أنا عندي 21 سنة وبحس بجفاف عاطفي جامد جدًا، فوق الطبيعي بكتير حياتي الاجتماعية شبه معدومة، عندي صحاب بس بنخرج بالعافية مرة كل شهرين أو تلاتة، فباقي الوقت أنا لوحدي.
أمي منفصلة عن ابويا وأنا عندي سنتين، وده خلاني متعود أقعد لوحدي أغلب الوقت حتى في رمضان 2025 قضيته لوحدي2026 كنت هقضيه لوحدي بس امي مكانتش شغالة وقعدت
عمري ما دخلت علاقة حقيقية، وكل تعاملي مع البنات في حدود الشغل بس، وكمان بيبقوا أكبر مني بخمس سنين على الأقل، غير إن شغلي في الكورة تقريبًا رجالة (حوالي 95٪)، فمفيش فرصة أصلاً أتعرف على حد غير الرجالة
عندي معارف كتير جدًا، موبايلي فيه أكتر من 2000 رقم، بس كله شغل أو مصالح مفيش حد أقدر أتكلم معاه براحتي أو أحكيله عن مشاعري أو يومي يعني لو احتجت حد في شغل هلاقي، بس لو محتاج أفضفض… مفيش.
ببقى محتاج اهتمام جدًا، نفسي ألاقي حد أشاركه تفاصيل يومي، أحكيله اللي مضايقني، نهزر ونضحك سوا… بس ده مش موجود في حياتي خالص.
لما بعمل حاجة مهمة زي تحاليل أو حتى يوم عادي، ببقى نفسي في حد أكلمه فيديو كول وأحكيله، بس مفيش الأوبشن ده عندي.
كلمة “بحبك” أنا تقريبًا اتحرمت منها، ومحتاج الحنية والاهتمام بشكل كبير جدًا.
عيد ميلادي بيعدي عادي، شوية “كل سنة وإنت طيب” وخلاص، ممكن هدية من أمي بس… مفيش إحساس إن في حد مهتم أو فاكرني بجد.
بحس دايمًا إني لوحدي، ممكن أسافر وأرجع ومحدش يسأل عليا. موبايلي أغلبه شغل، وممكن أيام تعدي من غير رسالة واحدة شخصية كلها رسائل شغل
جربت قبل كده أدخل في علاقات معرفتش
من الناحية المادية الحمد لله مرتاح شوية، بدخل حوالي 8000 جنيه ومش بصرف كتير لان معنديش التزامات والأكل والشرب في البيت بس الفلوس مش معوضاني عن الإحساس اللي جوايا
بصراحة أنا تعبت… ساعات بعيط لوحدي بالليل، نفسي ألاقي حد في حياتي يهتم بيا، يسأل عليا، يشاركني يومي… نفسي ألاقي شريكة حياة بجد، بس مش لاقي، خصوصًا إن كل شغلي رجالة.
