استهلاك

عندي سؤال.. هو احنا ليه دايما محاوطين نفسنا بإلتزمات او طلبات ملهاش لزمة؟ يعني مثلا، انا ك فلان عايز آيفون سفنتين حالا بالا حيي ابو الفصاد اهو، وعايز بي ام اكس سكس وعايز وعايز وعايز.. وانا ك فلانة عايزة ميكب من ماك وهدى بيوتي واسينس ومعرفش مين، ولازم كل ويكند اروح سيفورا واطلب من شي ان، والله ده حتى شي ان غلبان، بتبقى زارا وسبلاش. طب هل فكرتوا دقيقتين بس، ان الحاجات دي انتم فعلا مش عايزينها؟ مش محتاجينها اصلا؟ هو المجتمع بس اللي فرضها عليكم؟ يعني انت ك واحد مش معاك ثمن ولا الآيفون ولا البي ام في، طيب بتاخد قروض وتقسط وتزنق نفسك ليه اصلا بدل ما تجيب لنفسك حاجة تنتفع بيها بجد او تاخد كورسز ف مجالك ف تعلى؟ وانتي مثلا، ما انتي مزة وحياة ربنا، انا اصلا عمري ما شفت بنت مش حلوة، ف actually انتي عمالة تاخدي ذنوب عشان الميكب والاسراف وكل ده. ولو واخدين بالكم ف انتم بس عايزين تمشوا ورا الترند، عايزين تحسوا انكم التوب قدام الناس بس، مش نفسكم. يعني انت اه معاك آيفون قدام الناس احدث اصدار وعربية بي إم بكم مليون، بس انت ف شغلك واحد قليل، وبتاكل عيش وجبنة عادي وتفوت وجباتك اصلا مش نجيب سويرس زي ما هما فاهمين. وانتي نفس الكلام، اه شافينك لبسك حلو ومزة وميكب، بس انتي جواكي اصلا مرتاحة وانتي حاسة ان كل شوية ولد بيبصلك؟ او بيفكر فيكي بطريقة مش تمام؟ او بيعاكس بقى ويتباجح؟ ف بطلوا تضغطوا نفسكم وتكتئبوا عشان مجرد التزامات صورية فرضها علينا المجتمع، وهي اصلا مش التزامات ولا هي مفروضة، اللي عايز يمشي بتلفون بزراير هيعمل كده، وكينج وملك ف نفسه وكل يوم يروح ياكل اللي فنفسه، عشان بس مش هامه رأي الناس، مش زانق نفسه عشان ناس اصلا غالبا مش هتركز معاه. فاا بس.. خليكم مرنين، مش كل حاجة تريند تمشوا وراها وتضغطوا نفسكم وتتعبوها؛ اعرفوا ازاي تفرقوا بين اللي عايزينه، واللي محتاجينه بجد؛ هشان بعد كده وقت ما تحتاجوا فعلا، مش هتلاقوا.. حتى لو الاحتياج ده كان حسنات ودرجات في الآخرة والله.. مش هتلاقوه.