العزلة الاجتماعية

المشكله الي عندي اني م بحب اتعامل مع الناس يعني لما بكون وحدي كدا بكون تمام ومثلا لو كنا انا وزملائي ف باص ومشغلين اغاني وبيضحكوا ويهزروا ويغنوا شباب وبنات ... انا بسيبهم واقعد وحدي والبس الايربودز وخايف ده يأثر عليا وعلي شغلي بعدين لاني شغلي بعدين هيكون فيه تعامل مع الناس ولازم اكون فرفوش وحلو ف التعامل معاهم علشان يجوا تاني + المشكله الاكبر اني م بحس خالص خالص خالص مفيش اي احساس لا ب حب ولا كره ولا اهتمام ولا خوف ولا حاجه.... لو حد عدى علي حاجه زي كدا وعرف يتخطاها ياريت يتكلم + كنت بروح لدكتوره نفسيه بس حسيت انها م ليها لازمه او مفيش تحسن من ناحيتي وبحضر عدد جلسات ع الفاضي ف بطلت اروحلها

انا حاسس ان انا وحيد مش وحيد أهل بالعكس أنا اهلي قريبين مني وبالذات امي يعني انا ممكن لو نمت ف نص اليوم امي تيجي تطمن عليا تفتكرني تعبان ولا حاجه بس الفكره اني معنديش صحاب وده حوار مدايقني جدا ومش عارف اتخطاه ديما بحس أن انا مش مهم لما بتكلم علي جروب الفصل محدش بيرد عليا اصلا ولا أكن رسالتي مكتوبة بالحبر السري ومهمي حاولت اقرب من حد بردو مفيش حد عايزني بقيت حاسس ان انا غير مرغوب فيا أو ان انا عمر م حد هيحبني يعني مثلا انا اخويا محبوب في جامعتو مع انو لسه ف سنة أولي كلية بس عندو صحاب كتير وهمي الي بيقربو منو وكل الي هناك بيعملولو 1000 حساب سعات بقعد اقول ايه الي فيا مخليني مليش حق اني يبقي عندي صحاب ومحدش يقولي سنك عشان كل الي ف سني عندهم صحاب عادي انا مفيش حد معبرني حتي لما بحاول املي بيخيب اكتر لما بقول ابدأ انا وابعت لحد من صحابي بدايق لاني بحس انو بيرد علي قد الكلام أو مبيسألش تاني ولما بحاول اتكلم علي الجروب مثلا يمكن يعملولي حساب أو ياخدو بالهم اصلا اني موجود بس مفيش فايده انا بجد حقيقي تعبت وكل م افكر ف الموضوع اقول عادي فيها ايه ياما ناس كتير معندهمش صحاب فيها ايه انا عندي نعم كتير وبردو مش عند كتير يبقي الحمدلله وانا والله راضي وبحمد ربنا علي كل شئ بي انا نفسي يبقي عندي صحاب أو حتي بلاش صحاب ، صاحب واحد علي الاقل اي حد موجود مهتم بيسأل بيتطمن عشان كده بحب اوي اوي اروح المدرسة عشان بحس ان كلهم عارفني وكلهم بيعملولي حساب واني ببقي مبسوط طول الوقت وبهزر واضحك علي طول د انا حتي ساعات باخد التابليت معايا ولما بتبقي حصه فاضيه بشغل فيلم ونتفرج عليه انا وصاحبي بس بره المدرسة محدش بنتكلم بس لما انا ابعت لواحد فيهم فاهمني الفكره اني مش بروح المدرسة غير نادرا الي هو ف الامتحانات بتاعت الشهر وبس

فيه سؤال غريب بجد طول عمري بسالة هو ليه أنا مش مفضل عند حد مش مفضل عند صحابي أو عند اهلي اعند اي حد بس انا عمري ماكنت مفضل أو حتي متقبل عند حد مهما غيبت ماحدش بيحس اني كنت غايب اصلا واكيد اكون عند كل الناس هو مش متشاف أو محسوس بوجودي و السؤال اللي ع طول بسألة لنفسي هو أنا ليه مش محبوب او مش بيتحس بوجودي ف اي مكان لدرجة أن روحت اقول لواحد خطوبة اختي وهبعتلك اللوكيشن دلوقتي وهستناك يقولي لا ماتبععتش وماتستنانيش مع ان أنا بحاول ابقا شبه صحابي واتعامل زيهم عشان بس احس باهتمام واحس اني فارق مع حد فا اقتنعت أن أنا مستاهيلش حد يهتم بيا أو ابقا مفضل عند حد أو اتحب لشخصي فابقيت اكره نفسي اكتر واي فيها اذي ليا أو لنفسي بعملها واعاقبها واعاقب نفسي ع أنها هيا

انا عندي مشكله غريبه مش عارف هل ده طبيعي ولا يعني حاجه ديما بعملها و انا مش واخد بالي الي هي انا لو رايح مشوار أو ماشي بجيب حاجه او راكب مواصلات مش بلاقي حاجه اعملها ابدا اتناقش و افتح مواضيع مع نفسي بمعني ممكن مثلا ممكن اتكلم عن رأيي. منظوري سياسي و الاقتصادي مع نفسي و تاني ده الي هو انا الي بقنعه و طبعا ده كل داير جوه مخي أو برسم سيناريو خيالي يمكن بعمل ده علشان مزهقش و محسش بالملل من طريق بس حرفيا انا بسرح جوه هل ده طبيعي و العادي ولا هل أنا اصلا موضوع مافور عندي لاني حرفيا بعمل كدا لو حتي قاعد مع حالي نازل اشتري حاجه من كشك الي تحت و مش عارف ليه بفرح جدا لما اقابل حد علشان اقعد اتكلم معاه و يمكن بسكتش كمان فا حد عنده تفسير ممكن يساعد

عندى مشكلة مبحسش الحجات الى شباب جيلى بيحسوها بنزل الكليه او الكورسات بحس ان كل الناس دى سطحيه بيهزرو هزار رخم مع بعض وبيضحكو وبتاع بحس انى مش عايز اضحك ولا شايف اى داعى للضحك ده دايما بقرب واصاحاب ناس اكبر منى بضعف عمرى مثلا برتاح وسطهم الصراحه وبحس انى بفهم حجات او بتتحكى قدامى موقف بتكون شيقة بسمع وبتكلم ورئيي بيحترم اكتر من الناس الكبيرة شباب جيلى بحسهم اصغر منى وتافهين كمان بطريقة رخمه كمان مبحسش انى عايز اعمل الحجات بتاعت الى من سنى او انا عملتها خلاص كل الى بيبهرهم مش بيبهرهم مش عارف دى مشكلة عندى ولا دى سطحية الناس والجهل الى عمل فيهم عايز حد يفهمني ده اية