ياريت متفوتش الكلام ده ممكن تكون سبب خير ليا... من حوالي ٥ شهور كده حياتي اتبدلت تماما انا عندي ٢٢ سنة كنت رايح اكشف على جنبي عادي بس كنت متوتر جدا وقتها وانا اصلا عندي فوبيا من الدكاترة وكده المهم كل حاجة كانت تمام والدكتور قاسلي الضغط بس كنت متوتر على الاخر وقتها وقالي الضغط عالي كان ١٦٠/١٠٠ المهم قالي تابع الضغط كام يوم وتعالى تابعته بس كنت لما اجي اقيسه في صيدلية مثلا بكون متوتر جدا برده ومباخدش راحة ولا حاجة ويطلع عالي جبت اجهزة في البيت وجربت اقيس بنفسي بس بمجرد م الف الجهاز على ايدي او اشوفه بس ضربات قلبي تعلى واتوتر وبقى عندي فوبيا من جهاز الضغط بطريقة بشعة الدكتور كتبلي على علاج ضغط اخدته ٣ شهور وكنت بقيس الضغط كل يوم لمدة متقلش عن ٤ ساعات يوميا لمدة كذا شهر اول قياس دايما يكون عالي وبفضل اقيس مرة واتنين وعشرة لحد م اهدى على الاخر ويطلع الرقم طبيعي اوقات كان بيطلع الضغط واطي يوصل ل ١٠٠/٥٠ وكده خلصت امتحانات ورحت لدكتور قلب وحكيتله القصة (واه عملت اشعة وتحاليل وايكو والحمدلله كان كله سليم) الدكتور شاف الاشعة والتحاليل وكشف عليا وعملي سونار على القلب تاني في العيادة وقالي وقف علاج الضغط اللي بتاخده وكتبلي اندرال ١٠ لمدة اسبوع (دوا بيهدي ضربات القلب)الكلام ده كان من شهرين رحتله بعدها وقالي هنكمل عليه كمان شهرين عدى حوالي شهر ونص اهو بقيت بقيس اقل مش هنكر يعني مرة في الاسبوع ولا حاجة المرات الاولى كالعادة بتطلع عالية وبعد كده بيقل شوية بشوية وباخد الحباية يكون ١٢٠ فوق وتحت في الستينات ولا حاجة ودلوقتي فاضل اسبوعين على معاد الزيارة وانا بمجرد ما بفكر اني هروح تاني بقلق جدا يعني حرفيا مجرد التفكير بس مش عارف اعمل ايه ومش عارف هيحصل ايه نفسي ابطل علاج ونفسي اتطمن اني بخير وخايف جدا من اللي جاي مكونش قده لان الخمس شهور اللي فاتوا انا فعلا متدمر تماما ومتأكد اني لما اروح هناك ويقيسلي الضغط هيكون عالي لان التوتر هيكون مهول انا اذا كان انا قاعد في بيتي دلوقتي وبكتب الكلام ده وايدي بترتعش اومال هناك هيحصل ايه ادعولي بالله عليكم في الايام دي لعل احدكم اقرب الى الله مني ولو حد عنده فكرة او مر باللي مريت بيه ده ياريت يفيدني