جهاد النفس

جماعه اعمل اي في التفكير والحنين لذنب ما وشعوري وقتها بس ع الطريق الصح وبصلي وتمام بس تدور الفكرة بجاهد نفسي وبشغل نفسي وتمام جدا لكن ع اخر اليوم وفي توقيت غير محسوم او مترتب او سابق تفكير بلاقيني وقعت المشكلة دا بيأثر معايا احساس بالذنب يومين وانه مافيش فايدة والاقيني رجعت لمدة يومين لعاداتي سيئة وعدم صلاة بجد اعمل انا كرهت جهاد النفس ومحاولاتي الفاشلة حقيقي ، المشكلة بحارب واقول بلاش لان دا هيأثر وبصبر نفسي بآيات وربنا مطلع بس كل دا مش بتأثر بيه استغفر الله ، بجد تعبت

أصعب حاجة في الدنيا… إنك تكون لوحدك في معركة محدش شايفها. مفيش حد هيشجعك، مفيش حد هيقولك "برافو"، ومفيش تصفيق في النهاية… بس ربنا شايف. جهاد النفس مش إنك تبقى مثالي، جهاد النفس إنك تقع… وتقوم، تغلط… وترجع، تضعف… بس ماتستسلمش. إنك كل يوم تكسر جزء من شهوة، وتهزم فكرة غلط، وتقاوم حاجة إنت نفسك فيها… عشان ترضي ربنا. ويمكن محدش يلاحظك، بس في السما… بيتكتب اسمك كل مرة بتقول "لا" لنفسك. عارف أخطر حاجة؟ إنك تبطل تحاول. إنك تقول "أنا كده خلاص"، وهنا بتخسر فعلاً. بس طول ما إنت بتحاول… حتى لو بتقع ألف مرة، إنت لسه في الطريق الصح. افتكر، اللي بيجاهد نفسه بصمت… ربنا بيجبره بكرم مفيهوش حساب. لو حد حابب يحكي اي حاجة يحكي💙 Fresh Lemon

في كل مرة بتختار تسكت بدل ما تجرح، بتسامح رغم إنك موجوع، بتقاوم عادة عارف إنها بتكسرك، أنت مش ضعيف… أنت في معركة. جهاد النفس مش إنك تبقى كامل، جهاد النفس إنك تحاول كل يوم تبقى أحسن من امبارح، حتى لو خطوة صغيرة. أصعب حرب مش اللي مع الناس… أصعب حرب هي اللي جواك، بين صوت بيشدك للغلط، وصوت بيقولك “استحمل… ربنا شايفك”. ويمكن محدش شايف تعبك، ولا حد حاسس قد إيه بتجاهد عشان تبقى صح، بس ربنا شايف… وبيكتب كل مرة انتصرت فيها على نفسك. افتكر دايمًا: أعظم الانتصارات… هي اللي محدش بيشوفها غيرك وبينك وبين ربنا. Fresh Lemon

مساء الخير 🌸 "ويل للعرب من شر قد اقترب، فتنا كقطع الليل المظلم، يصبح الرجل مؤمنا، ويمسي كافرا، يبيع قوم دينهم بعرض من الدنيا قليل، المتمسك يومئذ بدينه، كالقابض على الجمر" حقيقي كل ما بكبر وبقابل حاجات وناس كتير أوي بفهم قد ايه صعب ان الواحد يحافظ على أخلاقه وعلاقته بربنا في الزمن ده .. زمن كله فتن وشرور وتسهيل للحرام بكل أشكاله زمن بيتقال فيه للمحترم انه معقد يمكن كمان يسخروا منه ويتجنبوه .. فيفضل وحيد منبوذ وكأن الأية اتقلبت زمن بقى الصح فيه أقلية .. زمن قاسي والرزق الحلال صعب وشاق لأقصى حد بس يكفينا اننا بنجاهد ..حقيقي جهاد النفس بكل طرقه حاجة كبيرة أوي يكفينا ان كل ابتلاء وكل لحظة صعبة وكل احساس مؤلم في ميزان حسناتنا لعله شفيع لنا يوم الحساب 🤲 الدنيا فانية وكلنا رايحين وأتمنى بجد يكون ربنا راضي عني اللهم اقبضني إليك وأنت راض عني وأحسن خاتمتي وأعني على نفسي 🤍🤍