جزائري

باه نتفاهمو على حاجة ، علابالنا كامل بلي الرزاق ربي سبحانو و هذي نبدا بيها السطاتي باه كي تجي تكتب تعليق تفكر بلي راني كاتبهالك هي اللولة الرزق تاعك يلحقك يلحقك سوا هنا سوا في أرض اخرى يعني نتا مجرد سبب ، و راح تدي غير أجر السعي تاعك ، و هذي لي راح نهدر عليها فالسطاتي كشاب جزائري ، بلادي ماوفرتليش الفرص و قمعتني و تدفع فيا للانحراف اللامباشر ، وش نقعد ندير لهنا ؟ في نفس الوقت نشوف بلي في بلاد اخرى الفرص متاحة ، في ميزك نبقى هنا مربع يديا و نبقى نفتي لروحي حرام و حلال ؟ في نفس الوقت لي أنا مطالب فيما بعد نجاوب على سؤال شبابي فيما افنيته ؟ .. على الاقل تكون الاجابة لنيل اجر السعي خلف ما كتبه الله لي ، مش مربع يديا راني مطالب نسعى مانبقاش مربع يديا ، رزقي علابالي كاتبهولي ربي كيما راني كاتبها في بداية السطاتي هذا ارجع اقراها و كي تقول بلي ربي سبحانو قدرلك رزقك ما يعنيش انك تربع يديك و تكالي الحيط و تشوف شبابك ينسرق منك و ساكت ضارب المهبولة و مليكيدي و تقول ربي كاتبلي رزقي ، ربي كاتبلك انعم ايه و نتا مطالب تسعى .. و تدي اجر السعي لا اكثر و لا اقل ، قادر تلف الارض كامل و فلخر خبزتك مكتوبتلك في بلادك ، مانقولوش بلي هاجرت باطل ، بل نقولو بلي ديت اجر الهجرة و السعي ، طالما كانت الهجرة فيما يرضي الله طبعا لازم تسعى و تاخذ بالاسباب ، و على سبيل المثال موضوع الهجرة ، الهجرة تعتبر سبب ، و كي نقولو هجرة ماتفهمهاش بلي اوروبا برك ، ارض الله واسعة ، و كي نقول الهجرة مانهدرش على الحرڤة ، نهدر على الهجرة الشرعية بكوارطك و شانك مرفوع بطرق سليمة و الهجرة لازمها شروط أولها لازم تكون فاهم دينك مليح و تقدر تواجه الفتن لي لهيك باه ما تنحرفش على الطريق ، و لازم يكون الهدف تاعك في ما يرضي ربي سبحانو ، و مام الخدمة لي راح تخدمها لثم لازم تكون في اطار دينك ماتقوليش نخدم في ريسطورو يطيب الخنزير و تقولي الله غالب محتم ، و لا تخدم ديليفري في Ubert و تليفري الشراب و الحلوف فالماكلة و تقولي خبزة لالا يكذب عليك ، لازم النقاط هذو تكون فاهمهم مليح قبل ما تهاجر ثانيا لازم يكون الهدف تاعك من الهجرة صحيح و يرضي ربي ، مثلا عمل ، دراسة شيء غير موجود في بلادك ، نشر الاسلام و العلم الذي ينتفع به ، و الامثلة بزاف .. ثالثا مالازمش تنسى سبب وجودك في هذ الارض ، باه تعبد و تشد في دينك حتى تخلاص فترة الامتحان و باذن الله الجنة تستنى فيك اذا كنت موحدا لله و تعنل بما جاء به قولا و فعلا و تصديقا .. هذا فيما يتعلق بالهجرة باه نلخصوها خاطر كاين لي يتأثر بمواضيع سطحية يعالجوها الناس و ما يبحثش و يطيح في ديبريسيون ما بين يروح لهيك ولا يبقى هنا ، و هوما في زوج خياران احلاهما مر ، لان الحلاوة غير موجودة في الدنيا بل في الآخرة ، و الآخرة هي ما نبحث عنه في الأخير الهجرة لازمها شروط ، اذا توفرو فيك يعني راك جندي مسلح تقدر تتمسك في دينك و تشد روحك نهار تقوى عليك الريح ، و اذا رحت اعزل لثم مستحيل تقدر تحارب و نتا اعزل و راح تخسر دنياك و آخرتك بسبب قرار غبي ناتج عن سوء دراسة و جهل منك .. شد في ربي هو وكيلك و طالما راك شاد في ربي انسى تضيع ، مهما كان القرار لي راح تتخذو شد في ربي و توكل عليه و اطلب يعطيك خيرو و يبعدك على شرو ، مهما كان الهدف ، هجرة عمل زواج ، توكل على ربي سبحانو و قلع ما تبقاش مربع يديك .. فقط توكل على الله و اتخذ الاسباب و ربي يوفقكم ڤع