جفاء

مضايقه اني على اعتاب هفسخ خطوبتي مش عارفه انا هنا ليه اصلا وبعمل ابه بس حقيقي الواحد مخنوق مش من فكرة الفسخ يل من اللي حصل من الطرف التاني مع انه كويس اوي وابن اصول وكان حنين معايا فجأه بقى بيتعامل بطريقة كلها جفاء خصوصا في الزعل هو انسان كويس بس مش مناسب ربنا يصلح حاله. انا زعلانه اني ضاع سنه من عمري في السراب لكن لعله خير الحمد لله.

أصعب معادلة ممكن يحلها مهندس ميكانيكا، هي إزاي يرمم قلبه اللي اتكسر من أقرب الناس ليه. أنا عندي 25 سنة، والنهاردة بفضل الله وصلت للي كان أهلي بيحلفوا إني مش هوصله. بقيت مهندس في شركة كبيرة، وبنيت نفسي من تحت الصفر، بس وأنا بطلع السلم، كانوا هما "الثقل" اللي بيسحبني لتحت مش السند اللي بيرفعني لفوق. أنا مش جاي أتباهى بنجاحي، أنا جاي أسأل سؤال محيرني ومخلي طعم النجاح مر في بقي: هل النجاح بيمحي الظلم؟ دلوقتي بعد ما بقيت "البشمهندس" والكل عايز يقرب ويتمسح في نجاحي، أنا جوايا جفاء وبرود ناحيتهم زي الحديد اللي بشتغل فيه. أهلي اللي ظلموني وقهروني سنين، دلوقتي مستنيين مني "بر وحنية" وجميل، وأنا مش شايف ليهم أي جميل عليا غير الوجع. محتاج رأيكم في 3 حاجات فاتحين في قلبي نار: هل من حق الأهل يطالبوا بـ "ثمن" نجاح هما أصلاً حاولوا يهدوه؟ إزاي أتعامل مع "نظرة الاستغلال" اللي شايفها في عينيهم دلوقتي بعد ما بقى ليا منصب وفلوس؟ هل أنا إنسان سيء لو قررت أعيش نجاحي "لوحدي" وأكتفي بصلة رحم رسمية جداً عشان أحمي اللي فاضل من أعصابي؟ أنا في صراع بين "البشمهندس " اللي المفروض يكون قدوة، وبين "عبدالله الإنسان" اللي مش قادر ينسى اللي حصله.

في موضوع حصل معايا وكونت عايز حد ينصحني اتخطه ازاي انا اخرجت من كليه كان قبله وضعي المدي مش احسن حاجه بس الحمدلله دلوقتي ربنا ميسرها قبل التخرج بتعي كونت بحب بنت خالتي جدا وكونت وعدها بلجواز بس بعد ما اتخرجت الوضع اتغير جدا بقت ترد عليا ردود مش كويسه وكانها بتبعدني عنها وقلبي حاسس ان بقا في حياتها حد ونا ولله بتمنهالها الرضا ترضه بس مخنوق جدا بسببها وحاسس ان حياتي وقفها وده كل الموضوع