حابه احكي... بتعرفو ، اغلب الاوقات ما بسمع النصائح اصلا . لاني ما بكون مستنييتها . بكون بس حابه احكي مرات بحكي مشان اخلص من الشعور اللي جواتي ، لاني بعرف انه بينطفي اول ما بحكي عنه ومرات بحكي لانه بعرف انه الاسرار اقرب للتحقيق من الاشياء اللي بنحكي للناس عنها من نفس منطلق (استعينو على قضاء حوائجكم بالكتمان ) انا حرفيا بكون بعمل العكس. مع انه مرات كتير ، انا بكون مبسوطه بهاي المشاعر اللي بدي اتخلص منها ، ومرات بحس انه هاي هيه الاشياء المناسبه الي ، ومع هيك بكون بدي اهرب منها .. مع اني بعرف اني بخسر هيك وانا ما بحب اخسر ، بس الخوف هو اللي مخليني دايما بحاول اهرب هل بندم؟ طبيعي اه .. يعني معلش بس مين فينا ما بيندم؟ عقلي حاليا وانا بحكيلكم هاد الحكي جدا مخربط . خصوصا اني لاول مره بتعرض لموقف جدي ، وبصراحه؟ ما كنت مصدقه الشخص الا لما بطَّل! مُضحِك شوي الموضوع ، وغالبا انتو عند هاي النقطه بطلتو فاهمين شو بحكي (هاد اذا كنتو فاهمين من الاول اصلا😂) بس يعني حكيتلكم .. انا بس حابه احكي.. المهمم انه انا حاليا مشاعري مش مستنزفه مع هاد الشخص ، وما حد فينا بعد هيك متأمل اي شي من التاني، ومش بتفاهه وضحك على بعض! لأ ، هو رجل عاقل ومحترم لدرجة انه لما فهم انه الموضوع صعب جدا ، رجع بكل وضوح وشفافيه . وانا متقبله موقفه 100% وبالعكس ، انا وثقت فيه اكتر بعد ما رجع بهاي الطريقه الواضحه. صح كان الاسلوب مش احسن اسلوب (ما كان سيئ بس كان بيقدر يكون افضل) بس انا راضيه تماما عن النتيجه . صح بالاول انزعجت اول ما قرأت الرسالة ، وتحججت بحجه تافهه جدا مشان اخد بريك منه (والنيه كانت بريك ابدي) بس بعد ما صليت ركعتين وتنفست شوي ، قدرت افهم موقفه وقدرته جدا.. الله يحميه وينوله كل اللي بباله ، ويجعل حياته مليانه خير ، ويبارك بأله على انهم ربو رجل حقيقي . صارلي زمان كتير ما شفت رجل نفسه بين جيلنا وفي مجتمعنا .. ويا رب الله يعوضني بالاحسن دائما ، مش الأحسن منه! وانما الأحسن لقلبي وواقعي وحياتي وآخرتي... انا فعلا لسا متخربطه ، بس راضيه ومبسوطه ، وكالعاده بحكي الحمدلله .. على فكره ، انك تحمد الله على كل شيء هو احسن شي ممكن تعمله لنفسك! عن تجربه يعني الله نفسه حكالنا (لئن شكرتم لأزيدنكم) يعني بتشكر وبتحمد ف بتتعوض لو مكسور ، وبتزيد سعادتك لو مبسوط ... واذا محتار نفسي؟ بترضى وبتستنى الجاي اللي بتكون متأكد انه رح يكون جميل وحنون على قلبك .. صح على ذكر الحنيه ، هو شخص جدا حنون .... الله يحميه عنجد. شباب ما بمزح معكم ، ما في قد الحنيه بتسرق قلوبنا احنا البنات ...