فراغ داخلي

سؤال موجود في دماغي بقاله فترة... إزاي الواحد يتعامل مع إحساس إنه كان محتاج أمان واهتمام واحتواء في مرحلة معينة من حياته وملاقاهوش؟ مش قصدي اهتمام عادي، قصدي الإحساس إن في حد مطمنك، سامعك، وموجود جنبك وحاسس بأمان وقت ما تكون محتاج ده فعلًا. وإزاي منخليش النقص ده يفضل مأثر علينا بعد سنين؟ لأن ساعات بحس إن الإنسان ممكن يكبر، وتتغير حياته، لكن جزء جواه يفضل مستني الحاجة اللي فاتته زمان وكأن الوقت موقفش عند اللحظة دي. وهل فعلًا الحاجات دي بتتعوض بعدين؟ ولا في بعض الاحتياجات لما بتتفوت في وقتها بتسيب فراغ بيفضل موجود جوانا حتى لو حاولنا نملاه بحاجات تانية؟ بجد حابة أعرف الناس بتتعامل مع الموضوع ده إزاي، وهل حد حس إنه قدر يتجاوز الإحساس ده فعلًا؟

عايزة أفضفض شوية، لأنّي أكيد مش هعرف أقول الكلام ده قدام حد. ليه دايمًا بلاقي نفسي بتعلق بناس مش أسوياء نفسيًا؟ وليه بسبب بابا عندي طول الوقت إحساس بالاحتياج العاطفي؟ حاسة إني محتاجة يكون في حد في حياتي باستمرار. لدرجة إن أي حد حتى لو بنتكلم كلام عادي، بحس إني بدأت أتعلق بيه. بجد ليه أنا كده؟ بحس إني فاضية من جوا بشكل كبير، والمشكلة إني عندي 21 سنة، يعني مش صغيرة. المفروض أكون أقوى من كده وأعرف أحافظ على نفسي أكتر، لكن دايمًا بحس إن مشاعري هينة عليا، وكأن الموضوع مش فارق معايا، رغم إنه بيأثر فيا جدًا. بقيت حاسة إني بلوم الناس على حاجات كتير. من فترة كان في حد بيحاول يتكلم معايا، وواحدة صاحبتي كانت عارفة عنه حاجات كتير وقالتلي إنه بتاع بنات. كنت مقررة أعمله بلوك وأنهي الموضوع، لكن لقيت نفسي متضايقة منه بطريقة مش طبيعية. حاسة إني عايزة أقوله: "ليه؟ ليه أنت كده؟ ليه بتتعامل بالطريقة دي؟" مع إن الموضوع أصلًا ميخصنيش. يمكن لأني جوايا نفس الشعور تجاه بابا. نفسي أقوله: ليه أنت بعيد عننا؟ ليه عمرك ما كنت قريب؟ ليه سايبنا كده؟ هو موجود وعايش، لكن عمره ما كان موجود فعلًا. لا بيسأل، ولا بيتكلم، ولا بيدعم. والأسوأ إنه كل ما أحاول أنجح أو أعمل خطوة لقدام، بحس إنه بيرجعني للصفر. أنا تعبت جدًا من الموضوع ده. بحاول قدام الناس أبين إن عادي ومش فارق معايا وإننا عايشين من غيره، لكن الحقيقة غير كده. وشفت أمثلة كتير حواليا لبنات من بيوت متفككة، واتجوزوا ناس بيعاملوهم أسوأ معاملة، واستحملوا حاجات صعبة جدًا. وأنا بجد خايفة. خايفة أدخل علاقة أو جواز وأنا عندي الفراغ ده كله، فأقبل بحاجات مينفعش أقبلها، أو أتمسك بحد لمجرد إنه اداني اهتمام. أنا إنسانة مسالمة وهادية جدًا، وخايفة حد يستغل الاحتياج ده أو يستغل طيبتي، وفي الآخر أكون أنا الخسرانة. بقيت أخاف من فكرة الجواز نفسها. نفسي ألاقي حد يعوضني عن الأيام الصعبة والحرمان اللي حسيت بيه بسبب غياب الأب، لكن في نفس الوقت خايفة جدًا أدور على التعويض ده في الشخص الغلط.

