مساء الخير يا جماعة، يارب تكونوا بخير في بنت أنا معجب بيها، بس هي أكبر مني بسنة أنا شغال صحفي، عرفتها من جروب واتساب، ولاحظت إنها متدربة ومش عارفة أي حاجة خالص، يعني حرفيًا على الله حكايتها، وأنا اللي أشطر منها بمراحل بكتير جدًا، مش بمقارنة أصلاً. البنت كانت كل شوية تنزل على الجروبات تسأل وتطلب مساعدة، ومحدش كان بيرد عليها نهائي، فقولت خلاص أنا هدخل أساعدها، كلمتها برايفت، وبدأت أشرح لها وأساعدها في حاجات كتير جدًا، لدرجة إني اديتها أرقام مصادر ناس تقيلة جدًا في مصر، الأرقام دي أصلًا مش مع حد في مصر غيري وكتير كانوا بيتحايلو عليا ابعتها وانا برفض واديت ليها دايما ولما كانت بتطلب رقم ببعتهولها عشان هي متدربة. ووريتها شغلي وعلاقاتي واللي أنا وصلتله، واتكلمت عن نفسي شوية عشان تبقى فاهمة أنا مين، مش أي حد وخلاص يعني، وبرغم كل ده، لاقيتها ولا هنا، ولا مهتمة أصلًا! سجلت رقمي آه، وشوفت إنها بتشوف الاستوريهات وكانت تحطلي على كل ستوري قلب قولت اكيد فرحانة بيا وطريقة تفكيرها بصراحة شدتني جدًا، رغم إني بصراحة شايف إني اللي أعلى منها بكتير في المستوى والشغل والعلاقات، وكمان أنا أصغر منها وهي أكبر مني بسنة، وبرضو مش عاملة ربع اللي أنا عملته في المجال. بعتلها Add، مقبلتش، قولتلها تقبلي، قالت حاضر، وطبعًا كبرت دماغها ومقبلتش، وبرضو أنا مكمل في مساعدتي ليها، بشرحلها وبدعمها، وهي ترد عليّ بـ “شكرًا لحضرتك” كده رسمي أوي رغم إنها أكبر مني بسنة بعد كده جيت أفتح معاها كلام تاني، لاقيتها مردتش، وبعدين بعد يومين تكلمني تطلب مساعدة! عملت اللي طلبته، وردودها كانت مقتضبة جدًا، يعني على قد السؤال وخلاص. حاولت أفتح كلام تاني، مردتش خالص. وبعدين أخد بالي إنها مسحت رقمي أصلاً، وبعدها بقت لا بترد ولا بتفتح كلام، وأنا بطبيعتي مش من الناس اللي تزن أو تبعت لحد مردش، أنا بكبر دماغي فورًا. الكلام ده كله كان في شهر 8. دلوقتي بفكر أرجع أنكش وأسأل مثلًا “إزيك عاملة إيه”، أو أي مدخل كده، بس أنا عمري في حياتي ما حصل إن حد مردش عليّ وأنا اللي أرجع أبعتله تاني، مش ستايلي خالص وانا معملش كده والمفروض هي اللي تخش تكلمني. بس في نفس الوقت، من بوستاتها واستوريهاتها حاسس إن دماغها عاجباني، بس هي مش مدياني أي فرصة، وده غريب جدًا خصوصًا إن المجال أصلًا نادر فيه بنات، وهي أكبر مني بسنة ومع ذلك أنا اللي معلمها كل حاجة تقريبًا. فمش فاهم بجد، هل أخد خطوة وأبعتلها وأسأل عليها وأجرب تاني؟ ولا أخليني تقيل كده وأكبر دماغي خالص؟ والأغرب من كل ده… إزاي واحدة متدربة، أكبر مني بسنة، ومش عارفة أي حاجة تقريبًا، وأنا اللي معلمها ومساعدها وعلاقاتي أقوى منها بمراحل، ومش منبهرة بيا أصلاً؟!