تبلد مشاعر

السلام عليكم انا شاب داخل على ٢٠ سنة عندي مشكلة في حوار المشاعر أو بمعنى أصح عندي برود أو تبلد بس ظاهريا فقط يعني مش بعرف اعيط نهائي مهما حصل حواليا ببقى بجد من جوايا حزين بس مش قادر اعيط ومن برا ولا كأن في حاجة اصلا من جوايا خايف وقلقان من برا عادي جدا مفيش اي حاجة مش بقدر أظهر احساسي ومش بمزاجي ده شيء قهري ده غصب عني مكتوم ولما باجي على نفسي واحاول اعيط لأن عارف ان فعلا جوايا حاجة مكتومة لازم أخرجها لاني هرتاح لما أخرجها أقصى حاجة اوصلها دموع تنزل من عيني لكن برضه وشي بارد جدا مجرد دموع بتنزل بس الحاجة الوحيدة اللي بتظهر عليا فعلا الغضب بس غير كده كل حاجة من جوا بس لكن من برا لوح تلج والمشكلة أن صحابي فاكرينها ميزة وبيقولولي يا بختك وقت الامتحانات بتبقى عادي وشكلك واثق من نفسك وقت المشاكل والأزمات بتبقى ولا كان حاجة حصلت وقت الحزن والمواقف الوحشة بتبان قوي قدام الناس أما مثلا ممكن اي حد فيهم يضعف عادي ويعيط قدام الناس وبيتمنوا يبقوا زيي وللاسف مش عارفين اني في عذاب وان العياط ده نعمة من ربنا عشان تخرج اللي جواك بس هو الواحد مش بيحس بالنعمة غير لما تروح منه وانا مثلا ممكن يكون آخر موقف عيط فيه كان من سنتين لو مكانش من ٣ سنين كمان ومن ساعتها مش قادر اعيط تاني

معرفش صراحه حسس عمري ما حبيت ولا جربت شعور حب بس وقت في ذنوب لا تعقل وي صحبت كتير اوي بس يعني يا ترا هل حب حلو زي ما بيقولو ولا خصلي تبلد مشاعر زهقان ادعولي اتجوز يا جماعه 😔😔 علي لأقل بدل ما اكتب كدا كان زماني في حضنها

الأجازة صعبة أوي بجد وانا مقضياها مع أهلي عبارة عن مشاكل و خناقات بس حرفيا و قيود بطريقة صعبة انا مبطلعش من اوضتي يعتبر ببدأ يومي لما هما بيناموا علشان أي حاجة بعملها بيتعلق عليها مش هنسى وقت لما نتيجتي ظهرت وانا كنت بحاول طول السنة أعمل الي اقدر عليه و زيادة علشان اجيب درجات كويسة و في الآخر يوم النتيجة ولا أكن في اي حاجة ولا اكني عملت حاجة ولا حد كان مهتم انه يجيبها زعلت اوي والله وانا تعبي كله كان علشان أرضيهم و أجيب مجموع يفتخروا بيه والله قبل ما يكون علشان نفسي بجد العيشة في البيت علطول صعبة انا عارفة حدودي و عندي مبادئ فا انا لو بقيت لوحدي هقدر عادي اتعايش من غير ما اعمل حاجة غلط فا ليه كل دا بجد و بتجنبهم بأني أفضل ف اوضتي 24 ساعة و دا بيخليني مش عارفة اعمل حاجة فحياتي أصلا أنا عارفة انهم مش لازم يكونوا ناس وحشة واني ممكن اكون شايفاهم غلط بس عمر ما حد حاول يديني مشاعر او يفهمني انا الحاجة الي ربطاني بيهم بس الفلوس يعتبر مفيش بيننا أي مشاعر بجد انا جالي تبلد مشاعر بسبب دا

حالة صمت وسكوت وتبلد مشاعر ولامبالاة غريبة بقت عندي مبقتش اشتكي من اي حاجة ولا حتي قادرة اتكلم واحكي بقت احس ولا حاجه بتفرحني ولا حاجه بتزعلني كأني عايشة كدا من غير روح يعني مثلا في ناس بتشكتي من الوحدة ومعندهاش حد انا كمان كدا في وحدة تامة تماما بس مش بشتكي لان مش قادرة ومفيش حل بقيت احسد الناس الي بتعرف تعبر وتشتكي وتطلع اللي جواها انا كنت كدا زمان بس مش عارفه ايه الي حصلي والموضوع قلب معايا بتبلد في كل حاجة بقيت احس بتوجع من جوايا في صمت تام مبقتش ادي اي رد فعل لاي حاجه ممكن تحصل الحاجات الي ممكن تعصبني مبقتش تعصبني الحاجات الي كانت بتفرحني بشوفها مملة انا مش عاجبني حالي ومش عايزة ابقي كدا وخايفة افضل كدا ومش عارفه اخرج من اللي انا فيه دا ازاي البرود واللامبالاة الي عندي ع قد ما هي حاجة بتريح دماغي بس شعور بيوجعني اوووي من جوا صمت بيموّت بالبطيئ

من كتر الخزلان ال شفتها فى حياتى من اصدقاء او اقارب مبقتش ازعل من اى حاجه بتحصل تانى او مبقتش افرح من اى موقف حلو بحصل معايا جالى تبلد قوى وبقيت اعرف استغنى عن اى حد حتى لو كان عزيز عليا حاسس انى بقيت قلبى حجر

لسه من قريب حاسه ب تبلد مشاعر وعدم قدره علي الكلام والحركه قاعده ف السرير مش عارفه افكر ولا اتعايش ولا اقوم ولا اعمل اي حاجة اكن دماغي اتشلت مش قادره افكر ومش حاسه اني في الدنيا هنا ولا عايشه مع الناس انا ف حتت توهان غريبه انا مش فهماها