السلام عليكم ورحمه الله انا آسفة لو طولت عليكم بس دى حاجات فى خاطرى وعايزة نصيحة مفيدة بجد : " أنا اتربيت في بيئة صعبة جدًا، كان فيها عنصرية وتفرقة وكلام جارح بشكل مستمر عن شكلي وطريقتي وحتى أحلامي وطموحاتي. طول الوقت كنت بحس إني أقل أو إن لازم أعمل حاجة علشان أستحق التقدير مع الوقت بقيت بستنى الثناء من الناس على أي حاجة بعملها، وبقيت محتاجة دايمًا حد يقولي إن أنا كويسة الإحساس ده وصل حتى لعلاقاتي وبقيت أتمسك بأي مكان أو شخص يديلي كلام حلو حتى لو كان غلط ليا دلوقتي أنا بحاول أحسن من نفسي وأتغير لكن الحقيقة إن جوايا تعب كبير أبدأ حاجات كتير بحماس بسيط لكن بسرعة بفقد الطاقة وبسيبها لا لغة كملت فيها ولا خطوات حقيقية أخدتها للسفر أو لمستقبلي بقيت حاسة بنوع من اللامبالاة كأني واقفة مكاني ومش قادرة أتحرك وفي نفس الوقت بضغط على نفسي جدًا لأن الوقت بيعدي وأنا حاسة إني قربت أتخرج ولسه معملتش حاجة أفتخر بيها الخوف من المستقبل بقى بيكبر جوايا كل يوم أكتر حاجة جوايا إني نفسي أحب وأتحب بصدق ويبقى ليا حياة أسرية دافئة ومستقرة حياة مختلفة عن اللي اتربيت فيها لكن أحيانًا بحس إن ده كمان صعب جدا "