنت زي الفل وتستاهلي ناس احسن في حياتك يقدروكي ويشيلوكي جوا عنيهم مش هطول عليكوا اكتر بس حتي على الاقل عايز اهديها واطمن عليها من غير ما اكون بزود شعورها الوحش ارجوكوا عرفوني ممكن اعمل ايه

بقالنا داخلين في 13 يوم بحاول فيهم اقنع نفسي ان خلاص كل حاجة انتهت بس الحقيقة اني كل ما ببعد خطوة بلاقي نفسي برجع لنفس النقطة المحاولة في النسيان مجهدة جدا لما تكون بتجاهد عشان تنسى اجمل حاجة حصلت في حياتك ​انا مشوفتش وشها ولا عرفت ملامحها في الحقيقة كنا مجرد شات وكلمات على شاشة بس الكلمات دي كانت اطهر واحن حاجة قابلتها في دنيتي عمري في حياتي ما شفت في طيبة قلبها ولا في حنية كلامها الشخص ده كان اصغر مني بكثير بس بطريقة كلامه والفكر بتاعه حسيت ان هو اكبر مني ب 20 سنة من نضجه وعقله ولاول مرة في حياتي كنت الاقي حد يطبطب عليا بجد حد اروح له بكل همومي وافتح له قلبي واقوله على كل اسراري وانا مطمن مطمن انها مش هتعاتبني ومش هتحكم عليا ولا هتشوفني وحش وهي كمان كانت معايا كدة حكينا لبعض كل حاجة في الدنيا وشيلنا هموم بعض من غير ملامة ولا احكام في وقت كان ممكن الناس تاخد سنين وسنين عشان توصله انا بصراحه حسيت انها احسن صاحبة واحسن اخت مع اني ماليش اخوات بنات بس حسيت معاها بمعنى طعم الاخت الحنينة اللي بتخاف عليك بجد طريقة الكلام بتاعتها عمري ما حسيتها ان هي شخص غريب عني ​احنا الاتنين كنا راضيين عن البعد وساعتها لما قفلنا قفلنا زي الاطفال وعملنا لبعض بلوك بعد ما قفلنا على طول وسيبنا اثر حلو جوانا بحس ان ربنا ساعتها كان بيعاقبنا احنا الاتنين في بعض او بيختبرنا خلانا اتعرفنا على بعض بسرعة وسيبنا بعض بسرعة وكل ده كان عشان نرضي ربنا ومفيش حاجة تغضب ربنا وانا احترمت القرار ده قوي بس الوجع اكبر من الطاقة ​النهاردة وانا واقف في نص الطريق تعبت من التمثيل وتعبت من اني ابين اني تمام الايام بتعدي تقيلة وملهاش طعم والاشتياق مش بس بيوجع ده بيهد الروح هد طلعت الابواب مابتتقفلش بالامر وطلعت هي مش اي حد وخلاص دي كانت الروح اللي بتسمعني وتفهمني من غير ما اتكلم ​لو الكلام ده عدى قدامك في يوم اعرفي ان في حد هنا لسه عادد الايام باليوم والساعة من وقت ما غيبتي ولسه فاكر كل طبطبة وكل كلمة حنينة وعايش على امل ان اللي جمعنا بالكلمات ونهاه الخوف من ربنا يقدر يرجعنا تاني باحسن طريقة

ممكن تقلولي طرق ازاي تنسو صدمة معينة ف حياتكم لسا كنت في سيشن صوت مع بنوتة عسولة جدا فكرتني باختي وتقريبا نفس صوتها ..وانامش عايش مع اختي بس بنتكلم كل فترة كدا لاسباب يعني مش عايشين في نفس المكان

تعبت كان نفسي يكون عندي اخوات اخ طيب يحس بيا ويطبط علي زي زمايلي ولا اخت بنت تفهمي تنكشني تاخدي هدومي اخد حجاتها نخرج سواء بجد زعلانه ان معنديش اخوات هل فعلاً الأخوات شي حلو ولا بس الي بحلم كتير قالي مش زي ما انا متخيله بس حاسه ده عشةن يهونو عليا مش اكتر بس الموضوع مضيفني جداً

ازيكوا عاملين ايه انا بنت كبرت في السن و نفسي كنت اكون اسره و احس اني ممكن احب و اتحب و لكن محصل و انا ليا اخت نفس الموضوع ناس كتير اتكلمت معايا على اني اتعملي ليا و اختي عمل بكدا و اكدوا الموضوع و لكن احنا لسه زي ما احنا و بقى سننا 43 سنه و احنا نفسنا نحب و نتحب و نكون اسره بجد و ناس كتير كانت تهجمنا على ان احنا سبب في الموضوع و ناس تانيه تقول اكيد ناس كانت بتتقدم و احنا اللي بنرفص و لكن بجد مفيش و ناس بتهاجم بدون سبب هو احنا الغلط من عندنا مش قدرين يفهموا ان الموضوع بعيد عننا

اتعرضت للسرقة من اختى اشتريت غويشة ب ١٠٠ الف سرقتها بعدها بيومين محدش كان فى البيت غير انا و هى و ماما وماما اصلا مشتركة معايا فى الغويشة اتكلمت و عيطت و خصمت و رجعت اتعامل وبرضو مفيش فايدة مش عايزة ترجعها حاليا انا مش قادرة اتعامل ولا اتكلم واليوم اللى بتيجى فية عندنا بكون فى حالة اكتئاب شديدة خصوصا لما اشوف بتتعامل مع اهلى عادى و هما بيتعاملو طبيعى و بتجيب هدايا لماما و الدنيا جميلة معاهم قلبى بيوجعنى اوى على شقايا و تعبى و مجهودى استعوضت ربنا و بدعي يعوضنى التعامل محدود جدا من نحيتى كدة انا عليا ذنب قطع رحم

