تقريبا في حياتي كلها معملتش صحاب او قد المعارف والزمايل يعني محدش قريب اوي الا تقريبا واحد الشخص دا مهما قولت في جدعنته بجد مش هقدر اوفي حقه عليا ووقفته جنبي عمره ما اتاخر عليا ف طلب ابدا والله مهما كان تعبان عمري ما احتاجته في مشوار ومساعدنيش باللي يقدر عليه يوم وفاة جدي سلم عليا وانا كنت منهار ومكنتش ف وعيي اصلا من الصدمه ف سلم عليا وسلم على اخويا وبعدين ادى اخويا ١٠٠ جنيه (عشان عارف انه لو ادهالي هرفض) وقال لاخويا دي فلوس لاخوك عندي اديهاله ولما روحت من المقابر اتفاجئت ورنيت عليه واصريت ورجعتهاله وشكرته النهارده انا روحت اجهز ورق للشغل عشان اقدم عليه (دعواتكم ) كلمته من امبارح قولتله معلش فاضي بكرا بدري تجيب الموتسيكل ونروح قالي والله انا شغال شيفت تالت لو قدرت هاجي شغله صعب وبيتعب ربنا يرزقه وكان شغال من ١٠ بالليل لحد ٦ الصبح وخلص وروح البيت منامش واتصل عليا وقالي يلا وقعد معايا نلف في الحر وطبعا انت عارف مصالح الحكوميه عامله ازاي حر وزحمه ولا اشتكى لحظه قولتله يلا نروح نفطر وروحنا ودخل واحد قريبه وقعد وزود اكل معانا وكلنا وشبعنا وقومنا وحلفت عليه ما هو دافع ودفعت وقعد يقولي مينفعش كدا وبتاع وروحنا شربنا عصير وبعد ما خلصنا اليوم وصلني للبيت وقولتله استنا اجيبلك مايه ساقعه ولما رجعتله لقيت ٥٠ جنيه على الارض في مدخل البيت وقولتله سبحان الله تلاقيها واقعه من حد من اخواتي زمانه بيلف عليها فوق بعد ما روح لقيته باعتلي على الواتس بيقولي ال ٥٠ دي مني ليك عشان الفطار كتير عليك لوحدك ف بجد مهما قولت مش هقدر اوفى جمايله عليا بحبك يا بلال يا اصلح من عرفت وصاحبت اقسم بالله بحبك من كل قلبي ويعلم ربنا بدعيلك ازاي ووالدتي بتدعيلك ازاي كل ما تيجي سيرتك انا منزل دا عشان تدعوله بالرزق والبركه وتيسير الحال والتوفيق في الدنيا ويدخل الجنه يارب يدخل الفردوس الاعلى يارب بحبك يا بلال والله العظيم ❤️
