السلام عليكم ورحمة الله وبركاته 🌸. نيو اكونت 💅🏻. المهم، عندي مشكلة كبيرة اوي بجد ومش عارفة اعمل فيها ايه ف ياريت تساعدوني (محصلش كده كده). المهم تاني، عارفين يا جماعة قصة قارون والرمل؟ هي كده كده مش حقيقية، بس ادركتوا فيها حاجة؟ بغض النظر عن النسخة برضو، لانهم نسختين فيهم اختلاف شوية، بس في الحالتين؛ لاحظتوا ان النتيجة كانت ان الناس بتشتري رمل؟ كل ده عشان بس قارون كان ذكي ف حاجة بنسميها دلوقتي "الماركتينغ". النسخة الاولانية عبارة عن ان الناس تحدته يبيع شيء بلا قيمة، ف هو غلف الرمل تغليف فخم واقنع الناس بقدراته السحرية في جلب الرزق وحفظ المال وان ده سر ذهبه، والنسخة التانية انه قعد يحول اطنان من الرمل لبيته، ف الناس اتخدعت وافتكرت ان عشان واحد زي قارون عنده الكم ده من الذهب يهتم بالرمل، ف هو اكيد شيء ثمين جدا، ف في الحالتين كله اندفع عشان يشتريه. الاتنين حاليا بيحصلوا مش بس في السلع، لا في الكليات في الشكل في اللبس في الاكل، تقريبا اغلب الترندات الحالية على التيك او اليوت او الانستا او غيرهم، معتمدة على نفس المبدأ. الآيفون كأقرب مثال، هاتف بلا قيمة للأمانة في رأيي. آه مقدرش انكر مميزاته ابدا، بس هل حد هنا معاه آيفون يقدر يقولي هل السعر مقابل للقيمة فعلا؟ رغم انه تلفون عادي جدا، فيه احسن منه كتير او مقاربين ليه، وفي فئة سعرية اقل بمراحل بالمناسبة، بس هل حد فكر كده؟ ابدا، لان ستيف جوبز، او ايا كان من هو المسؤول عن اسلوب التسويق العبقري ده، ربط الآيفون بالثراء والمكانة العالية، ماركات عالمية لعربيات وملابس مقدرتش تعمل اللي هو عمله على تلفون حتى الكواليتي بتاعته بتقل سنة بعد سنة. ربط حاجة معينة بمكانة شخص معين هو في حد ذاته المشكلة، انا مش هحتقر بني آدم -مجازًا طبعا- معاه مرسيدس الا لو كان فعلا شاريها وهو معهوش فلوسها عشان بس يرضي المجتمع، ده علطول عنده نقص، ونقص واضح اوي كمان. كلية الطب او الهندسة، ترند الclean girl مثلا، البراندات العالمية، اساليب اللبس والاكل والاتيكيت (مش كلها بس زي انك مثلا تسيب اكلك عشان الناس متقولش عليك محروم رغم ان ده حرام)، وغيرهم كتير. عادات انا نفسي بتجبر عليها قسرًا لان البيئة اللي حواليا اجبرتني على ده، بس لازم ندرك حاجة، مش المفروض اشتري حاجة بمبلغ انا فعلا مش محتاجها، على الاقل انقي فعلا اللي هيفيدني، لكن ده اسمه تبذير وغباء مع احترامي، وانا بوصف نفسي بده عموما لاني ضمن نفس الفئة. المجتمعات اللي بتجبرنا على شراء لبس معين او دخول كلية معينة او فعل تصرفات معينة، لمجرد اننا نبان عيال ناس، دي مجتمعات متخلفة، واظن البُعد عنها هو اسلم حل، او على الاقل، اتصرفوا التصرفات دي واشتروا لبس معين لتلك المناسبات اللي هتقابلوا فيها المجتمعات دي، لكن ميكونش ده اسلوب حياة، وترجعوا تشتكوا من الضغط والاكتئاب والتعب، مهو بسبب ضغوطات مختلة زي دي اجبرتوا نفسكوا عليها وهي حتى بلا داعي.
