حضانة

حاسة بحزن لدرجة ان جسمي بيرتعش حتى في الجيم كنت بسرح طول الوقت حتى البنوتة المسؤولة عن الاشتراكات قالتلي مالك انا مبحبش اشوفك كدا ذكريات مؤلمة صحاها موقف واحد اهلي سبب معاناتي في الحياة بجد مهما حاولو يساعدوني دا غير ضغط الحضانة الزفت انا تعبااااانة اوي ونا بعمل استرتشات دموعي تجمعت في عيني

انا تعبت اوي بجد وجبت آخري ماما وبابا متخانقين مع بعض وبينتقمو من بعض فينا ماما مش راضية تطبخ وبابا مش راضي يجيب اكل من برا وانا شغالة في حضانة وطالع عين امي فيها لاني بدي فصل تمهيدي ٤٠ طفل ومسؤوليتي اخد بالي منهم والجو صعب اوي ف انا تعبت بجد بقالي يومين برجع ميتة وملاقيش اكل غير الجبنة ولما جيت اقوله ملناش ذنب ونا بقالي يومين جعانة وباخد ادوية نفسية مش عارفة اخدها بانها محتاجة تتاخد بعد الغدا وتقيلة راح مديني فلوس وقالي انتي لا بنتي ولا اعرفك ساب البيت ومشي ومسبش فلوس خالص وكمان انا تعبت من الحضانه ونفسي اسيبها بسبب المجهود الجبار ومرتبي ١٠٠٠ في الشهر نفسيا وجسديا مبقتش قادرة وفي نفس الوقت قعدة البيت غلط عليا نفسيا اعمل ايه

النهردا يومي كان مؤلم نفسيا جدا وتوتر في ولد في الحضانة في الفسحة كان بيلعب راسه خبطت في الحيط ونزل دم كتيرمنظر الدم خوفني اوي تفكيري اتشل والعيال كلها طلعت متخربشة وجايبة دم من وشها ومناخيرها برضه مع اني عيني عليهم طول الوقت في الي لحقت افصلهم عن بعض وفيه الي خربشو بعض ولما رجعت البيت بابا وماما اتخانقو جامد ولما طلعت اريح بعد الحضانة خبطت الترابيزة وكسرت برطمان قزاز وقعدت الم فيه

لحظة ادراك اني عملت مصيبة بعد يوم طويل في الحضانة قاعدة في امان الله افتكرت اني علمت العيال يكتبو رقم ٣ معكوس عكست مكان عصاية ال ٣ حرفيا ربنا يسترها عليا اولياء الأمور ومديرة الحضانة هيعملوني كفتة انا متعودة اكتب الارقام بالانجليزي من صغري ف الماث عندي تمام انما الحساب يختااااااي يارب استرها🥲

اي رايكم كل واحد يحكي حاجة حلوة حصلت معاه النهارده مش شرط تكون واو ممكن مثلا شربت قهوة حلوة شوفت حد بتحبه خلينا نفتكر الحلو في حياتنا ونا هبدا في طفل نام في حضني في الحضانة وكان شبه الملايكة فكرة انه حاسس معايا بالأمان جميلة اوي

شغلي في الحضانة خلاني مؤهلة لتحمل المسؤولية وغيرني. تماما كنت بخاف من فكرة اني لما اتجوز هكون مسؤولة عن طفل او اكتر لكن اكتشفت ان عندي قوة صبر وتحمل بقيت بتحمل عياط كذا طفل مع بعض ٦ ساعات متواصلين في وشي حرفيا وان مهما الطفل عمل مصايب فهو في الآخر طفل مش مدرك الي عمله لازم نحتويه بهدوء منغير منتعصب منه وانيم الطفل على رجلي وينام في حضني زي الملايكة بعد مبهدلني وعمل مصايب سودة وضرب العيال 😅