ايه الاخبار عاوز اشارك حاجة غالبا انا كدا هفضل طول عمري وحداني ومعارفي وصحابي قليلين او معدومين تماما زمان كنت منعزل جدا لدرجة معنديش اي مهارات تواصل اجتماعي ابدا وكنت مكتئب تماما فقررت اني اشتغل على المهارات دي وفعلا اتحسنت جدا ومبقاش عندي رهاب زي قبل كدا يعتبر اختفى حاليا بس اللي اكتشفته اني من كتر وطول مدة عزلتي بقيت عايش جوا دماغي وبرتاح اكتر هناك وارض الواقع مرهقة ومزيفة ومش شبه توقعاتي كنت زمان اتمنى اتعرف على اكبر قدر ممكن من الناس واقرب منهم اللي ارتاحله ليا بس لما خرجت وعرفت ناس بردو مش حاسس اني مندمج معاهم ولا بكون مهتم ارجع اسال ولا اظبط خروج وهكذا كل دا حلو دا حتى انا اكتشفت اني بميل للهوايات الفرديه زي العزف مثلا او القرايه او المشي او المزيكا او الافلام وبكره جدا الكوره واي حاجة بيشجعها ناس كتير فنا مش عارف مفروض اعمل ايه احل الموضوع ازاي لان مش بكون زعلان ولا حاجة غبر لما اتحط في موقف والاقي نفسي وحيد في الحياة وده شعور لا اتمناه لاي انسان لانه مؤذي جدا الحياة صعبة ومؤلمة ومحتاجين لبعض اتمنى اكون اكتر سعادة في المستقبل

كنتُ أمتلك الكثير من الهوايات التي كانت تُضيء أيامي وتمنحني شعورًا بالحياة، كانت جزءًا مني… من شخصيتي ومن راحتي. لكن حين فقدتُ شغفي، فقدتُ معها كل شيء. لم تعد لديّ رغبة في أي شيء، لا في هواياتي التي كنت أحبها، ولا حتى في دراستي واختباراتي. أصبحتُ أشعر وكأنني فارغة من الداخل، وكأن النسخة التي كنتُ عليها اختفت فجأة. أحاول أن أعود كما كنت، أحاول أن أستعيد ذلك الإحساس… لكنني لا أستطيع. وهذا ما يؤلمني أكثر، أنني أشتاق لنفسي القديمة ولا أعرف كيف أصل إليها. هل مرّ أحدكم بهذا الشعور؟ كيف يمكن استعادة الشغف بعد أن يختفي بهذه الطريقة؟

بقالي فتره حاسه اني تايهه مش عارفه انا ماشيه صح ولا غلط كل حاجه ملخبطه و كل حاجه تبان انها ليها حل و هي في الحقيقه ملهاش مش قادره افرح ولا احس باي حاجه غير الفراغ مهما عملت و مهما ضحكت بيكون من ورا قلبي و من جوايا مش حاسه بحاجه .. كله بيقولي اكمل و اسعى و احاول بس كل دا لي و علشان اي و لي احاول غصب عني و ابذل مجهود و اتعب و ف الاخر محققش حاجه و انا ف الحقيقه تعبت و عايزه بس ارتاح و المشكله اني لو ارتاحت عارفه اني مش هقوم تاني .

الوحده قاتله وسط الحياه والتجارب والشغل وأن الإنسان مسحول وبعيد عن أهله الوحده وحشه وبيجي علي الإنسان وقت حاسس أنه مطفي بعيد عن أصحابه وكل دا بيعدي اليوم بيوم مش عارف ازاي اغير دا حاسس بفراغ ووحده قاتله علي قد اني بحاول ف الوقت الفاضي اسحل نفسي ف online games اذاكر وكل الحجات دي بس حاسس اني فارغ من جوايا