دلوقتي انا 19 سنه وبعاني من مشكله ان بابا دايما بيفرق بيني وبين اختي اللي عندها 10 سنين اه عارف ان مينفعش احط نفسي ف مقارنه زي دي بس هو دايما بيتعمد يدايقني قدامها ويضربني لاتفه الاسباب عشانها ولو ضربتها او جيت جمبها يبهدلني حتي لو هي اللي غلطانه وانا تعبت من التفرقه برغم ان في اخواتي تاني اصغر مني بس هو دايما ميال ل دي ويضربنا كلنا عشانها عادي بعدها يجي يصالحني وبعد م يحس اني تمام يروح يرجع لنفس الحوار معايا والتفرقه بيني وبينها احنا وخواتي ف كافه وهي عندو ف كافه وانا تعبت وزهقت من القرف ده بجد

كل يوم في التوقيت ده لازم يبقا فيا اي بلاء مفيش يوم كامل يخلص طبيعي ابدا يعني اختي بتقولي ابقي قابليني لو فلحتي لمجرد اني عملت حاجة مش علي مزاجها الكلام ده مش بيضايقني علي قد ما بيحطني تحت ضغط مش طبيعي اقرب ما ليا مستنيني افشل مش طبيعة الشماتة دي يعني بجد مش طبيعي

انا كنت منزله قبل كدا مشكله حصلت مع مديري و بصراحة في ناس كتبتلي نصايح عملتها و كانت مفيدة جدا حبيت اشكركم عليها بس حصل مشكله تانيه عايزة اعرف رايكم فيها المكان الي بشتغل فيه اتيليه ، بضيق فساتين و اقصرهم حجات كدا ، انا بدأت شغل من شهر واحد و قلتلهم اني بعرف اضيق و اشتغل علي مكنه خياطة و انا فعلا بعرف اعمل الحجات دي بس انا مشتغلتش ف مكان تاني قبل كدا ، كان اول تسليم ليا فستان و كان واسع اوي علي البنت ، حرفيا البنت رفيعه اوي و كنت هضيق منه كتير ، لما ضيقته علي حسب المقاسات الي اخدتها انا و علقته المدير شاف الفستان و لقاه صغير و قالي ايه دا مفيش بني ادم بالرفع دا ، حاولت افهمه اني اخدت المقاسات علي البنت كدا لكن هو قالي انه غلط لدرجة اني حسيت اني غلط فعلا المهم فكيته و هو قالي اعمليه تضييق حاجة بسيطة و خلاص و سمعت كلامه ، المهم لما البنوته جت تاخدة لقيته واسع جدا و اتضايقت ، انا عملتلها تاني بسرعة و ادتهولها ، ولاني مكنتش مستعدة اني اعمل من اول و جديد اتاخرت اوي اني اروح للمعلومه صحبت البنوته الي هتاخد الفستان اصلا بتشتغل ف اتيليه تاني ف كانت واقفه معايا بتقولي اعمليه بطريقة معينه و انا مكنتش حابه دا بس عديت الدنيا و قولتلها ماشي و خلاص، اول ما خلصت الفستان قلتله انا لازم امشي و مشيت ، بعد كدا الدنيا كانت ماشيه تمام و مفيش حاجة حصلت ، للمعلومه انا اختي بتشتغل جنب الاتيليه الي انا فيه ، انا انهاردة مكملتش الشيفت بتاعي و روحت لاني تعبت جامد و بطني حرفيا كانت بتقطعني ، لما روحت اختي اتصلت بيا قالتلي انه صاحب الشغل زعلان مني اوي و كان عايزة يمشيني من الشغل ، و السبب الي بيقوله اني كذبت عليه اني بعرف اخيط و انا فالحقيقه مش بعرف و اني خليت صحبت البنت تعمل الفستان بدالي مع ان دا محصلش ، الموضوع كله مش مضايقني غير انه رايح يكلم اختي مش يكلمني انا ، لو هو متضايق من طريقة شغلي يجي يكلمني مش يروح يقول لاختي ، و لو مش عاجبك الي بعمله تعال قلي و اسيب الشغل و اريح دماغي من القرف دا ، انا بعمل شغلي كويس و لما بيقولي حاجة بعملها ، بس هو بيعاملني ف وشي ان مفيش حاجة و الدنيا تمام و يروح يشتكي لاختي من ورايا. ،انا بفكر اسيب الشغل لاني زهقت من حواراته ، قولولي اعمل ايه

لو انا عايزة انزل جيم بس اتوقع إن اهلي مش هيوافقوا لأن معندناش الثقافة دي احنا مش ارياف اوي يعني بس هيقولولي هتروحي لي و بالنسبالهم اني اهتم بصحتي و جسمي مش شئ مهم اوي لدرجة أنزل جيم يعني ف هل في حل ولا فاكس اصلا قبل كده اختي كانت تعبانة و الدكتورة قالتلها تنزل جيم بابا كان معترض بس وافق لانه علاج مش اكتر يعني و اختي راحت شهر و مكملتش عشان كانت بتتعب كتير جيم بنات بس