علاقة سرية

انا عايزه اتكلم في موضوع حصلي امبارح وبجد عايزه رأيكوا واحل الموضوع ده ازاي انا في رمضان كده كنا بنروح نقعد انا ومامتي في مكان وفي مره لقيت حد في المكان ده مركز معايا جدا بس مأخدتش في بالي خالص ومروحتش اصلا بعدها تاني بس جيت يوم التلات اللي قبل اللي فات روحت تاني ويمكن بشكل يومي كنت ببقا هناك لحد ما لقيت ان الشخص ده لسه مركز معايا وحاول مره يكلمني وانا ماشيه بس انا مردتش عليه بس جه امبارح قعد معايا علي الترابيزه وقالي انه محتاج يكلمني وهاتي رقمك ومش عارف ايه انا بصراحه كنت خايفه حد يشوفنا ومتوتره جدا ومكنتش عارفه اعمل ايه ف اديته الرقم عشان يبعد عني وبعدها وانا ماشيه لقيته وقفني وخدني قعدنا في مكان وفضل يقولي اني اديله فرصه ونتكلم ونتعرف بس انا دي مش سكتي خالص ولا بتعرف من ورا اهلي وخروجات وكلام من ده مش عشان متشدده او حاجه بس عشان ده الصح المهم انه عايز يتعرف وانا شايفه ان دراستي واهلي وربنا اهم من اننا نتعرف منغير ما حد يعرف ونبقى خايفين ومتوترين وانا حاسه انه داخل يلعب بصراحه وفي نفس الوقت انا مش عارفه اقوله لا ازاي وابعد ازاي منغير ما احس ولا احسسه باحراج وكمان قبل ما الموضوع يكبر ويطول عن كده وانا كمان حاسه بمشاعر من نحيه حد تاني وحاسه اني كده خاينه ليه وانا مبحبش اشوف نفسي كده ف بجد عايزه حل او كلام اقوله عشان بجد مش عارفه اسفه لو كنت طولت عليكوا.....♡

يا رجالة أنا راجل محترم وعيلتنا ناس محترمة ومحدش سمع صوتنا ولا عمرنا أذينا حد ودا مش تشكير بس دا فعلا والله النهار دا عرفت أن اختي كانت على علاقة مع شاب كان اتقدملها من فترة واحنا رفضناه لسوء سلوكه ولكنه بوساخته وندالته غواها وكلمها وفي كلام أنه قابلها والله أعلم اي اللي حصل وفرحها كمان أسبوع على حد ٱخر مش عارف اعمل اي ولا اتصرف ازاي أنا عقلي هيقف

من فتره مش كبيرة اوي لاحظت ان اختي بقت بتتصرف بطريقة غير عادتها ، يعني كانت مثلا بتخاف حد يمسك تيليفونها و كل شويه يجلها مكالمات ، المهم انا اكتشفت انها بتكلم ولد وقتها ، قعدت كتير مقولتش لحد علشان احنا معدناش اب و امي مش مسؤله و لو عرفت هتكلم خلاني و هيقتلوها ، يعني حرفيا هيقتلوها و انا مكنتش عايزة دا اكيد ، المهم وقتها بدأت المحلها ان الموضوع حرام و الكلام دا و لما لقيت انها مبطلتش كلام معاه صارحتها و اتخانقنا جامد و وصل اني مديت ايدي عليها ، كلمتها بالدين مره و بالتهديد اني اقول لخلاني مره و اني ازعق و بكل الطرق و هي مش شايفه انها غلطانه اصلا ، المهم وقتها انا كلمت الولد و شتمته و قلتله متكلمهاش تاني و هو طلع فعلا بايعها و مكلمهاش تاني ، انا قلت انها اتعظت و خلاص سكت و الموضوع عدي ، من اسبوع بدأت بنفس الحجات الي كانت بتعملها ، بتخاف حد يمسك الموبايل بتاعها و بيجلها مكالمات كتير من رقم هي مسجلاه حرف H بس المهم لما حست اني بدأت اشك غيرت الباسوورد بتاع تيليفونها و خلت الاسم من حرف ل اسم بنت hana المهم الموضوع مأكلش معايا يعني و امبارح و هي بتستحمي لقيت تيليفونها مفتوح ف اخدت الرقم الي بيكلمها دا و حطيته علي الترو كالر و لقيته ولد ، انا مصارحتهاش لاني مش قادرة اعمل معاها مشكله تاني ، هي المفروض اكبر مني و واعيه لكن هي بجد مش ناضجة خالص و انا عندي مشاكل تكفيني مش قادرة اكلمها و اتخانق معاها و اعمل مشاكل ، و المشكله اني حتي لو صارحتها و قلت لخلاني ممكن يعملوا فيها حاجة و اكون انا البنت الوحشه الي مسترتش علي اختها ، انا بفكر مقلش لحد و اسيبها مع نفسها بس هي اي حد بياكل بدماغها حلاوة و لو طلب منها حاجة مش تمام هتعملها و وقتها هنروح ف داهيه كلنا معاها ، عايزة اقتراحات اعمل ايه علشان بجد مش عارفة و بدأت احس بقرف منها بصراحة . اسفه للإطاله.