صعوبة الثقة

الوحدة احسن مليون مرة من انك تكون مع ناس منافقة مبتحبكش جملة لحالي احلالي متقالتش من فراغ اتقالت عشان اللامة بقت كدابة والناس بقو بمليون وش اللمة الكدابة كترت الناس بقت بتدور علي مصالحها وبس فكرة انك تقدر تبسط نفسك لوحدك جميلة هتجيلك بعد سنين من المحاولات مع ناس مبتصونش العشرة لما تبقي لحالك هتكتشف نفسك صح

كنت اعرف واحده منقبه هنا جميله اوي وعندها شخصيتين عكس بعض تماما بس الفكره في الإحساس الغريب الي مش عارف أحسه مع غيرها من بعد التغييرات الي حصلت دي كلها ، كنا فاهمين بعض زياده عن اللزوم وعشان كده دايما كنا بنبعد عشان كل واحد فاهم التاني وعارف نقط ضعفه كان في تواصل غريب وحتي لو كان مجرد كلام معتقدش ان الموضوع او الشخص سهل يطلع من الدماغ خصوصا لو عرفت قبله وبعده ناس كتير ، بس حقيقي مبقتش عارف ادي فرصه لحد تاني ولما بحاول بزهق مش عارف اكمل اكتر من يومين مع أي واحده محدش بيفهمني

زي ما كل شيء جميل ليه توابع او ملحقات سيئة أنا بعاني بسبب صفة المفروض إنها ميزة النضج او ان ربنا منور بصيرتي وبفهم الناس اللي حوليا ومن مواقفهم بحلل شخصياتهم واصنفهم في دماغي من كتر الاشياء البشعة اللي مريت بيها والناس السيئة اللي عانيت بسببهم بقيت حذرة وصعب اطمن او اصدق شيء وأحيانا ببالغ ممكن تصرف واحد يخليني اتقفل من الشخص نهائي واتخيل ان ده بيترتب عليه حاجات وحشة تاني كتير ومعظم الوقت بيبقى صح بس أحيانا بخسر ناس بسبب الشيء ده ممكن تبقى كويسه وبخاف ابقى مرهقة ل اللي حوليا لإني بفكر كتير جدا في أقل شيء وفي نفس الوقت بحس اني مش فاهمة نفسي وخايفه ابقى شخص قاسي وبارد من كتر اعتيادي على التصرف بالشكل ده وكئني واخده وضع الهجوم دايما كئني في حرب متوقعه سهم من كل الجهات ومش عارفه أعالج النقطة دي او انا مش عايزه عشان خايفه اتئذي جامد بقيت مبحبش اتعرف على ناس جديدة او اتعامل عموما وجودي وسط ناس كتير مرهق جدا وبحب اقضي معظم الوقت لوحدي وطول الوقت محتاجه حد حاجه من الشيء ونقيضه في ناس في حياتي بحبهم عادي ومحبوبة وعندي صحاب كتير جدا بس لما بيبقى في تجمع او شيء مش بيبقى في دماغي غير اني عايزه اهرب ومش مرتاحه وبحس اني لوحدي بستوحش وسط الناس اكتر ما انا لوحدي

عمري ما اتعلقت بحد و جامد و سبنا بعض انا بعمل زي فلتر كدا مع نفسي اني مهما حصل مثقش ف الي قدامي دا بسبب مواقف قديمه كنت بتعلق بسرعه و فجأه الشخص دا يمشي ف انا دلوقتي كل لما حد يقرب مني انا الي ابعد مش هو مش عاوزه يقرب اكتر من كدا يعني مثلا قبل كدا كنت اعرف واحده ف ابتدائي و بعد ما خلصنا اعدادي كل واحد راح ل طريق حوالي 8 سنين نعرف بعض و بنشوف بعض ف دي حاجه من الحاجات بس مكانش في حاجه ناحيتها يعني يمكن عشان كنت لسه صغير او مكانش في حاجه فعلا المهم دلوقتي كل لما حد يبدأ يقرب احاول ابعده لدرجه اني معنديش ولا صاحب هو واحد الكتروني و ممكن يمشي ف اي لحظه انا دماغي متسستمه علي كدا ف هل الي بعمله دا كويس و بحافظ علي نفسي ولا لا عشان مش عارف بصراحه

انا تربيت في بيت مليان مشاكل واب نرجسي م بهتم الا بنفسه ومعظم اخواني طلعو زيه وحتى الطلعات انا واخواتي مانعنها منا ودا الشي المخليني اكره جميع الرجالة وكل م يتقدملي واحد ارفضه خوفا من انه يكون زيه اعل ايه بجد مش عارفة اطلع من الجحيم دا ازاي

السلام عليكم انا من فترة كملت اربع سنين من غير صحاب من غير ارتباط من غير أي تواصل حتى مع الناس بخرج من البيت مره كل شهرين تلاته حتى شغلي اونلاين وبالنسبة لشخصيتي فأنا أغلب الناس بترتاحلي بسرعه غريبة ويحكولي تفاصيل حياتهم من أول ما نتكلم لكن بتكون آخر مره نتكلم ديما لأني مش بسيب أي حد يقرب مني ولا بثق في أي حد بسهولة الغريب رغم كمية الوحدة والانعزال دول انا ديما مبسوط وحاسس برضى عن نفسي وحالي وبحس بالضيق والاكتئاب لما اتعامل مع الناس مش رهاب اجتماعي ولا تكبر خالص انا بحب اغلب الناس لكن بفضل يكونوا بعيد شاركت هنا من باب الفضول لو أي حد محتاج مساعده انا موجود لكن يعمل حسابه انها مسألة وقت واختفي تاني 😂