عرسان

كنت من فتره حكيت مشاكل حصلتلي ف حياتي ومن ضمنها إني كنت مرتبطه بشخص وللأسف خلاني اخسر أغلى حاجه عندي وكل إللي بيقوله عيشي حياتك لحد م نشوف حل وعمال يرتبط وعايش حياتهولا كأن فيه حد تاني حياته باظت دلوقتي أنا بيتقدملي عرسان وبرفض ف لو فكرت أوافق ف يوم اعمل ايه أنا مبحبش اخبي ف المفروض احكي وهو وقتها يكون ليه الحريه يوافق أو يرفض صح؟ معظم إللي بيتقدمولي معجبين بيا وشايفين إني شخص كويس ومحترم وحقيقي دي أكتر حاجه بتزعلني على نفسي إن الناس كلها تحلف ب أدبي أنا اروح اعمل كده مش قادره أسامح نفسي بجد

انا عندى 23 سنه بيجيلي عرسان كتير بس برفض عشان لحد الان ملقتش الشخص اللي ف دماغي صحابي اغلبهم اللي مرتبط واللي اتجوز وانا مقتنعه انى لسه صغيره لكن اهلي ضاغطين عليا ضغط غريب محدش يتحمله لدرجة اني بقيت بحس انه اي شخص هيجيلي تاني خلاص هوافق عشان اخلص منهم ، بس فى نفس الوقت مش قادره اتنازل عن الشخص اللي رسماه ف مخيلتي ولحد الان ملقتش 1% حتى من الشخص اللى نفسي الاقيه فأى حد من الاشخاص اللي اتقدمت مش عارفه اعمل ايه انا حتى معايري مش عاليه للدرجه محتاجه شخص عيونه طيبه فاهمين قصدي؟ كل اللي قعدت معاهم بحسهم اشرار ونظرات عيونهم مش مريحه خالص ومخوفاني..

انا كنت مخطوبه من سنه ونص وفركشت خطوبتي لأسباب تافهه كل ماافتكرها بزعل اوي لاني كنت بحب الشخص ده ومازلت حاسه اني متعلقه بين ونفسي يرجعلي المهم اني من ساعه ما فركشت وانا بيتقدملي عرسان كتير اوي وانا برفضهم ساعات بيبقى أسباب منطقية وساعات برفض لأسباب تافهه عشان خايفه من حتته التعلق بالشخص واني احبه ومنكملش مع بعض في الاخر متقدملي اليومين دول عريس حساه شخص لطيف ومتفهم وحنين بس انا مش عارفه اتقبل شكله لانه مش وسيم ومش زي النوع اللى بحبه في الرجاله وخايفه اوافق عليه تروح عليا فرص جواز احسن من دي حاسه اني لو استنيت شويه هلاقي الشخص اللى نفسي فيه تنصحوني اعمل ايه

هقولكم حاجة انا ابويا معروف عنه انه بخيل ومش بيخسن التصرف ولا الكلام مع الناس وبسبب كده محدش بيتقدملي خالص حتي قرايبي دايما بيقولوا انه هو اللي موقف حال بناته لان بناته شكلا واخلاقًا كويسين جدا انا الاول مكنش بيفرق معايت كلامهم بس دلوقتي بقا يفرق جامد جدا جدا لان فعلا اي عريس بيجي بيمشي بسبب طريقة ابويا وقرايبي عارفينه فمخدش بيجي من ناحيتهم مؤخرا بقا بقوا ينصحوني اقبل باي عريس لمجرد ان ابويا كده وانا مضايقة جدا لاني اشتغلت ع نفسي جامد وف الاخر بتاخد بذنب ابويا حتي من اقرب ما ليا