حب حرام

حاسه بوجع جامد جدا في قلبي و مش عارفه اعمل ايه حاسه الدنيا كلها فوق دماغي و ضدي ، امبارح حصل موقف واجعني اوي اخويا الاصغر مني بخمس سنين شك فيا و دي مش اول مره تحصل انا في تالته كليه امبارح كنت بعمل لصاحبتي ريكوردات وبنتكلم جه قالي بتكلمي مين قولتله فلانه و وريته الشات قالي وريني الcalls وريته اني مش مكلمه غير بابا و ماما قالي وريني باقي الواتس قولتله لا عشان دي خصوصيه غير كمان اني اتضايقت من الموقف جامد انت بتتعامل معايا كده ليه المهم راح قال لوالدي و والدتي وقعدنا نتكلم و انا قعدت اعيط عشان صعب عليا نفسي اوي انه ليه محطوطه دايما في موضع شك , خلاصه ساعة و نص حوار انه انا اللي غلطانه عشان قاعده في الصاله لوحدي واني حطيت نفسي في موضع شبهه يخلي اخويا يشك فيا و اسلوبه ده تبريره انه اخويا و خايف عليا و بيغير عليا و كل الكلام ده المهم انا مشكلتي اني مرتبطه بقالي سنتين وكام شهر بزميلي في الكليه ( عارفه انه حرام و بالفعل سيبنا بعض كذا مره بسبب انه حرام بس للاسف كنا بنرجع تاني و مبنقدرش نكمل شهر حتي) انا دلوقتي حكيتله اللي حصل في البيت قعد طبعا يعتذرلي و حقك عليا و انا السبب في كل ده انا اسف وقالي هما حلين ملهومش تالت يا نتكلم وتمسحي الشات اول باول وانا محبش الحل ده يا نسيب بعض لحد ما ربنا يكرمني واجي اتقدم و من ترك شيئا لله عوضه خيرًا منه ( احنا في كليه طبيه لسه فاضل سنتين و سنه امتياز) وكده كده احنا اصحاب في شله في الكليه كلنا و بنتعامل كلنا بس يعني مش هنتعامل برايفت في الشات او كده هنرجع زمايل بس اهلي و البيت كله عارفين اني عندي شله مختلطه وماما بس اللي عارفه بموضوع الحب و الارتباط ده المهم انا دلوقتي كنت تعبانه نفسيًا جامد قولتله خليني اهدي و ناخد القرار ده سوا و نشوف هنعمل ايه انا من امبارح كل ما اتخيل انه مش هيبقي موجود في يومي بتجنن و بقعد اعيط و قلبي بيوجعني رغم اني عارفه انه ده الصح بس مش عارفه هعمل ايه و مش عارفه طيب اخد القرار ده امتي انا عندي امتحانات هتخلص في نص يونيو ، هل اخذ الخطوه دي بعد امتحاناتنا ولا دلوقتي ولا استني بعد الامتحانات عشان اعرف انهار براحتي وميعطلش مذاكرتي ولا اعمل ايه طيب استني في الاجازه عشان كده كده مش هشوفه في الاجازه وفي الاجازه اشغل نفسي بحاجات و اتعود علي غيابه ولا اعمل ايه دلوقتي انا مش عارفه هو بيشتغل بقاله سنتين و بيحوش و عنده كمان شقه بس علي الطوب الاحمر في بيت عيلته و مش جاهز برضو يتقدم دلوقتي و حتي و لو معرفش رد فعل اهلي و بابا هيوافق ولا لا و مش عارفه بس انا قلبي واجعني

في موضوع فعلا خانقني و مش عارفه اعمل ايه انا الحمدلله طالبه في كليه طب و قدامي سنتين و اتخرج و سنه امتياز في جامعه خاصه الحمدلله ، في سنه اولي اول ما دخلت الكليه كنت حابة يكون عندي اصحاب و مكننش عارفه انه الاختلاط غلط لان كل اللي اهلي قالوا عليه قبل الكليه انه لو خبيتي حاجة علينا تبقي غلط غير كده لا ، و دخلت الكليه و كان عندي شلة اصحاب ولاد و بنات و اهلي عارفين عادي خالص و عارفين زمايلي الولاد كمان و كانت شلة كبيره و في الاخر بقينا ٥ ولدين و ٣ بنات و في الفتره دي في زميل ليا اعترفلي بحبه وانا كنت خايفه و رافضه و كان مجرد يعني زميل في قبول بس مش اكتر و احنا اصحاب و كده ، المهم قولت لوالدتي وقتها و ملقتش منها رفض بس نصحتني نحتفظ بصداقتنا و مع الوقت حبيته و والدتي عرفت و بالصدفه جت الكليه عندي يوم و اتعرفت علي كل اصحابي و عندها خلفيه اننا قريبين من بعض ، انا و هو مع بعض بقالنا سنتين و كام شهر في السنتين دول سيبنا بعض يجي ٣ مرات عشان بعد ما حبيته ادركت انه حرام و غلط العلاقه دي تكمل بس كل ما نسيب بعض كنا نرجع لان في بينا اصدقاء مشتركين و محدش يعرف انه في بينا حاجة عشان هو رافض طبعا عشان خايف عليا و علي سمعتي بس غصب عننا بنتعامل مع اصحابنا و مشاريع الكليه و كده انا دايما حاسه بتأنيب ضمير ناحيه العلاقه دي مع انه والله شخص كويس جدا و محترم و عنده طموح يعني بيشتغل طول الفتره دي و حتي في الدراسه مع ان الكليه صعبه بس برضو مهتم بدراسته ( بيشتغل مدرب سباحه) عنده شقته في بيت اهله شقه منفصله يعني هو في سلم خارجي و الشقه في نفس البيت بس ( الموضوع ده انا قلقانه منه بس هو بيتكلم بقلب جامد و انه محدش هيدوسلك علي طرف و اتعهد قدام اهلك انه او بعد الشر حصل اي مشكله هننقل فورًا بس انا مش هقدر اجيب دلوقتي شقه بره و الظروف و لحد ما يبني نفسه بس مش ده موضوعنا دلوقتي) هو عنده شقه و قدي في الكليه و شاطر و مجتهد عنده طموح بيحبني بس انا فعلا مش قادره ابعد عنه مش عارفه و خايفه من ربنا وبقعد ادعي ربنا يهديني و خايفه منكملش و ربنا يعاقبنا بحبنا ده انا فعلا مكنتش اعرف انه غلط غير بعد ما حبيته للاسف و بحس بتأنيب ضمير و بعيط و بتعب نفسيًا بس مش عارفه اعمل ايه انصحوني اعمل ايه

بتنسوا شخص كان قريب منكم و كان بيحكيلكم كل حاجة و حتي لما بعدتوا علشان حرام طول الوقت بتفكروا فيه و علاقتكم مستحيلة انها تكمل او تكون اخرها جواز الوضع صعب فعلا و مش قادره ولا عارفة انسي و بروح ابعتله و بتبسط بكلامه بس عايزة ابعد و في نفس الوقت عايزة اقرب