صعوبة التواصل

هو ممكن فعلا نقابل ناس تشهبنا وتفهمنا والحياة تبقى سلسله ما بينا وسهلة ومنبقاش محتاجين مجهود عشان نبرر كل حاجه ولا خلاص العمر عدى ف الإنتظار 🥲 حرفيا فكرة العلاقات اللى بتستهلك طاقتنا دى مرعبة وفكرة اننا لازم نبذل مجهود مع كل خطوة صعبة

أنا مش عارف اذا كان السن هو السبب وعشان أنا كبرت ولا هي الدنيا كده والناس الي بتيجي مره مبتتكررش تاني او الناس بقت وحشه مش عارف بصراحه بس انا كان في حياتي ناس كتير زمان فاهماني وفاهمها وبعرف اتكلم معاهم ف اي وقت من غير تفكير لكن من بعد ما وصلت ٣٠ سنه والناس دي طبعا فترات بتيجي وتروح وانا مبقتش عارف اتعامل مع حد اكتر من يومين تلاته والكلام بيبقي بارد ملوش طعم مع كل الناس ، أنا مش عارف السبب فرق السن ولا الناس اتغيرت ولا انا الي كبرت !

بصو انا هتكلم حد هيفرق معاه ويرد تمام هلاقي محدش عبرني مش مهم انا كرهت كل حاجه بقالي يجي ٢٠ يوم مكتبتش حاجه هنا انا مقروفه اوي اوي اوي انا اكتشفت شيء عن نفسي اول حاجه انا مبحبش نفسي ومحدش يقولي حبيها انا واحدة معفنة ومفيش فايدة فيا نفسي مبتسمعش ام الكلام اتصرف ازاي وممكن ربنا يدخلني النار بسببها الغبية المقرفة حسبنا الله ونعم الوكيل تاني حاجه انا مبحبش حد ادركت مؤخرا ان كل الناس البعيدة القريبة ايا كانوا فانا مش بحبهم ومش عايزاهم يكونوا حواليا دماغي بتعاملهم ك task الي هو هقعد معاهم دلوقتي وابان شخص حلو ل اخر اليوم وهفرح بانتهاء المهمة ولكن انا م هقدر تكون دي مهمة دائمة يعني من الاخر انا بفضل القعاد مع نفسي مهما ضغطت عليها اني ابات عند جدي مثلا واسهر معاهم مفيش فايدة علطول بحس بغدر من الي قدامي وديما مش واثقة فيه تالت حاجه انا مش لاقية حاجه احبها خالص انا بحب ربنا اوي ربنا الاهم ديما بالنسبالي ولكن نفسي واقفة عائق كبيييييييير جدا مبعرفش اتحكم غي نفسي عارفين لما تكونوا قاعدين مع حد وعايزين تقولوا حجات وحد يجي يقعد وسطكم بالعافية فمتقدروش تتكلموا اهو ده نفس الي بيحصل مع ربنا لما بشتكيلو علطول احس بشلل فالكلام ومش قادرة اقول حاجه ابدا انا اعتقد اني منزوعة الحب اخري اهتم لو الشخص جديد عني وفي الاخر كلو هيروح يعني ولا عارفة اتواصل مع ربي ولا حابة نفسي ولا حابة حد انا وحيدة اوي والله

قولت كتير اني مبقتش عارف ادي فرصه لحد جديد يدخل حياتي حتي لو مجرد أصحاب نتكلم أو احكي لما اكون مدايق أو ارتباط أو اي حاجه وكل مره تجي واحده تقولك لأ مش كل البنات زي بعضها دي ناس مش تمام ومش كلنا كده ويادوب نتكلم كلمتين وتأكدلي أن كله بقي واحد فعلا معتش في حد سالك ودوغري وواضح او حتي حد ترتاح وانت بتكلم معاه وعشان كده دايما برجع ادور علي الناس القديمه الي مش بلاقيهم ولا هلاقي زيهم

ايه الاخبار عاوز اشارك حاجة غالبا انا كدا هفضل طول عمري وحداني ومعارفي وصحابي قليلين او معدومين تماما زمان كنت منعزل جدا لدرجة معنديش اي مهارات تواصل اجتماعي ابدا وكنت مكتئب تماما فقررت اني اشتغل على المهارات دي وفعلا اتحسنت جدا ومبقاش عندي رهاب زي قبل كدا يعتبر اختفى حاليا بس اللي اكتشفته اني من كتر وطول مدة عزلتي بقيت عايش جوا دماغي وبرتاح اكتر هناك وارض الواقع مرهقة ومزيفة ومش شبه توقعاتي كنت زمان اتمنى اتعرف على اكبر قدر ممكن من الناس واقرب منهم اللي ارتاحله ليا بس لما خرجت وعرفت ناس بردو مش حاسس اني مندمج معاهم ولا بكون مهتم ارجع اسال ولا اظبط خروج وهكذا كل دا حلو دا حتى انا اكتشفت اني بميل للهوايات الفرديه زي العزف مثلا او القرايه او المشي او المزيكا او الافلام وبكره جدا الكوره واي حاجة بيشجعها ناس كتير فنا مش عارف مفروض اعمل ايه احل الموضوع ازاي لان مش بكون زعلان ولا حاجة غبر لما اتحط في موقف والاقي نفسي وحيد في الحياة وده شعور لا اتمناه لاي انسان لانه مؤذي جدا الحياة صعبة ومؤلمة ومحتاجين لبعض اتمنى اكون اكتر سعادة في المستقبل

سلام عليكم انا عندي مشكله دايما بحس ان انا في معظم الاوقات خصوصا في شغلي ان مش بعرف اتواصل مع ناس زي اللي حواليه بيتواصلوا دايما عندي فكره التعامل دي ناقصه عندي او ده اللي انا واهب نفسي بيه مش عارف ده صح ولا غلط حاسس ان دايما في مشكله عندي من صغري انا مش عارف اتواصل يمكن عشان ما نزلتش كثير ولا اتعاملت اكمل شغلي للبيت ما حاولتش ادخل في نقاش مش عارف بتلخبط مشكلتي ان انا دايما بتعامل شغل بس الجانب الثاني ان انا اقدر اتعامل مع الاشخاص عادي هزار مش عارف اكون نفس الشخص زي اللي انا بشوفه حوالي حاسس اني متلخبط او مش فاهم بالاضافه ان انا دايما بحس ان انا بضايق الشخص اللي قدامي مع ان ده مش حقيقه ودائما بحس ان انا الشخص اللي قدامي ده متضايق مني لان ده مش حقيقه وما قاليش حاجه بس بحس فبقول له مالك انت زعلان مني لدرجه ان هم بيتضايقوا مني انما انا بقول حاجه زي كده حاجه كمان بحس ان انا مع ان انا بحاول تظهر ان انا ما اكونش كده فمش عارف

محتاج اتكلم جدا كنت قبل ما يتحدث زي الفل بتكلم مع ناس كتير لكن دلوقتي مش عارف خالص اتكلم مع حد نهائي اي حد بتواصل معه بيكون اخري اختراع حقير بيحجبني عنه مش اكتر يعني كاني جيت عندك وانت قفلت بابك بس انا بجد مخنوق جدا عايز حد يكون صاحي اغلب الوقت موجود اول ما ابعت القيه بيرد يكون فاهم هزاري وعارف انا هقول اي عايز حد مش موجود اعتقد

بتعملو صحاب ازاي ياجدعان، انا مابعرفش ابدا افتح كلام مع اي حد، علاقتي بالكل سطحيه مجرد سلام وبس، اكتر من كدا مفيش، وحتي لو اتصاحبت علي حد من غير تخطيط مع الوقت بيبعد يمكن عشان انا مش اجتماعي ومش بعرف اتعامل مع الناس بس انا مش وحش فعلا ومش بعمل حاجه تضايق الي قدامي مني وبكون حريص وبركز في تفاصيل يمكن الي قدامي اصلا مش شايفها، الي عاوز اقوله يعني ان سبب بعد الناس عني مش عشان انا وحش، يمكن عشان انا زي ماقولت مش بعرف اتعامل مع الناس ولا باخد راحتي مع اي حد بسرعه وكلامي مش كتير اوي وحاطت حدود، بس دا مش عشان انا مش قابل الي قدامي مثلا لا انا عشان هي دي طبيعتي ومش عارف اغيرها، انا واحد من صغري ماكنش عندي صحاب وكنت منبوذ وسط الناس ومازلت نوعا ما بس الموضوع قل شويه، فا طبيعي ماكونش بعرف اتعامل مع الناس ولا شبههم+ان انا من ساعة ماجيت الدنيا دي يعتبر منعزل في البيت وخروجي بيكون للضروره فقط، غير كدا هافضل قاعد في البيت لأن مفيش حاجه مستنياني برا مفيش حاجه تستدعي الخروج، انا اصلا الخروج من البيت دي حاجه تقيله اوي عليا، انا اه اتعودت علي الوحده والعزله وكنت بحبها زمان بس الوضع دا طول وبدأت اتخنق وماعدتش مبسوط بحالي وعاوز اغيره بس حقيقي مش عارف والموضوع صعب جدا عليا، حاسس اني المفروض افضل لوحدي عشان مايحصلش حاجه تندمني لأن انا دايما السيناريوهات الي برسمها في دماغي بتحصل، في النهايه شكرا للي كمل

عندى مشكلة مبحسش الحجات الى شباب جيلى بيحسوها بنزل الكليه او الكورسات بحس ان كل الناس دى سطحيه بيهزرو هزار رخم مع بعض وبيضحكو وبتاع بحس انى مش عايز اضحك ولا شايف اى داعى للضحك ده دايما بقرب واصاحاب ناس اكبر منى بضعف عمرى مثلا برتاح وسطهم الصراحه وبحس انى بفهم حجات او بتتحكى قدامى موقف بتكون شيقة بسمع وبتكلم ورئيي بيحترم اكتر من الناس الكبيرة شباب جيلى بحسهم اصغر منى وتافهين كمان بطريقة رخمه كمان مبحسش انى عايز اعمل الحجات بتاعت الى من سنى او انا عملتها خلاص كل الى بيبهرهم مش بيبهرهم مش عارف دى مشكلة عندى ولا دى سطحية الناس والجهل الى عمل فيهم عايز حد يفهمني ده اية

ازاي الواحد يعبر عن الي جواه؟ حاسس اني شايل جبل بالمعني الحرفي وعايز اتكلم واقول كتير بس مش بعرف اوصل الي انا عايزه لحد خاالص وعندي دايما خوف من فكره ان الي قدامي يكون مش فاهمني او شايف مشاكلي تافهه بالنسباله ..